رومیوں

رومیاں دے ناں پولُس رسُول دا خط

پیش لفظ

پولُس رسُول ایہ خط رُوم شہر دے اِیمانداراں کُوں لِکھیا۔ ایہ خط نجات دے اُوں رستے کُوں ظاہر کریندے جیہڑا خُدا انسان کیتے بنڑایا۔ پہلے چار باب ءچ انسان دی وِگڑی حالت کُوں ظاہر کیتا گئے جو یہُودی تے غیر یہُودی سبھ لوک گُنہگار تے ابدی سزا دے لائق ہِن۔ پر مسیح آپنڑی جان سبھ دے کفارے کیتے ڈِتی، تے نتیجے ءچ جڈاں لوک اُوندے اُتے اِیمان گِھن آندے ہِن تاں خُدا اُنہاں کُوں معاف کریندے۔ وَل او خُدا دے دُشمنڑ نئیں راہندے بلکہ مسیح دے بندے ہوندے ہوئے خُدا دی نظر ءچ راستباز یعنی نیک تے مقبول کھڑائے ویندے ہِن۔

پنجویں باب تُوں اَٹھویں باب تئیں پولُس رسُول بیان کریندے جو اِیمان گِھن آوݨ آلیاں کُوں گُناہ دی طاقت تُوں رہائی، ہِک نوِیں زندگی تے بہُوں ساریاں بئیاں برکتاں مِلدیاں ہِن۔ نؤیں باب تُوں یارہویں باب تئیں پولُس رسُول جیہڑا خود یہُودی قوم ءچوں ہا، یہُودی لوکاں اُتے افسوس کریندے جِنہاں یسُوع مسیح تے اُوندی نجات کُوں رَد کیتا، پر اُنہاں کیتے اجنڑ وی اُمید ہے۔ بارہویں باب تُوں سولہویں باب تئیں پولُس رسُول بیان کریندے جو اِیمانداراں کُوں عملی طور تے کِینویں زندگی گُزارنڑی چاہیدی ہے۔