Lulanga lwa 80

Omusengero gw’okushub’ishakûlula Israheli

1Gwârhi omukulu w’abimbiza. Luyimbwa aka «Amarhegeko ga Nyakasane». Lwa Azafi. Lulanga.

2We mungere oyâbula Israheli, orhuyumve nîrhu, we kombêra Yozefu nka busô, we tamala enyanya za ba-Kerubi.

3Omolekere Efrayimu na Benyamini na Menashè. otule obuhashe bwâwe butulûke, onayishe lyo rhulobôka.

4Nnâmahanga mâshi orhudâhye, onarhuyêrekeze obusù burhulwîre lyo rhucira.

5Nnâmahanga w’emirhwe mangaci waleka okubêyûla, n’olubaga lwâwe ludwîrhe lwakushenga?

6Waluyikuzizagye omugati gw’emirenge, wanalunywesa endubudubu y’emirenge mushâna!

7Warhumirage rhwabà igwârhiro lya kadali oku balungu bîrhu, n’abashombanyi bîrhu barhushekîre barhama.

8Nnâmahanga w’emirhwe, mâshi orhugalule, onarhuyêrekeze obusù burhulwîre lyo rhucira.

9Omuzâbîbu erhi guli e Mîsiri wagumânyula, amashanja wagalibirhakwo wagubarha.

10Wagukombêra gwône gwône, gwamina gwagandâza gwabumba igulu.

11Entondo zayumva empehema yagwo, n’enduluma za Nyamuzinda zayumva gwazilandirirakwo.

12Gwagandâza gwahuma oku nyanja, gwahika n’oku lwîshi.

13Lêro cici carhumirage wagushâbira ecôgo, mpu lyo ngasi wagera omu njira aguhagulakwo?

14Mpu lyo enshenge y’erubala eguyôna, n’ensimba z’emuzirhu ziguyâbukekwo?

15Hindamuka Nnâmahanga w’emirhwe, hindamuka olîke amasù kurheng’emalunga obone, onayishe orhandûle ogu muzâbîbu.

16Ogulange we Nnagwo, kuboko kwâwe kwagugwikaga, hyàli hirhi, wêne wahihà obuzibu.

17Mâshi balya bàdûlikaga ogu muzâbîbu muliro banaguhira okw’idaho, bahungumuke n’obukali bw’obusù bwâwe mâshi!

18Okuboko kwâwe kubêre kuli olya mulume w’aha kulyo kwâwe, olya mwene omuntu wazibuhagya wêne.

19Lêro rhurhakacikurhengakwo bundi, orhulange bagumagumà, rhuyîsh’icîtakîra izîno lyâwe,

20Nyamwagirwa Nnâmahanga w’emirhwe mâshi orhudâhye orhuyêrekeze obusù burhulwîre lyo rhucira.