Lulanga lwa 81

Omulâli gw’olusiku lukulu

1Gwârhi omukulu w’abimbiza. Luyimbwa aka Gati. Lwa Azafi.

2Mukanye muhindire Nyakasane, Mufungizi orhufungira, mukanye mukuze Nyamuzinda wa Yakôbo.

3Mukomere ennanga murhimbe n’engoma, muvuze enzenze na hirya hirhêra hilongîre.

4Mudumûle omushekera buno omwêzi gwacibaluka, muguhiremwo amarhama hano omwêzi gucêrwa, nêci muvuze omushekera mwa luno lusiku lwîrhu.

5Bulyâla kuli Israheli liri irhegeko eryo, irhegeko lya Nyamuzinda wa Yakôbo.

6Eryôla irhegeko yêne walihâga Yozefu, amango àrhengaga omu cihugo c’e Mîsiri. Iderha ntâl’ishubig’iyumva naliyumva obwo:

7Mpu: «Nie nalîkûzagya ecirhugo câwe oku mucîmba, n’okuboko kwâwe nakurhenza oku birhimbiri».

8Amango wali omu malibuko wanyâkûza nakulîkûza, amango wali omu citù cakungula nakushuza, nanakurhangulira aha mîshi ga Meriba.

9Lubaga lwâni yumva nkuhanûle, mâshi Israheli nyumva mâshi!

10Irhondo orhahîraga okahandîsa wundi wundi nyamuzinda omu mwâwe, orhahîraga okagashâniza nyamuzinda w’embuga.

11Niene nie Nnâmahanga, nie Nyamuzinda wâwe, niene nie nakurhenzagya omu cihugo c’e Mîsiri: bumbûla akanwa kâwe nkuvangulire.

12Ci kwône olubaga lwâni lwôhe lurhayumvagya izù lyâni, Israheli naye àrhanyumvagya.

13Okwo, kwarhuma nabahanira obudârhi bw’omurhima gwâbo, nti bashenye ezi bâgala.

14Olubaga lwâni lucinyumvagya wâni! Israheli acishimbaga enjira zâni wâni!

15Kano kanya nali nakabya abashombanyi bâge, nali nabakubûlira okuboko kwâni niene.