Sikkiligar Bible
2 ಕೊರಿಂಥ 5
ಜಿಮಿನಪರ ಅಪೆ ರ್ಹಯಲ ಗುಡಾರ ಕದ್ಯಾಮ ಅಪ್ನು ಅಂಗ ನಾಶ ಥಾವಸ ಕೈನ ಅಪೊನೆ ಗ್ವತ್ತ ಛೆ ತೆನೈಸೊ ತೆ ಥಾತಾಮಾ ಅಪೊನೆ ರ್ಹವಾನಾ ಹುತಿ ಕ್ಹುದಾ ಅಪೊನೆ ಯಕ್ಕ ಘರ ದಿವಸ. ತೆ ಮನಕ್ಹೊ ಭಾಂದಲ ಘರ ನ್ಹವೈ. ತೆ ಪರಲೊಕಮಾ ರ್ಹಯಲ ಹಮೆಶಾನು ಘರ ವ್ಹೈ. ಅಪೆ ಹಮ್ನಾ ಎ ಅಂಗಮಾ ಸುಸ್ತ ಥೈ ಗೈಯಾಸ. ಪರಲೊಕಮಾ ರ್ಹಯಲ ಅಪ್ನೊ ಘರ ಕ್ಹುದಾ ಅಪೊನೆ ಕೆಳಾಮಾ ದಿವಸ ಕೈನ ದೆಕಡ್ಯಾಸ. ತೆ ಅಪೆ ಘಾಲ್ಲೆತಾಮಾ ಉಗಾಡಾ ರ್ಹತಾ ನೈ. ಎ ಘರಮಾ ರ್ಹಯೆ ಲಕ್ಕಾ ಅಪೊನೆ ಯಕ್ಕ ವಜ್ಜು ಛೆ. ವರಿ ಅಪೆ ನೆಳ್ಳಿಯೆಸ. ಉಗಾಡಾ ರ್ಹವಾನು ಅಪೊನೆ ನೈ ಚೊ಼ಕು ರ್ಹಯಲ ಹುತಿ ಪರಲೊಕನು ಘರ ಘಾಲ್ಲಿವಾನೆ ಮನಸ ಕರಿಯೆಸ. ಮರಿ ಜಾ಼ವಾನು ಎ ಅಂಗ ಅಪ್ನಾ ಪುರಾ ಅಂಗನೆ ಔಳಗಿಲಿವಸ. ಇನಾಹುತಿಜ಼ ಕ್ಹುದಾ ಅಪೊನೆ ತಯ್ಯಾರ ಕರ್ಯೊಸ. ಎ ಕ್ಹಾರು ಕ್ಹರಿಜ಼ ವ್ಹೈ ಕೈನ ದೆಕಾಡಾನಾ ಹುತಿ ಪವಿತ್ರ ಆತ್ಮಾ ಅಪೊನೆ ದಿದ್ಯೊಸ.
ತಿನಾ ಹುತಿಜ಼ ಅಪೆ ಹರ ಟೈಮ್ಮ ಧೈರೆಕ್ಹು ಛೆ. ಎ ಅಂಗಮಾ ಜಿವ್ತಾ ರ್ಹಯೆ ಲಕ್ಕಾ ಪ್ರಭುಕ್ಹು ದುರ ರ್ಹಯೆಸ ಕೈನ ಕವಾನು ಅಪೊನೆ ಗ್ವತ್ತ ಛೆ. ಅಪೆ ಸು ದೆಕಾಡ್ಯಾಸ ತಿನಾ ಹುತಿ ಅಪೆ ಜಿವ್ತಾ ನತ್ತಿ. ವರಿಬಿ ಅಪೆ ಕಿಪರ ಬರೊಕ್ಹೊ ಮ್ಹೆಲ್ಯಾಸ ತಿನಾಹುತಿ ಜಿವ್ತಾ ಛೆ. ತಿನಾಹುತಿ ಅಪೆ ಧೈರ್ಯವಾಲಾ ಥೈನ ಎ ಅಂಗ ಛೊಡಿನ ಪ್ರಭುನಾ ಕ್ಹಾತೆ ರ್ಹವಾನು ಕ್ಹರಿಮಾಜ಼ ಆಸ ಕರಿಯೆಸ. ಕ್ಹುದಾನೆ ಮೆಚ್ಚೆಸಾನು ಯಕ್ಕಜ಼ ಅಪ್ನು ಉದ್ದೆಶ ವ್ಹೈ. ಅಪೆ ಅಪ್ನಾ ಅಂಗಮಾ ನ್ಹ್ಯಾ ರ್ಹತಾಮಾಬಿ ಪ್ರಭುನಾ ಕ್ಹಾತೆ ತ್ಯಾ ರ್ಹವಾನೆ ತಿನೆ ಮೆಚ್ಚೆಸಾನು ಯಕ್ಕಜ಼ ಉದ್ದೆಶ ವ್ಹೈ. ಅಪೆ ಕ್ಹಾರಾ ನ್ಯಾಯ ವಿಚಾರಣೆನಾ ಹುತಿ ಕ್ರಿಸ್ತನಾ ಕ್ಹಾಮಾ ಹುಬ್ರೌ. ಹರಿಯಕ್ಲೊ ದುನಿಯಾನಿ ಅಂಗಮಾ ರ್ಹತಾಮಾ ಕರಲ ಚೊ಼ಕಾನಾ ಹುತಿ ವರಿ ಕೆಟ್ಟನಾ ಹುತಿ ರ್ಹೈನೆಕಾ ತಿನೊ ಪ್ರತಿಫಲ ಹೊಂದಸ.
ಕ್ರಿಸ್ತನಾ ಮುಲಕ ಕ್ಹುದಾನಾ ಕ್ಹಾತೆ ದೊಸ್ತಿ
ಪ್ರಭುನು ಭೆ ಸುವೈ ಕವಾನು ಅಪೊನೆ ಗ್ವತ್ತ ಛೆ. ತಿನಾಹುತಿ ಕ್ಹರಿನೆ ವಪ್ಪಿಲಿವಾನಾಹುತಿ ಮನಕ್ಹೊನೆ ಮದತ ಕರಾನೆ ಅಪೆ ಕೊಶಿಶ ಕರಿಯೆಸ. ಅಪೆ ಕೆವಾ ಛೆ ಕವಾನು ಕ್ಹುದಾನೆ ಗ್ವತ್ತ ಛೆ. ತುಮೆಬಿ ತುಮಾರಾ ಮನಸೊ ಕಿಮ್ಮ ಛೆ ಕವಾನು ವಳಕ್ಯಾಸ ಕೈನ ಬರೊಕ್ಹೊ ಛೆ. ಹಮೆ ತುಮಾರಾ ಕ್ಹಾಮಾ ವರಿ ಯಕ್ಕೆಬ ಸಾಬಿತ ಕರಾಡ್ಯಾನತ್ತಿ. ವರಿಬಿ ಹಮಾರಾ ಹುತಿ ತುಮೊಕನ ಕವಾಡ್ಯಾಸ. ತುಮೆ ಹಮಾರಿ ವಿಶಯಮಾ ಹಮ್ಮೆ ಕರಾನೆ ತುಮೊನೆ ಸಬುತ ದಿಯೆಸ. ತೆಳಾಮಾ ಡೊಳೆ ದಿಕ್ಹಾನಾ ಕಾಮೊನೆ ದೆಕಿನ ಹೆಮ್ಮೆ ಪಡಾನಾ ಮನಕ್ಹೊನೆ ದಿವಾನು ಸಬೊತ ಹಮೊಕನ ರ್ಹವಸ. ತೆ ಯಕ್ಕ ಮನಕ್ಹನು ಮನಸನಾ ಹುತಿ ಚಿಂತಾ ಕರ್ತೊ ನೈ. ಹಮೆ ಪಿಸಾಳಾ ವಸೆತೊ ತೆ ಕ್ಹುದಾನಾ ಹುತಿ ವ್ಹೈ ವರಿ ಹಮೊಕನ ಚೊ಼ಕು ಗ್ಯಾನ ರ್ಹಯುಮ ತುಮಾರಾ ಹುತಿಜ಼ ವ್ಹೈ. ಕ್ರಿಸ್ತನಿ ಮಯಾ ಹಮೊನೆ ವತ್ತಾಯಾ ಕರಸ. ಕಾ ಕದ್ಯಾಮ ಕ್ಹಾರಾ ಮನಕ್ಹೊನಾ ಹುತಿ ತೆ ಮರ್xಯೊಸ ಕೈನ ಅಪೊನೆ ಗ್ವತ್ತ ಛೆ. ತಿನಾಹುತಿ ಕ್ಹಾರಾ ಮರ್xಯಾ. ಜಿವ್ತಾ ರ್ಹವಾಲಾ ಇತ್ತಿ ಉಪ್ಪರ ತ್ಯುನಾಹುತಿ ಜಿವ್ನಾ ಕರು ನೈ ಕೈನ ಕ್ರಿಸ್ತ ಕ್ಹಾರಾ ಮನಕ್ಹೊನಾ ಹುತಿ ಮರ್xಯೊ. ತೆ ಮನಕ್ಹೊ ತಿನಾಹುತಿ ಜಿವ್ನಾ ಕರು ಕೈನ ತೆ ತ್ಯುನಾಹುತಿ ಮರ್ಯೊ ವೆ ಮರಲವಾಲಾವೊಮಾತೊ ಜಿವ್ತೊ ಥೈನ ಉಟ್ಯೊ.
ಇಮ್ಮ ರ್ಹಯಲಹುತಿ ಮನಕ್ಹೊನಾ ಅಂಗನಾಹುತಿ ವಿಚಾರ ಕರಾನು ಆಜ಼ತಾ ವಿಚಾರ ಕರ್ತಾ ನೈ. ದುನಿಯಾ ವಿಚಾರ ಕರಲಿಂಗತ ಪಾಚ಼ಲ್ಯಾ ಕಾಲಮಾ ಹಮೆ ಕ್ರಿಸ್ತನಾ ಹುತಿ ವಿಚಾರ ಕರ್ಯಾತಾ. ಹಮ್ನಾ ತಿಮ ಹಮೆ ವಿಚಾರ ಕರ್ತಾ ನೈ. ಕುನಬಿ ಕ್ರಿಸ್ತಮಾ ರ್ಹಯೊಮ ತೆ ನವೊ ಸೃಷ್ಠಿ ಥಯಾಸ. ಜುನ್ನಿಯೊ ಸಂಗತಿಯೊ ಗೈಪಡಿಯೊ. ಕ್ಹಾರುಜ ನವು ಥಯು. ಎ ಕ್ಹಾರುಜ಼ ಕ್ಹುದಾಕ್ಹುಜ಼ ಥಯು. ಕ್ರಿಸ್ತನಾ ಮುಲಕ ಕ್ಹುದಾ ಅಪೊನೆ ತಿನಾಕ್ಹಾತೆ ಸಮಾಧಾನ ಕರ್ಯೊಸ. ವರಿ ಬಿಜಾ಼ವೊನೆಬಿ ಸಮಾಧಾನಮಾ ಬಲೈಲಾವಾನೆ ಕ್ಹುದಾ ತೆ ಕಾಮ ಅಪೊನೆ ದಿದ್ಯೊಸ. ಕದ್ಯಾಮ ಕ್ಹುದಾ ಕ್ರಿಸ್ತಮಾ ಕ್ಹಾರಿ ಜಗತ್ನೆ ತಿನಾ ಕ್ಹಾತೆ ಸಮಾಧಾನ ಕರಿಲೆತೊತೊ. ಕ್ಹುದಾ ಕ್ರಿಸ್ತಮಾ ಮನಕ್ಹೊನು ಅಪರಾಧ ದೆಕಾಡತೊ ನೈ. ಎ ಸಮಾಧಾನನು ಸುದ್ದಿ ಮನಕ್ಹೊನೆ ಕೆ ಕೈನ. ಕಾಮ ಕ್ಹುದಾ ಅಪೊನೆ ದಿದ್ಯೊಸ.
ತಿನಾಹುತಿ ಕ್ರಿಸ್ತನಾ ಬಗಲ್ತಾ ಬೊಲಾನಾಹುತಿ ಮೊಕ್ಲಲ ಛೆ. ಎ ಕ್ಹುದಾ ಎ ಕ್ಹಾರು ಅಪ್ನಾ ಬಗಲ್ತೊ ಮನಕ್ಹೊನೆ ಬಲಾವಾನು ವ್ಹೈ. ಕ್ಹುದಾನಾ ಕ್ಹಾತೆ ತುಮೆ ಸಮಾಧಾನಮಾ ರ್ಹವೊ ಕೈನ ತೊಮೊಕನ ಮಾಂಗಿಲೆತಾಮಾ ಕ್ರಿಸ್ತನಾ ಬಗಲ್ತಾ ಬೊಲಾಲಾ ಥಯಾಸ. ಕ್ರಿಸ್ತಮಾ ಪಾಪ ನ್ಹೊತು. ವರಿ ಅಪೆ ಕ್ಹುದಾನೆ ಸಮರ್ಪಕ ಥೈನ ನಿತಿವಾಲಾನಿಂಗತ ಕ್ಹುದಾ ತಿನೆ ಪಾಪನೊ ಸ್ವರುಪ ಕರ್ಯೊ.
Sikkiligar Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.