لُوقا 2

یسُوع دی پیدائش

1اُنہاں ڈینہاں ءچ اِینویں تھیّا جو رومی بادشاہ قیصر اَوگُوستُس دی طرفوں ایہ حُکم جاری تھیّا جو رومی سلطنت دے سارے لوکاں دے ناں لِکھے ونجنڑ۔ 2ایہ پہلی مردم شماری سُوریہ دے گورنر کورنِیُس دے دور ءچ تھئی۔ 3تے سبھ لوک ناں لِکھواوݨ کیتے آپنڑے آپنڑے شہر کُوں گئے۔

4بس کیوں جو یُوسف داؤد دے گھرانڑے تے اولاد ءچوں ہا، اِیں واسطے او گلیل دے شہر ناصرت تُوں یہُودیہ ءچ داؤد دے شہر بیت لحم کُوں گِیا، 5تاں جو آپنڑی منگیتر1 مریم نال جیہڑی حاملہ ہئی، ناں لِکھواوے۔ 6جِیں ویلے او اُتھاں ہَن تاں مریم دے بال جمنڑ دا وقت آ گِیا، 7تے اُوندا پلوٹھا پوتر جمیا۔ اُوں اُونکُوں کپڑے ءچ ولھیٹ تے کُھرلی ءچ رکھ ڈِتا کیوں جو اُنہاں کیتے سراں ءچ جاہ نہ ہئی۔

آجڑی تے فرشتے

8اُوں علاقے ءچ کُجھ آجڑی ہَن جیہڑے رات کُوں میدان ءچ رہ تے آپنڑے اِجڑ دی رکھوالی کریندے پئے ہَن۔ 9رب دا ہِک فرشتہ اُنہاں اُتے ظاہر تھیّا تے رب دا جلال اُنہاں دے چودھارُوں چمکیا تے او بہُوں ڈر گئے۔ 10پر فرشتے اُنہاں کُوں آکھیا، ”ڈرو نہ، کیوں جو ڈیکھو مَیں تُہاکُوں وڈی خوشی دی بشارت ڈیندا ہاں جیہڑی ساری اُمت کیتے ہوسی۔ 11اَج داؤد دے شہر ءچ تُہاڈے کیتے ہِک نجات ڈیوݨ آلا پیدا تھئے جیہڑا المسیح تے خُداوند ہے۔ 12اُوندا تُہاڈے کیتے ایہ نشان ہے جو تُساں ہِک بال کُوں کپڑے ءچ ولھیٹیا تے کُھرلی ءچ پِیا ہویا پیسو۔“

13یک دم فرشتیاں دا ہِک گروہ اُوں فرشتے نال خُدا دی تعریف کریندا تے ایہ آدھا ظاہر تھیّا جو

14”سبھ تُوں اُچے اسمان اُتے خُدا دی تمجید ہووے

تے زمین اُتے اُنہاں لوکاں دی سلامتی جِنہاں تُوں او خوش ہے۔“

15جِیں ویلے فرشتے اُنہاں کولُھوں اسمان اُتے چلے گئے تاں آجڑیاں آپس ءچ آکھیا، ”آؤ بیت لحم جُلوں تے ایہ گالھ جیہڑی تھئی ہے تے جیندی خُداوند ساکُوں خبر ڈِتی ہے، ڈیکھوں۔“

16بس اُنہاں جلدی نال وَنج تے مریم تے یُوسف کُوں گولھ گِھدا تے اُوں بال کُوں کُھرلی ءچ پِیا ہویا ڈِٹھا۔ 17تے اُنہاں کُوں ڈیکھ تے او گالھ جیہڑی اُوں بال دے بارے ءچ آکھی گئی ہئی، مشہور کیتی۔ 18آجڑیاں دے گالھیں سُنڑ تے سارے لوک حیران تھئے۔ 19پر مریم اِنہاں سارے گالھیں کُوں آپنڑے دل ءچ رکھ تے غور کریندی ریہی۔ 20آجڑیاں کُوں جِینویں ڈسایا گِیا ہا، او اُونویں ای سبھ کُجھ ڈیکھ تے، تے سُنڑ تے خُدا دی تعریف کریندے ہوئے واپس وَل گئے۔

یسُوع دا ناں رکھیا ویندے

21جِیں ویلے اَٹھ ڈینہہ پُورے تھئے تے بال دے ختنہ کراوݨ دا وقت آیا تاں اُوندا ناں یسُوع رکھیا گِیا جیہڑا فرشتے مریم کُوں حاملہ تھیوݨ کنُوں پہلے ڈسیا ہا۔

یسُوع کُوں ہیکل ءچ پیش کیتا ویندے

22وَل جِیں ویلے مُوسیٰ دی شریعت دے مطابق اُنہاں دے پاک تھیوݨ دے ڈینہہ پُورے تھی گئے تاں یُوسف تے مریم بال کُوں یروشلیم گِھن آئے تاں جو اُونکُوں خُداوند دے حضُور پیش کرݨ، 23جِینویں خُداوند دی شریعت ءچ لِکھیا ہے جو ”ہر ہِک پلوٹھا رب کیتے مخصوص کیتا ویسی،2“ 24تے خُداوند دی شریعت دے اِیں قول دے مطابق قُربانی کرݨ جو ”گُھگیاں دا ہِک جوڑا یا کبوتر دے ڈُو بچّے گِھن آؤ3۔“

25یروشلیم ءچ ہِک بندہ ہا جِیندا ناں شمعون ہا۔ او نیک، خُدا ترس تے اِسرائیل دی نجات دا اِنتظار کریندا پِیا ہا تے رُوح القُدس اُوندے اُتے ہا۔ 26رُوح القُدس اُونکُوں ڈسا ڈِتا ہا جو تُوں اُوں ویلے تئیں نہ مرسیں جئیں تئیں تُوں خُداوند دے المسیح کُوں ڈیکھ نہ گِھنیں۔ 27او رُوح القُدس دی ہدایت نال ہیکل ءچ آیا، تے جیہڑے ویلے ماء پِیُو اُوں بال یسُوع کُوں اندر گِھن آئے تاں جو اُوندے کیتے شریعت دے فرائض ادا کرݨ، 28تاں شمعون بال کُوں آپنڑی جھولی ءچ گِھن گِھدا تے خُدا دی حمد کر تے آکھنڑ لگا جو

29”مالک! تُوں آپنڑے وعدے دے مطابق

ہُنڑ آپنڑے خادم کُوں سلامتی نال رُخصت کر۔

30کیوں جو میڈے اکھیں تیڈی نجات ڈیکھ گِھدی ہے

31جیہڑی تُوں سبھ قوماں دے سامنڑے تیار کیتی ہے،

32تاں جو او غیر قوماں کُوں روشنی ڈیوݨ آلا نُور

تے تیڈی اُمت اِسرائیل دا جلال بنڑے۔“

33بال دا پِیُو تے اُوندی ماء اِنہاں گالھیں پارُوں جیہڑیاں اُوندے حق ءچ آکھیاں ویندیاں ہَن حیران تھیندے ہَن۔ 34شمعون اُنہاں کیتے دُعائے خیر کیتی تے اُوندی ماء مریم کُوں آکھیا، ”ایہ بال اِسرائیل ءچ بہُوں سارے لوکاں دے ڈھاوݨ تے کھڑے تھیوݨ کیتے مقرر تھئے۔ او ایجھا نشان ہوسی جیندی مخالفت کیتی ویسی، 35تاں جو بہُوں سارے لوکاں دے دِلاں دے خیال ظاہر تھی ونجنڑ، بلکہ تیڈی جان ءچوں وی تلوار لنگھ ویسی۔“

36اُتھاں ہِک نبِیّہ وی ہئی یعنی فنُوایل دی دِھی حنّاہ، جیہڑی آشر دے قبیلے ءچوں ہئی۔ او بہُوں بُڈھی ہئی تے سَت سال تئیں آپنڑے پئے نال ریہی، وَل اُوندا پایا مر گِیا۔ 37ہُنڑ او بیوہ تھی تے چُوراسی (84) سال دی تھی گئی ہئی تے ہیکل کُوں نہ چُھوڑیندی ہئی بلکہ ڈینہہ رات روزہ رکھ تے دُعا تے عبادت کریندی راہندی ہئی۔ 38او اُوں ویلے اُنہاں دے کولھ آ تے خُدا دا شُکر کرݨ لگی، تے اُنہاں ساریاں نال جیہڑے یروشلیم دی رہائی دے منتظر ہَن، اُوندے بارے ءچ گالھیں کرݨ لگی۔

مریم تے یُوسف دی ناصرت واپسی

39جِیں ویلے اُنہاں رب دی شریعت دے مطابق سبھ کُجھ کر گِھدا تاں گلیل ءچ آپنڑے شہر ناصرت کُوں وَل گئے۔ 40تے او چھوہر ودھدا تے قوت پَیندا گِیا تے حِکمت نال بھریندا گِیا تے خُدا دا فضل اُوندے اُتے ہا۔

یسُوع ہیکل ءچ

41یسُوع دے ماء پِیُو ہر سال عید ِ فسح کیتے یروشلیم ویندے ہَن۔ 42جِیں ویلے او بارہاں سال دا تھیّا تاں او عید دے دستور دے مطابق یروشلیم گئے۔ 43جڈاں عید دے ڈینہہ پُورے تھئے تاں اُوندے ماء پِیُو گھر وَل گئے پر او چھوہر یسُوع یروشلیم ءچ رہ گِیا تے اُنہاں کُوں پتہ نہ ہا۔ 44اُوندے ماء پِیُو ایہ سوچ تے جو او قافلے ءچ ہے، ہِک ڈینہہ دا سفر کر تے اُونکُوں آپنڑے رشتہ داراں تے جاݨ پچھاݨ آلیاں ءچ گولھنڑ لگے۔ 45پر جِیں ویلے او نہ مِلیا تاں اُونکُوں گولھیندے گولھیندے یروشلیم واپس چلے گئے۔ 46ترے ڈینہہ بعد اُنہاں اُونکُوں ہیکل ءچ عالماں دے وچال بیٹھے، اُنہاں دی سُنڑدے تے اُنہاں نال سوال کریندے ڈِٹھا۔ 47تے جِتنے لوک اُوندی سُنڑدے پئے ہَن، اُوندی سمجھ تے اُوندے جواباں پارُوں حیران ہَن۔ 48اُوندے ماء پِیُو اُونکُوں ڈیکھ تے حیران تھئے تے اُوندی ماء اُونکُوں آکھیا، ”پوتر! تَیں ساڈے نال اِینویں کیوں کیتے؟ ڈیکھ تیڈا پِیُو تے مَیں فِکر مند تھی تے تیکُوں گولھیندے پئے ہسے۔“

49یسُوع اُنہاں کُوں آکھیا، ”تُساں میکُوں کیوں گولھیندے پئے ہَوے؟ کیا تُہاکُوں پتہ نہ ہا جو میکُوں آپنڑے باپ دے گھر ہووݨ لازم ہے؟“ 50پر او اُوندی گالھ نہ سمجھے۔

51وَل او اُنہاں نال روانہ تھی تے ناصرت ءچ آیا تے اُنہاں دے تابع ریہا۔ اُوندی ماء ایہ سارے گالھیں آپنڑے دل ءچ رکھیاں۔ 52تے یسُوع حِکمت تے قد ءچ ودھدا گِیا تے خُدا تے اِنسان دی نِگاہ ءچ مقبول تھیندا گِیا۔