BIBLIYA NTAGATIFU OMU MASHI
Olwimbo 1
Izîno ly’ecitabu n’enshula-mwanzi
Olwimbo lw’Enyimbo. Lwa Salomoni.
Omuhya
Ayishe anûnugurhe n’ehinûnugurho hy’akanwa kâge.
Okusîmwa nâwe kwo kununu ah’idivayi.
Amavurha ocîshizire alà nka gahumula bwinjà!
izîno lyâwe ciru lyône, mavurha gadubuka,
co cirhuma abanyere bakusîma1.
«Onkeme nkushimbe, rhukanye!
Mwâmi ampesire omu mwâge;
We wâbà busîme na bushagaluke bwîrhu.
Okusîmwa nâwe kwarhulalusa kulusha idivayi2;
Bayazize abakusîma».
Ecîtakîro cirhanzi
Omuhya
Ndi mwîru ci ndi mwinjà3, wâni mwe banyere b’e Yeruzalemu,
kwo ndi aka amahêma g’e Kedari, aka ebihando by’e Shalma.
Murhalolaga omubiri gwâni mwîru, izûba eryo lyambabaga?
Bagala ba nyâmà4 abâla bandubiraga, banjira mulanzi wa mizâbîbu.
Elyani ishwa ly’emizâbîbu ntalilangaga!
Mbwîraga mâshi Muzigirwa w’omurhima gwâni:
ngahi wayâbulira obusò?
Ngahi waziyahula hano zirhenga omu izîko?
Lyo ntagija nageragera nka cirala
emunda amasò5 g’abinyu gayabukire.
Abimbiza
Akabà orhamanyiri wâni namwinja w’abakazi boshi6,
okulikire enshando z’obusò
onayabulire abâna-hene bâwe
entambi z’ebwa bigala by’abangere.
Omuhya-mulume
Wâni Musimwa wâni,
namâkushushanya na kahesi wâni
bashwekire oku ngâlè ya Faraoni mwâmi w’e Mîsiri!7
Amarhama gâwe nka gayinjiha
aha karhî k’ebisikiyo,
alà ehigosi ogwêrhe omu karhî k’amagerha.
Bisikiyo bya masholo8 rhwakulongeza
n’olugole lw’amarhale.
Bône na nnene: omuhya n’omuhya-mulume
Oku nnakuno ali omu côgo câge,
n’obukù bwâni bwayuduka.
Omuzigirwa wâni hiri hirhù hya bukù,
hidekerire aha karhî k’amabêre gombi.
Omuzigirwa ali cihadu ca mukû
omu ishwa ly’emizâbîbu y’e En-Gadi9.
-Alà nka wayinjiha, Muzigirwa wâni, alà nka wayinjiha!
Amasù gâwe ziri ngûkù
-Nka wayinjiha Muzigirwa wâni,
nka wanuna wâni! Encingo10 yîrhu ishamba.
-Emitungo y’enyumpa yîrhu eri ya nduluma
n’oburhungiri buli bwa nsindani.
Source notes (10)
- Footnote Omuhya: Israheli yeri muhya wa Nyamuzinda: naye Nyamuzinda yêne ye Muhya-Mulume.
- Footnote Abanyere go mashanja. Arhali Israheli yêne walolakwo Nyamuzinda obucire. Agandi mashanja goshi nago ye Muciza wago. -Nyamuzinda ye Mwâmi w’oluhaga lwâge. -Omu ka-Nyamuzinda k’e Yeruzalemu. -Banaderha mpu omuntu anayigurhe obusîme. Omu Mwandiko Mutagatîfu namwo banaderhe mpu obusîme bunalaluse nka mamvu.
- Footnote Ndi mwîru ci ndi mwinjà: -Israheli arhahezagya obwinjà bwâge ciru akabà ali omu bujà e Babiloni. -Kedari na Shalma, bishagala by’e Buharâbu. Amahêma g’abagendagenda omu irungu (babedwini), gabà gajizirwe n’empù z’empene ganabà mîru.
- Footnote Bagala ba nyâmà: Ngabo ya Bakaldeyi ba Nabukondonozori: bo bàshâbaga Yeruzalemu. Abakaldeyi bali bene wâbo Israheli bulya Abrahamu àli w’e Huri emwa Abakaldeyi ( Murh 11, 28.31 ). -Bujà bw’e Babiloni. -Israheli oyo obujà bwakulaga aha mwâge, bwamuheka emwa bene.
- Footnote -Muzigirwa w’omurhima gwâni, nk’omuhya ye waderha -Nyamubâho ye Lungere wa Israheli. -Agandi masô, go gandi mashanja.
- Footnote Israheli, ishanja lîshogwa. Namwinja w’abakazi boshi ye Israheli, ishanja lîshogwa.
- Footnote Obujà bw’e Babiloni bushushine na bulya bw’e Mîsiri.
- Footnote Okuyambikwa ebisikiyo bihyâhya kuli kuyêrekwa oburhonyi: akolaga aleka ebi ali agwêrhe amango ali mujà, ayambale ebihyâhya. Rhulole muli Luk 15, 22 .
- Footnote Olwo lugo kwo luderhwa buno mpu ye «Ain Djidi», omu iderha ly’Abaharâbu, ebwa Nyanja y’Omunyu. -Obusò n’abâna-hene, gwo muzinzi gw’abajà erhi aharhenga bujà. -Ntondo ya Siyoni yo abâmi b’Israheli bayûbakagakwo.
- Footnote Encingo, co cihugo ca Palestina-Israheli, cihugo cigishe, cirya ciyêramwo ngasi hyasi na ngasi lushogo.
BIBLIYA NTAGATIFU OMU MASHI. Copyright © 2024 BUKAVU Mashi and other Kivu Languages Bible. Licensed under CC BY 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY 4.0 · SourceEdition imported 2026-10-25.