1کُرِنتھِیوں 12

رُوح القُدس دیاں نعمتاں

1بِھراؤ! مَیں نئیں چاہندا جو تُساں رُوحانی نعمتاں دے بارے ءچ بے خبر راہو۔ 2تُساں جانڑدے ہیوے جو جیہڑے ویلے تُساں غیر اِیماندار ہَوے تاں تُساں گُونگے بُتاں دے پِچُھوں ٹُردے ہَوے، جِینویں وی کوئی تُہاکُوں گِھن ویندا ہا۔ 3اِیں واسطے مَیں تُہاکُوں سمجھاوݨ چاہندا ہاں جو جیہڑا بندہ خُدا دے رُوح القُدس دی ہدایت نال گالھ کریندے، او کڈھائیں وی ”یسُوع اُتے لعنت“ نئیں کر سگدا، تے کوئی وی رُوح القُدس دی ہدایت دے بغیر نئیں آکھ سگدا جو ”یسُوع خُداوند ہے۔“

4نعمتاں تاں طرحاں طرحاں دیاں ہِن، پر رُوح القُدس ہِکو ہے۔ 5خدمتاں وی طرحاں طرحاں دیاں ہِن، پر خُداوند ہِک ای ہے۔ 6خُدا دے کم طرحاں طرحاں دے ہِن، پر خُدا ہِک ای ہے جیہڑا ساریاں ءچ ہر طرحاں دا اثر پیدا کریندے۔ 7ہر بندے ءچ رُوح القُدس دا اِظہار ہِک ڈُوجھے دے فائدہ کیتے ہے۔ 8کہیں کُوں رُوح القُدس دی طرفوں حِکمت نال بھریا ہویا کلام ڈِتا ویندے تے کہیں کُوں اُونہئی رُوح دے وسیلے علم نال بھریا ہویا کلام۔ 9کہیں کُوں اُونہئی رُوح نال اِیمان1 دی تے کہیں کُوں شِفا ڈیوݨ دی نعمت مِلدی ہے۔ 10کہیں کُوں معجزے ڈِکھاوݨ دی قُدرت، تے کہیں کُوں نبُوّت2 کرݨ دی، کہیں کُوں رُوحاں دا اِمتیاز3 کرݨ دی، کہیں کُوں طرحاں طرحاں دیاں زباناں بولنڑ دی، تے کہیں کُوں زباناں دا ترجمہ کرݨ دی توفیق مِلی ہے۔ 11ایہ ساریاں نعمتاں اُوہو ہِک ای رُوح القُدس ڈیندے تے ہر ہِک کُوں آپنڑی مرضی دے مطابق ونڈیندے۔

ہِک جِسم پر بہُوں سارے اَنگ

12جِینویں اِنسانی بدن ہِک ہے تے اُوندے بہُوں سارے اَنگ ہِن تے او سبھ اَنگ رَل تے ہِک بدن بنڑیندن، اُونویں ای مسیح دا بدن وی ہے۔ 13کیوں جو اساں ساریاں بھانویں یہُودی ہیں یا یُونانی، بھانویں غُلام ہیں یا ازاد، ہِکو رُوح دے وسیلہ نال ہِک بدن تھیوݨ کیتے بپتسمہ گِھدے، تے ساکُوں ساریاں کُوں ہِکو رُوح القُدس مِلیا ہے۔

14بس بدن ہِک اَنگ نال نئیں بلکہ بہُوں سارے انگاں نال بنڑدے۔ 15جے پیر آکھے، ”کیوں جو مَیں ہتھ نئیں اِیں واسطے بدن دا حصہ کائنی،“ تاں او اِیں وجہ کنُوں بدن تُوں اَنج تاں نئیں۔ 16تے جے کَن آکھے، ”کیوں جو مَیں اکھ نئیں اِیں واسطے بدن دا حصہ نئیں،“ تاں او اِیں وجہ کنُوں بدن تُوں اَنج تاں نئیں۔ 17جے سارا بدن اکھ ای ہوندا تاں سُنڑدا کِتھوں؟ جے سارا بدن کَن ای ہوندا تاں سُنگھدا کِتھوں؟ 18پر سچ ایہ ہے جو خُدا ہر اَنگ کُوں بدن ءچ آپنڑی مرضی دے مطابق رکھیا ہے۔ 19جے او سارے ہِکو ای اَنگ ہوندے تاں بدن کِتھاں ہوندا۔ 20پر اصل ءچ اَنگ تاں بہُوں ہِن پر بدن ہِکو ای ہے۔

21اکھ ہتھ کُوں نئیں آکھ سگدی جو ”میکُوں تیڈی ضرورت نئیں،“ تے نہ سر پیراں کُوں آکھ سگدے جو ”میکُوں تیڈی لوڑ کائنی۔“ 22بلکہ بدن دے او اَنگ جیہڑے ڈُوجھیاں دی نسبت بہُوں کمزور لگدے ہِن، او زیادہ ضروری ہِن۔ 23تے او اَنگ جِنہاں کُوں اساں ڈُوجھے انگاں کنُوں گھٹ عزت دے لائق سمجھدے ہیں، اُنہاں کُوں زیادہ عزت ڈیندے ہیں تے جِنہاں کُوں لُکا تے رکھیندے ہیں، اُنہاں کُوں زیادہ اہمیت ڈیندے ہیں۔ 24پر جیہڑے اَنگ لُکائے نئیں ویندے، اُنہاں کُوں اِیندی لوڑ کائنی۔ پر خُدا بدن کُوں اِینویں بنڑائے جو گھٹ عزت آلیاں کُوں زیادہ عزت ڈِتی ونجے، 25تاں جو بدن ءچ تفرقہ نہ ہووے بلکہ اَنگ ہِک ڈُوجھے دی برابر فِکر رکھنڑ۔ 26جے بدن دا ہِک اَنگ ڈُکھدے تاں سارے اَنگ اُوندے نال ڈُکھدے ہِن۔ تے جے ہِک اَنگ کُوں عزت مِلدی ہے تاں سارے اَنگ اُوندے نال خوشی منیندے ہِن۔

27بس تُساں رَل تے مسیح دا بدن ہیوے تے کلھے کلھے اُوندے اَنگ ہیوے۔ 28تے خُدا کلیسیا ءچ پہلے رسُول، ڈُوجھے نبی، تریجھے اُستاد، وَل معجزے ڈِکھاوݨ آلے، وَل شِفا ڈیوݨ دی نعمت آلے، مددگار، اِنتظام چلاوݨ آلے، تے طرحاں طرحاں دیاں زباناں بولنڑ آلے مقرر کیتے۔ 29کیا یکے رسُول ہِن؟ کیا یکے نبی ہِن؟ کیا یکے اُستاد ہِن؟ کیا یکے معجزے ڈِکھاوݨ آلے ہِن؟ 30کیا ساریاں کُوں شِفا ڈیوݨ دی نعمت مِلی ہے؟ کیا سارے طرحاں طرحاں دیاں زباناں بُولیندے ہِن؟ کیا سارے اِنہاں زباناں دا ترجمہ کریندے ہِن؟ 31پر تُساں اعلیٰ نعمتاں گِھننڑ دی سِک ءچ راہو۔

پر ہُنڑ مَیں تُہاکُوں سبھ تُوں چنگا طریقہ ڈسیندا ہاں۔