2کُرِنتھِیوں 3

نویں عہد دے خادم

1کیا اساں وَل آپنڑی تعریف دا ڈھنڈورہ پِٹنڑ لگ ونجُوں؟ کیا ساکُوں کُجھ لوکاں وانگُوں تُہاڈے کولھ سفارشی چِٹھیاں گِھن آوݨ یا تُہاڈے کنُوں گِھن ونجنڑ دی ضرورت ہے؟ 2نئیں، تُساں خود ساڈی چِٹھی ہیوے، جیہڑی ساڈے دِلاں اُتے لِکھی پئی ہے۔ اِینکُوں سبھ لوک جانڑدے تے پڑھدے ہِن۔ 3ایہ صاف ظاہر ہے جو تُساں مسیح دی او چِٹھی ہیوے جیہڑی اُوں ساڈی خدمت دے ذریعے لِکھی ہے۔ او چِٹھی مَس نال نئیں بلکہ زندہ خُدا دے رُوح القُدس نال لِکھی گئی ہے، پتھر دیاں تختیاں اُتے نئیں بلکہ اِنسانی دِلاں دیاں تختیاں اُتے۔

4مسیح دے ذریعے خُدا اُتے ساڈا ایجھا ای بھروسا ہے۔ 5ایہ گالھ نئیں جو ساڈے ءچ کوئی لیاقت ہے جو اساں خود کُجھ کرݨ دا دعویٰ کر سگوں بلکہ ساڈی لیاقت خُدا دی طرفوں ہے، 6جئیں ساکُوں نویں عہد دے خادم ہووݨ دے لائق وی بنڑایا ہے۔ ایہ عہد لِکھے ہوئے حُکماں اُتے نئیں بلکہ رُوح اُتے قائم ہے کیوں جو لِکھے ہوئے حُکم مار سٹیندے ہِن1 پر رُوح القُدس زندگی ڈیندے۔

نویں عہد دا جلال

7جِیں ویلے او موت گِھن آوݨ آلا نِظام جیندے الفاظ پتھر دیاں تختیاں اُتے لِکھے گئے ہَن، ایجھا جلالی ہا جو بنی اِسرائیل کُوں مُوسیٰ دے چہرے دے نُور کُوں ڈیکھنڑ دی تاب نہ ہئی بھانویں جو او نُور گھٹدا ویندا ہا، 8تاں رُوح القُدس دے نِظام دا جلال اُوں کنُوں کِتنا زیادہ ہوسی؟ 9جِیں ویلے قصُوروار کھڑاوݨ آلا نِظام جلالی ہا، تاں راستباز کھڑاوݨ آلا نِظام کِتنا زیادہ جلالی ہوسی۔ 10بلکہ پہلے نِظام دا جلال، اِیں زیادہ جلالی نِظام دے مُقابلے ءچ ہُنڑ غیر جلالی لگدا ہے۔ 11کیوں جو جڈاں مِٹ ونجنڑ آلا نِظام جلالی ہا تاں ہمیشاں تئیں قائم راہنڑ آلا نِظام بہُوں زیادہ جلالی ہوسی۔

12بس ایجھی اُمید رکھیندے ہوئے اساں بہُوں دلیر ہیں۔ 13اساں مُوسیٰ وانگُوں نئیں جئیں آپنڑے چہرے اُتے نقاب کر گِھدا تاں جو بنی اِسرائیل اُوں مِٹ ونجنڑ آلے جلال کُوں نہ ڈیکھ سگنڑ۔ 14اُنہاں دے ذہن سخت تھی گئے تے اَج تئیں پُرانڑے عہد دیاں کتاباں پڑھدے ویلے اُنہاں دے دل اُتے پڑدہ پِیا راہندے۔ ایہ پڑدہ صرف مسیح دے وسیلے نال چاتا ویندے۔

15اَج تئیں جڈاں وی مُوسیٰ دی کتاب پڑھی ویندی ہے، اُنہاں دے دل اُتے پڑدہ پِیا راہندے۔ 16پر جِیں ویلے کہیں دا دل خُداوند دو رجُوع کریسی تاں او پڑدہ ہٹا ڈِتا ویسی۔ 17کیوں جو خُداوند رُوح ہے تے جِتھاں خُداوند دا رُوح القُدس ہے اُتھاں ازادی ہے۔ 18اِیں واسطے شیشے آلی کار اساں ساریاں دے بے نقاب چہریاں تُوں خُداوند دا جلال ظاہر تھیندے تے اساں خُداوند دے رُوح القُدس دے وسیلے نال آہستہ آہستہ اُوندی جلالی صورت ءچ بدلدے ویندے ہیں۔