Sikkiligar Bible
2 ಕೊರಿಂಥ 6
ಹಮೆ ಕ್ಹುದಾನಾ ಕ್ಹಾತೆ ಕಾಮ ಕರಾಲಾ ವ್ಹೈ. ಇನಾಹುತಿ ಹಮೆ ತುಮೊಕನ ಸು ಮಾಂಗಿಲಿಯೆಸ ಕದ್ಯಾಮ, ತುಮೆ ಕ್ಹುದಾಕಂತು ಹೊಂದಿಲಿದಲ ಕೃಪಾ ಉಪಯೊಗ ಥಾವಾ ವರಕ್ಹು ದೆಕಿಲಿವೊ. ಪ್ರಸನ್ನತೆನಾ ಕಾಲಮಾ ತಾರಿ ಮರ್ಗಾ ಐಕ್ಯೊ, ರಕ್ಷಣೆನಾ ದಿನೊಮಾ ತುನೆ ಮದತ ಕರ್ಯೊಸ ಕೈನ ಕ್ಹುದಾ ಕವಾಡೊಸತೊ. ತೆ ಪ್ರಸನ್ನತೆನೊ ಕಾಲ; ಆಂಜ಼ ತೆ ರಕ್ಷಣೆನು ದಿನ ವ್ಹೈ.
ಹಮಾರಿ ಸೆವೆ ಕಿನಾ ಕ್ಹಾಮಿಬಿ ಕೆಟ್ಟ ಥಾಯೆನೈಸೊ, ಹಮೆ ಕಿನೆಜ಼ ಅಡ್ಡಿ ಕರ್ಯಾ ನೈ. ತಿನಾಹುತಿ, ಕ್ಹಾರಾ ವಿಶಯೊಮಾ ಕ್ಹುದಾನಾ ಸೆವಕೊ ವ್ಹೈ ಕೈನ ಹಮಾರಾ ಸೆವೆನೆ ಸಮ್ಮತ ಕರಲಿನ, ಹಮೆ ತ್ರಾಸಮಾಬಿ, ಸಂಕಟಮಾಬಿ, ಇಕ್ಕಟಮಾಬಿ, ಮಾರೊಮಾಬಿ, ಜೆಲಮಾ, ತ್ರಾಸೊಮಾ ಅನುಭವಸ್ಯಾಶ. ಅಂಗಭಾಬಿನ ಕಾಮ ಕರ್ಯಾಸ. ನಿಂದರ ನೈಸೊ ಭುಕ್ಕ ಲಾಗಿನ ತಡಪ್ಯಾಸ; ಎ ಕ್ಹಾರಾ ವಿಶಯೊಮಾ ಘನು ಸಮಾದಾನ ದೆಕಾಡ್ಯಾಸ. ಚೊಕು ಮನಸ, ಗ್ಯಾನ, ಶಾಂತಿ, ದಯಾ ಪವಿತ್ರ ಆತ್ಮಾಮಾ ಕಪಟ ನೈಸೊ ಮಯಾ, ಕ್ಹರಿನಿ ವಾಕ್ಯಾ, ಕ್ಹುದಾನಿ ಮಹಿಮಾ ಇಮಾ ರ್ಹಯಲವಾಲಾ ಥೈನ, ಹತೊಮಾ ನಿತಿ ಕವಾನಾ ಆಯುದೊ ಧರಿಲಿದ್ಯಾಸ. ಅಪೆ ಮಾನ ವರಿ ಅವಮಾನ, ಕಿರ್ತಿ ವರಿ ಅಪಕಿರ್ತಿಮಾ ಸೆವಾ ಕರ್ಯಾಸ. ಕ್ಹರಿವಾಲಾ ರ್ಹಯತಬಿ ಮೊಸ ಕರಾಲಾ ವ್ಹೈ ಕೈನ ಐಕೈ ಲಿದ್ಯಾಸ. ಅಪೆ ಸಿದ್ದ ರ್ಹೈತಬಿ ವಳಕ ನೈಸೊವಾಲಾ ಥೈನ ಸೆವಾ ಕರ್ಯಾಸ. ಮರಾಲಾ ವ್ಹೈ ಕೈನ ದೆಕಾಡ್ಯಾ ತಬಿ ಜ್ಯುತಾ ಸೆ! ದೆಕಿ ಶಿಕ್ಷಾ ಗುರಿ ಥೈತಬಿ ಮರಾಲಾ ಥಯಾಸ, ದುಖಪಡ್ದಾಲಾ ರ್ಹೈತಬಿ ಸೆವಾಮಾ ಕೆಳಾಮಾಬಿ ಕ್ಹುಶ ರ್ಹಯೆಸ, ಗರಿಬ ರ್ಹೈತಬಿ ಘನಾಜನಾವೊನೆ ಸೌಕಾರವಾಲಾ ಕರ್ಯಾಸ; ಸುಬಿ ನೈಸೊವಾಲಾ ರ್ಹೈತಬಿ ಕ್ಹಾರುಜ಼ ವ್ಹಂದಲವಾಲಾ ಥಯಾಸ.
ಕೊರಿಂಥಮಾ ರ್ಹಯಲವಾಲಾ ಕ್ಹುಲಾ ಮನಸಕ್ಹು ಖುಲ್ಲಾ ಮನಸಕ್ಹು ಹಮೆ ತುಮಾರಾ ಕ್ಹಾತೆ ಬೊಲ್ಯಾಸ. ಹಮಾರಾಮಾ ಕೆಟ್ಟ ಭಾವಾನಾ ನತ್ತಿ. ಎ ರ್ಹವಾನು ತುಮಾರಾಜ಼ ವ್ಹೈ. ತಿನಾಹುತಿ ಬಚ್ಚಾವೊನೆ ಕದಲ ತಿಮ್ಮ ಕದ್ಯಾಸ; ಹಮೆ ಪೂರಾಮನಸಕ್ಹು ಮಯಾ ಕರಲ ನಿಂಗತ, ತುಮೆಬಿ ಹಮೊನೆ ಪೂರಾ ಮನಕ್ಹು ಮಯಾ ಕರೊ.
ಕ್ರೈಸ್ತರೊ ಅನ್ಯ ಮನಕ್ಹೊನಾ ಅನ್ಯುನತೆ ಕೆಟ್ಟು ನೈ
ತುಮೆ ಕ್ರಿಸ್ತಪರ ಬರೊಕ್ಹೊ ನೈಸೊವಾಲಾವೊನಾ ಕ್ಹಾತೆ ಮಳಿನ ಇಜ್ಜೊಡ ಥಾವೊ ನಕೊ. ಧರ್ಮನೆ ವರಿ ಅಧರ್ಮನೆ ಮದತ ಸುವೈ? ಉಜಾ಼ಲಾನೆ ವರಿ ಅಮದಾರಾನೆ ಅನ್ಯುನತೆ ಸುವೈ? ಕ್ರಿಸ್ತನೆಬಿ ವರಿ ಸೈತಾನೆ ಒಪ್ಪಂದ ಸುವೈ? ವಿಶ್ವಾಶಿನೆ ಅವಿಶ್ವಾಸಿನೆ ಪಾಲ ಸುವೈ? ಕ್ಹುದಾನಿ ಸಭೆನೆ ವಿಗ್ರಹೊನೆ ಒಪ್ಪಿಗೆ ಸುವೈ? ಅಪೆ ಕ್ಹುದಾ ಕದಲ ನಿಂಗತ ಜಿವ ಸ್ವರೂಪ ಥಯಲ ಕ್ಹುದಾನಾ ಸಭೆ ಥಯಾಸತೊ, ಮಾರಾ ಮನಕ್ಹೊಮಾಜ಼ ಮಿ ಘರ ಕರುಸ, ತ್ಯುನಾ ವಚ್ಮಾಜ಼ ಮಿ ಫರುಸ ತ್ಯುನೊನೆ ಮಿಜ಼ ಕ್ಹುದಾ ಥಯಲ ರ್ಹೌಸ, ತ್ಯುನೆ ಮನೆ ಪ್ರಜೆ ಥಾವಸ ಕೈನ ಕದ್ಯೊಸ. ತಿನಾಹುತಿ ಅನ್ಯ ಮನಕ್ಹೊನೆ ಛೊಡಿನ ಭಾರಾ ಆವೊ ತ್ಯುನಾಕ್ಹು ಬಿಜಾ಼ ಥೈನ ಜಿವ್ನಾ ಕರೊ ಕೆಟ್ಟ ರ್ಹಯಲನೆ ಮುಟ್ಯೊ ನಕೊ ಕೈನ ಕರ್ತಾ ಕದ್ಯೊಸ. ತೆನೈಸೊ ಮಿ ತುಮೊನೆ ಸ್ವಿಕಾರ ಕರಲಿನ ತುಮೊನೆ ಬಾ ಥೈನ ರ್ಹೌಸ; ತುಮೆ ಮನೆ ರಾಜಾ಼ ರಾಣಿಯೊ ಥಾವೊಸಿ ಕೈನ ಸರ್ವಶಕ್ತ ಥಯಲ ಕರ್ತಾ ಕವಸ.
Sikkiligar Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.