BIBLIYA NTAGATIFU OMU MASHI
Olwimbo 3
Aha ngwîshîre, budufu, namàlonzagya omuzigirwa w’omurhima gwâni, namâlonzagya ci lêrhaga!
Nkolaga nayimuka ngeragere omu lugo1! Omu njira n’omu ngo, nalongezamwo olya omurhima gwâni guzigira. Namulonzize ci ntamubwîne!
Abalâlizi bambuganyire, balya bagera-gera omu lugo: «Nti ka murhabwîne olyâla omurhima gwâni guzigira?».
Ene mbà namâbarhaluka, namabugâna olyâla omurhima gwâni guzigira. Namâmugwârha ntanacimulîke, kuhika nmuhise omu nyumpa ya nyâmà2, omu mw’olya muzîre wamburhaga.
Omuhya-mulume:
Banyere b’e Yeruzalemu mwe mukasinga, mwe mukalya empene n’orhushafu rhw’emuzirhu, murhatule, murhatule Musimwa wâni n’ensa y’okushâsha kwâge erhacihika.
Ecîtakîro ca kasharhu
Kabala-myanzi
Lêro cici cira casôka omu irungu nka mugî mulî-mulî3, nka mûka mudûrhu gwa bukù, obubâni n’amalâshi g’ekulî goshi!
Lâba ecipoyi ca Salomoni4, bambali makumi gali ndarhu bamugosire, ntwâli za muli bene-Israheli.
Boshi, balenga ba kuhuma engôrho, balwî ba kurhenga mîra. Ngasi muguma ahizire engôrho oku cikanyi mpu bakanarhêrwa budufu.
Mwâmi Salomoni abinjisize entebe5 y’obwâmi n’omurhi gw’e Libano.
Emitungo y’eyo ntebe eri ya marhale n’olulenga lwâyo lwa masholo, ecibwârhalo ciri ca kaduku na nyamwegemerwa wayo wa kaduku.
Mwe banyere b’e Siyoni mukanye mubone: Mwâmi Salomoni ayambîrhe ishungwè6 nnina amuyambikaga olusiku lw’obuhya bwâge, olusiku lw’obusîme bw’omurhima gwâge.
Source notes (6)
- Footnote Lugo lwa Yeruzalemu olwôla; kulya kubà banyere b’e Yeruzalemu bayakûzibwe, na Ka-Nyamuzinda k’e Yeruzalemi badwîrhe haderha ( 1, 4.17; 3, 4; 5, 10-16 ).
- Footnote «Omu mwa nnina», kwo kuderha omu «ka-Nyamuzinda», k’e Yeruzalemu; Bene-Israheli barhanzi, balya bàyûbakaga aka-Nyamuzinda abôla adesire mpu nnina! Omu «hatagatîfu-hatagatîfu».
- Footnote Omugî mulî-mulî cibà cimanyîso ciyêrekîre aha Nyamuzinda ali. ( Lub 13, 22 ). Omu lubungo lwa kabirhi, Nyamuzinda yêne ogalwîre abâli bahêsirwe bujà ( Iz 40, 3 ). Abarhunzi b’omu Israheli bàkagijà malashi cingana e Buharâbu n’emwa Abahindi ( Eze 17, 4; 27, 13-25 ).
- Footnote Eri izîno «Shalomô», (Salama), kwo liri nka kula rhwakaderha «Murhûla» omu mashi. Abâli omu bujà bakazagiringa oku «omurhûla» gwâyisha obujà buhwa ( Iz 11, 6; 9, 5-6; Eze 34, 23-25 ). Salomoni bàdesire aha, arhali olya murhanzi, ci omwâmi wayisha n’omurhûla: Masiha.
- Footnote Bakengezize enyumpa Salomoni akazâgitwîramwo emmanja n’entebe akazâgitamalakwo ago mango.
- Footnote Mpu balole oku bayîmika omwâmi w’omurhûla: Masiha. Oyo nnina wa mwâmi, lwo lubaga lwa Nyamubâho ( 1, 5; 3, 4 ). Omu Israheli, mwâmi arharhangira omukolo n’olubaga lu rhacimuyankirira, ciru akahà Nyamuzinda yêne wacimwishogaga ( 1 Sam 11, 5; 1 Nga 11, 10; 29, 22 ). Olwo lusiku lw’obuhya, lwo lusiku lw’okugaluka kw’omukazi wali ogenzire; lwa kushubirhona kw’owali wamâshombehala: okwo kwabà omu mango ga Masiha ( Iz 61, 10; 62, 3-5 ).
BIBLIYA NTAGATIFU OMU MASHI. Copyright © 2024 BUKAVU Mashi and other Kivu Languages Bible. Licensed under CC BY 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY 4.0 · SourceEdition imported 2026-10-25.