Olwimbo 2

1-Ncîbêrîre nshungululu y’e Saroni, Lisi y’e rubanda1.

2Kwo ali nka lisi omu marhadu omusîmwa wâni omu karhî k’abâna-hya.

3-Kwo ali nka mulehe ekarhî k’emirhi y’omu busâne, omuzigirwa2 wâni omu karhî k’abânarhabana. Ntamîre omu cizunguzungu câge nacîfinjaga, n’irehe lyâge liri linunu omu kanwa kâni.

4Andengerîze aha cengero, n’ecêrekanè anongerîzekwo, ye buzigire.

5Citûntume ca muzâbîbu mwandengezamwo hano, mumpembule n’irehe linjà, bulya ndi bufà n’obuzigire.

6Okuboko kwâge kulembe kwo nshegemire, n’okulyo kwo kunzonzire.

7-Banyere b’e Yeruzalemu mwe mukasinga, mwe mukalya empene mulye n’orhushafu rhw’emuzirhu, murhatule, murhazûse Musîmwa n’amango gâge g’okusîma garhacihika.

Ecîtakîro ca kabirhi

Omuhya

8Namâyumva Muzigirwa wâni; Nêci ye yishire; ayisha ahama oku ntondo, ayisha ashembuka orhurhondo.

9Muzigirwa wâni kwo ali nka kashafu, nka mutwîrà gwa kashafu. Lâba oku ayîmanzire enyuma ly’ecôgo cîrhu Adwîrhe alolera omu kabonezo, adwîrhe alolera omu murhule.

10Muzigirwa wâni amâlengeza izù amanyakûza3, erhi: «J’eno, Musîmwa wâni. Namwinja wâni, yisha».

11Lâba oku empondo4 yagezire, ensiku z’emidumbi zahwire, zagenzire.

12Omu ishwa lîrhu emyâka ekola yayâsa. Amango g’enyimbo5 z’obusîme gahisire, enyimbo z’engûkù zidwîrhe zashakanya omu ishwa lîrhu.

13Omutini gwamayâna amalehe marhanzi n’emizâbîbu eyâsize amauwa g’ehibayo hinjà. Yimanga, Musîmwa wâni, Namwinja wâni, yishaga.

14Ngûkù yâni nfulike omu migâku y’olukunda, omu ngobe y’amabâle, nyêreka obusù bwâwe, nyumvîsa izù lyâwe, bulyâla omulenge ojira gurhajira wundi, n’iranga lyâwe kwo na kwo.

15Mâshi murhugwârhire bala banyambwe6 mâshi, obwôla bunyambwe budwîrhe bwarhuyonera emizâbîbu n’obwo emizâbîbu ekola yayâsa!

16Muzigirwa wâni ali wâni, nâni ndi wâge. Mwo ayâbulire obusò bwâge omu karhî k’obwâso bwa lisi.

17Oku emboho y’obuce erhacishungûrha, n’oku omwizimya gurhacihirigirha, ogaluke… Muzigirwa wâni obè nka kashafu nka mutwîra gwa kashafu omu ntondo z’Ecihango7.