Santhali Project
आपोस का़मि 9
सा़उलाक् जियोन बोदोलोक्कान
मेनखान सा़उल दो उन हा़बिच् प्रोभुरेन चेलाको धोमकाव आर खुखुन रेयाक्ए किसकिसा़उ बाड़ायकान ताहेंकाना, आर उनि दो माराङ नायके ठेने चालावेना। आर दामेसेक रेयाक् सुना़गोगरेनको ञुतुमते चिठिये कोयकेदा, जेमोन ओना होररेन जाहाँयगेये ञामलेको खान, बाङ दो हेरेल होपोनको, बाङ दो मायजिउको, तोलकाते जेरुसालेमतेये आ़गुको।
आर चालाक् चालाक्ते दामेसेक ठेने सोरेना। खान आचकागे सेरमा खोन मित्टेच् मारसाल उनि बेड़हायते बाम्बेरेना। आर ओतरे भिनदा़ड़ेनते मित्टेच् आड़ाङ मेतायकाने आँजोमकेदा, “ए सा़उल, ए सा़उल, चेदाक्एम खेदेञकाना?”
आदोए मेनकेदा, “ओकोय कानाम, प्रोभु?” खानगेये मेतादेया, “इञ दो जिसु का़ना़ञ, ओकोय आमेम खेदेञकान। मेनखान बेरेत्मे आर नागराहाते बोलोक्मे आदोको ला़इयामा चेत् चेका होयोक्तामा मेनते।”
आर उनि तुलुच् चालाक्कान ताहेंकान होड़ दोको तेङगो हापेयेना, एनते आड़ाङ माको आँजोमकेत् मेनखान चेले हों बाको ञेलेकान ताहेंकाना। आर सा़उल दो ओत खोने बेरेत्एना, आर मेंत्ए बेङगेत्केत् खान चेत् हों बाय ञेल दाड़ेयादा, आदो तिया़क्केदेते दामेसेकतेको इदि सेटेरकेदेया। आर पे माँहाँ बेगोर ञेञेलकानगेये ताहेंयेना, आर जोम हों बाय जोमलेत्आ आर ञु हों बाय ञुलेत्आ।
आर दामेसेकरे आनानिया़स ञुतुमान मित्टेन चेलाय ताहेंकाना, आर प्रोभु दो दोरसोनते उनिये मेतादेया, “ए आनानिया़स।”
आदोए मेनकेदा, “मेना़ञगेया नोक्ओंय ए प्रोभु।”
खानगे प्रोभु उनिये मेतादेया, “मा बेरेत्काते सोजहेको मेताक् कुलहिते चालाक्मे आर जिहुदा़ ओड़ाक्रे सा़उल ञुतुमान ता़रसुसरेन मित्टेच् होड़ खोजेमे एनते ञेलमे उनि दोए कोयजोङकाना, आरे ञेलआकादेया, आनानिया़स ञुतुमान मित्टेन होड़ बोलोकातेये चापो आकादेया, जेमोने ञेञेल।”
मेनखान आनानिया़से रोड़ रुवा़ड़केदा, “ए प्रोभु, आ़डि होड़ ठेन खोन नुय होड़ रेयाङ दोञ आँजोम आकादा, आमरेन सोनोतको जेरुसालेमरे तिना़क् बा़ड़िच्ए चेका आकात्कोवा; आर नोंडे दो माराङ नायकेको ठेन खोन एकतिया़रि मेनाक्ताया, आमाक् ञुतुम दोहायको सानाम तोलको ला़गित्”
मेनखान प्रोभु दो उनिये मेतादेया, “चालाक्मे एनते उनि दो बाछाव भाजान कानतिञाय, इञाक् ञुतुम जिहुदि बाहरेरेन होड़को आर रापाजको आर इसराएल होपोन सामाङरे इदि सेटेर ला़गित्। एनते इञगेञ उदुक्आया, इञाक् ञुतुम इया़ते तिना़क् दुख जोजोम होयोक्ताया मेनते।”
खान आनानिया़से चालावेना आर ओना ओड़ाक्तेये बोलोयेना, आर तिकिन चापोवादेतेये मेनकेदा, “बोयहा सा़उल प्रोभुइ कोल आकादिञा, उनि जिसुगे, ओने ओकोय आमेम हेच्एन होररे आम ठेने ञेल ओचोयेन, जेमोनेम ञेञेल आर सोनोत जिउतेम पेरेजोक्।” खानगे साटमेनते उनियाक् मेंत् खोन चुया़ँक् लेका फा़न्टिल ञुर गोत्एना, आरे ञेल रुवा़ड़केदा आर उनि दो बेरेत्एनतेये बा़प्तिस ओचोयेना, आर जोमकेत्तेये दाड़ेयेना।
सा़उल दामेसेकरेये पोरचारेत्
आर दामेसेकरे ताहेंकान चेलाको ठेन तिन उडिच् दिन चोय ताहेंयेना, आर बिन बिला़मते सुना़गोगकोरे जिसुइ ला़इ सोदोरकेदेया, बाङमा नुयगे इसोररेन होपोन दो।
आर आँजोमकेत् सानामको दो ठाकेनतेको मेनकेदा, “चेत् नुय दो उनि दोए बाङ काना, ओकोय जेरुसालेमरे नोवा ञुतुम दोक्हायकोय सानतावेत्को ताहेंकाना आर नोंडे हों नोवा मेनतेगेये हेच्लेन ताहेंकाना जेमोन ओनको तोलकाते माराङ नायके ठेने इदिको?”
मेनखान सा़उल दोए दाड़े इदियेना, आर दामेसेकरे बेरेलाकान जिहुदिकोय थारबासाव ओचोकेत्कोवा, उनिगे मा़सि कानाय मेनतेये सा़बुतात्कोवा।
आर ढेर दिन होयेन खान जिहुदिको उनि गोजेको मिलिमिसिया़वाना, मेनखान सा़उल दो ओनकोवाक् पोन्थाय बाडाय ञामकेदा। आर ओनको दो गोजेया मेनते फाटोककोरे सिञ ञिंदा़को पाहराआकायको ताहेंकाना, मेनखान उनिरेन चेलाको दो ञिंदा़ इदिकेदेते पा़चरि चोट खोन मित्टेन खा़चला़क्तेको फेड गोत्कादेया।
सा़उल जेरुसालेमरे
आदो सा़उल जेरुसालेमतेये सेटेरेन खान चेलाको तुलुच् सोङगेक्ए कुरुमुटुकेदा, आर सानाम होड़ सा़उलको बोतोरायकान ताहेंकाना, चेला कानाय मेनते बाको पा़तिया़उक्कान ताहेंकानते। मेनखान बारनाबास दो सा़उल ए सोङगेकेदेते आपोसतोलको ठेने इदि केदेया, आरे ला़इयात्कोवा चेत् लेका उनि दो होररे प्रोभुइ ञेललेदेया, आरे गालमारावादेया आर चेत् लेका दामेसेकरे जिसुवाक् ञुतुमते सोहोसातेये पोरचारलेत्आ आर जेरुसालेमरे ओनको तुलुच्ए बोलो ओडोकोक्कान ताहेंकाना, प्रोभुवाक् ञुतुमते सोहोसाते पोरचारे एहोप्एना। आर जुना़नि रोरोड़ जिहुदिको तुलुच्ए गालमाराव आरे का़फा़रिया़क्कान ताहेंकाना, मेनखान ओनको दो गोजे ला़गित्को गोटाकेदा। आदो बोयहाको ओनाको बाडाय ञामकेत् खान का़इसा़रिया़तेको इदि केदेया आर ता़रसुसतेको कोल गोत्कादेया
आर गोटा जिहुदा़ आर गा़लिल आर सा़मा़रिया़ रेयाक् का़लिसिया़रेनको दोको सुलुक निरा़येना, ओनेको बेनाव राकाप् इदिक्कान आर प्रोभु रेयाक् बोतोररेको ताड़ामेत् ताहेंकानते आर सोनोत जिउ रेयाक् सोहोत्तेको साङगे इदियेना।
पातरास लुड्डा़ आर जोप्पारे
आदो नोनका होयेना, पातरास गोटा टा़न्डिये दाँड़ाँआ़चुरेत् ताहेंकानरे, लुड्डा़रेको बेरेलाकान ताहेंकान सोनोत होड़को ठेन होंए हेच्एना। आर ओंडे दो एनिया़स ञुतुमान मित् होड़े ञाम केदेया, ओने उनि इरा़ल सेरमा खोन पारकोमरेये जाड़ावआकान ताहेंकाना, एनते मित् काड़ दो गोच्गेये ताहेंकाना। आर पातरास दो उनिये मेतादेया, ए एनिया़स जिसु मा़सिये बोगेयेत्मेया, मा बेरेत्मे आर आमाक् आटेत् सामटावताम, खानगे उनि दो साटमेनेतेये बेरेत् गोत्एना। आर लुड्डा़ आर सारोनरेनको, सानामको दो उनिको ञेल केदेया आर प्रोभु सेच्को आ़चुरेना।
आर जोप्पारे मित्टेच् मायजिउ चेलाय ताहेंकाना, ञुतुमताय दो ता़बिता, ओना दो जुना़नि तोरजोमाते दोरकास उनि दो भागे का़मिरे आर एमोक्रे हों किसा़ँड़े ताहेंकाना। आर ओनाको दिनरे उनि दोए रुवा़ का़हिलेनतेये गोच्एना, आदो उम साफाकेदेते मित्टेच् चेतान कांदहारेको दोहोकादेया। लुड्डा़ दो जोप्पा सोरगेया आर चेलाको दो आर पातरास ओंडे मेनाया मेनतेको आँजोमकेत् खान, बार होड़ उनि ठेन कोलकेत्किनतेको नेहोंरादेया, दे आलेठेन हेच् होदोक्मे। खानगे पातरास दो बेरेत्एनते उनकिन तुलुच्ए चालावेना, आर उनिये सेटेरेन खान चेतान कांदहातेको आ़युर राकाप् केदेया, सानाम रा़ँडि मायजिउको उनि ठेन तेङगोयेनते राक् राक्आते आङगरोप आर किचरिच्कोको उदुक्एत् ताहेंकाना। ओने ओनाको दोरकासे बेनावलेत्, ओनको तुलुच्ए ताहेंकानरे। मेनखान पातरास दो सानामको बाहरेतेये ओडोककात्कोवा, आर इखड़ुमकातेये कोयकेदा, आर मा़ँड़िं सेच् आ़चुरेनतेये मेनकेदा, ए ता़बिता मा बेरेत्मे। खानगे उनि दोए बेङगेत् राकाप्केदा आर पातरासे ञेलकेदे खाने बेरेत् दुड़ुप् एना। आदो ति साप्कातेये बेरेत् केदेया; आर सोनोतको आर रा़ँडि मायजिउको होहोवात्कोते जिवेत्गे ओनको सामाङरेये तेङगोकेदेया। आर ओना दो गोटा जोप्पारे बाडायेना, आर आ़डि होड़ प्रोभुरेको पा़तिया़वेना। आदो जोप्पारे मित्टेन हारता रेयाक्को का़क्मियिच् सिमोन ञुतुमान होड़ ठेन उनि दो ढेर दिने ताहेंयेना।
Santhali Project. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.