Santhali Project
आपोस का़मि 10
पातरास आर कोरनेलियुस
का़इसा़रिया़रे दो कोरनेलियुस ञुतुमान मित् होड़े ताहेंकाना, इटा़लिया़को मेताक् पालटोन खातारेन मित्टेन सुबेदार, मित्टेन इसोर भोकति होड़ आर आच् घारोंजरेनको सुदहा़ इसोर बोतोरायकान होड़गे, उनि दो होड़को आ़डिये एमाकोकान ताहेंकाना आर जावगे इसोर ठेने कोयजोङ कान ताहेंकाना। उनि दो तारासिञ बेर पे बाजा गान ओकते दोरसोनते इसोररेन मित्टेन दुत पुसटा़उतेये ञेल केदेया, आच् ठेन बोलोक्कान आरे मेतायकान, “ए कोरनेलियुस।” खानगे उनिसेच् बोतोर सातालाक्ए बेङगेत्केत्तेये मेनकेदा, “चेत् काना प्रोभु?”
आदो उनिये मेतादेया, “आमाक् कोयजोङ आर रेङगेच् ओरेच्को एमाको दान दिक्सा़वाक् मेनते इसोर ठेन राकाप् आकानतामा। मा नितोक् दो जोप्पाते होड़ कोलकोम, आर पातरासको मेताय सिमोन होहो आ़गु ओचोयेम; उनि दो हारता रेयाक्को का़क्मियिच् सिमोन ठेने डेराआकान, ओने उनियाक् ओड़ाक् दो जालापुरि आड़ेरेताय।” आदो आच् तुलुच् गालमारावकान दुते चालावेन खान गुतिको मोदरेन बार होड़ आर आच्रे जामाड़को मोद खोन मित्टेन इसोर भोकति पालटोने होहोवात्कोवा; आर सानामाक्ए ला़इ बुजहा़वात्कोते जोप्पातेये कोलकेत्कोवा।
आर दोसार हिलोक् होरतेको चालाक्कान आर नागराहा ठेनको सोरोक्कान ताहेंकानरे तिकिनोक् देलादिलि पातरास दो कोयजोङ ला़गित् छाततेये देच्एना। आर रेङगेच्केदेते जोजोम साना केदेया मेनखानको तेक्यारकान ताहेंकानरे उनि दोए धेयान मोगोनेना, आर सेरमा झिच्आकान आर मित्टेच् जिनिस फेड हिजुक्काने ञेलेत्काना, मित्टेच् ला़टु पिछा़उड़ि लेकानाक्, ओने पोनोन कोंड तोलआकान ओतरे फेडोक्काने ञेलकेदा ओनारे दो जोतो लेकान पोन जाङगावानको, आर ओतरे लेञोक्को आर चोटरेन उडा़उक् चेंड़ेंकोको ताहेंकाना। आर मित्टेच् आड़ाङ हेच्आदेया, “मा बेरेत्मे, ए पातरास, गोच्काते जोमकोम।”
मेनखान पातरास दोए मेनकेदा, “ओहोगे प्रोभु, एनते जाहान छुताक् आर बेसाफावाक् दो तिस हों बा़ञ जोमआकादा,”
आदो आर दोसार छोट आड़ाङ हेच्आदेया, “ओकाको इसोरे साफावाकात् ओनाको आम दो छुताक् आलोम मेताक्आ।” आर ओनका दो पे धाव होयेना, खान साट मेनते ओना दो सेरमाते राकाप् ओचोयेना।
आर पातरास दो आच्ए ञेललेत् दोरसोन चेत्काना मेनते मोनेरेये आसबासावआकान ताहेंकाना, ञेलपे कोरनेलियुसे कोललेत्को होड़ दो सिमोनाक् ओड़ाक् कुलि कुलिते ञामकाते दुवा़रा ठेनको तेङगोवाकाना, आर होहोकातेको कुलिजोङकाना, पातरासको मेताय सिमोन ओंडेये डेराआकाना से बाङ।
आर पातरास दो दोरसोन रेयाङे हुदिसजोङकान ताहेंकानरे जिउ दोए मेतादेया ञेलमे पे होड़को ञाम बाड़ायेत्मेया। बेरेत्काते हिजुक्मे आर ओनको साँवते चालाक्मे, बेगोर जाहान दिगधा़ते एनते इञगेञ कोल आकात्कोवा। आदो पातरास ओनको होड़ ठेन फेड सेनकातेये मेतात्कोवा, “ञेलपे आपेपे ञाम बाड़ायेदेकानिच् दोञ इञ कानगेया; आपेपे हेच् आकान रेयाक् कारोन दो चेत्?”
आदोको मेतादेया, कोरनेलियुस, मित्टेन सुबेदार, भागे आर इसोर बोतोरायकान होड़ आर जोतो जिहुदि जा़तरेनको ठेन आ़डि मानोतान होड़, उनि दो सोनोत दुत होतेतेये चेहाव ओचोयेना, आच् ओड़ाक्ते आमे होहो इदिमे आर आमठेन काथाको आँजोमजोङ ला़गित्। आदो पातरास ओनको होहो आदेरकेत्कोतेये पेड़ाकेत्कोवा।
आदो दोसार हिलोक् बेरेत्काते ओनको तुलुच्ए ओडोक चालावेना, आर जोप्पारेन बोयहाको मोदरेन आदोम आदोमको उनि साँवतेको चालावेना। आर ओना दोसार हिलोक् का़इसा़रिया़तेको बोलोयेना; आर कोरनेलियुस दो ओनकोय ञेल होरेत्को ताहेंकाना, आच्रेन पेड़ा आर सोररेन गातेको होहो जारवाकाते। आदो पातरासे बोलोक्कान ताहेंकान जोखेच् कोरनेलियुस दो उनिये दारामकेदेतेये सेवावादेया। मेनखान पातरास दो उनि बेरेत्केदेतेये मेनकेदा, “मा बेरेत्मे इञ हों चोञ मानवाकानगे।” आर उनि तुलुच् गालमाराव गालमारावतेये बोलोयेना खान, आयमा होड़ हेच् जारवा आकाने ञामकेत्कोवा। आरे मेतात्कोवा, जिहुदि होड़को ला़गित् दो बाङ गानोक्आक् काना एटाक् जा़तरेनको तुलुच्को गातेक्, से ओनको ठेनको बोलो ओडोकोक् दो, मेनखान इञ दो इसोरे उदुक्आकावादिञा ओकोय होड़ हों छुत से बेसाफा आलोञ मेताको ला़गित्; ओनातेगे इञ दो बेगोर ढेंसतेञ हेच्एना, होहोवादिञ तोरागे, ओनातेञ कुलिजोङ काना, चेत् मेनतेपे होहो आ़गुवाकादिञा?
आदो कोरनेलियुसे मेनकेदा, पोन माँहाँ होयोक्काना, निया़ बेर लेका, मेताक्मे, तारासिञ बेर जोखेच् इञाक् ओड़ाक्रेञ कोयजोङकान ताहेंकाना; खानगे ञेलमे, पोंड किचरिच् होरोक् आकात् मित् होड़ इञ सामाङरेये तेङगोयेना, आरे मेनकेदा, ए कोरनेलियुस; आमाक् कोयजोङ दो आँजोमेनतामा आर आमाक् कोय एमोक्को दो दिसा़वाकानतामा इसोर सामाङरे। आदो जोप्पाते होड़ कोलकोम आर पातरासको मेताय हारता रेयाक्को का़क्मियिच् सिमोन ओड़ाक्रे जालापुरि आड़ेरेये डेराआकाना। खान इना़ घा़ड़िच्तेगे आम ठेन होड़िञ कोलकेत्कोवा; आरेम हेच्एनते दोम बोगेकेदा। आर नोक्ओंय आले सानामकोगे इसोर सामाङरे मेनाक्लेया, प्रोभुइ हुकुमाकावात् मे जोतोवाक् आँजोम ला़गित्।
पातरासाक् गालमाराव
खानगे पातरास दो रोरोड़ एहोप्एनतेये मेनकेदा, सा़रिया़क्काना मेनतेञ बुजहा़उ ओरोमेदा, बाङमा, इसोर दो मेंत्हाँ बेङगेत्आक्इच् दोए बाङ काना।1 बिचकोम मिमित् जा़तरेनकोरे आच्को बोतोरायकान आर भागेयाक्को का़मियेत् कानकोय आताङेत्कोवा। ओना काथा ओकाटाक् इसराएल होपोनकोय कोलात्को, सुलुक रेयाक् भागे सोमबात पोरचारात्कोते जिसु मा़सि होतेते उनिगे सानामकोरेन प्रोभु। आपे दो ओना काथापे बाडाया, ओकाटाक् गोटा जिहुदा़रे होयेन, गा़लिल खोन एहोप्काते जोहाने पोरचारकेत् बा़प्तिसमा तायोम; नासारेतरेन जिसु रेयाङगे, चेत्लेका इसोर दो सोनोत जिउते आर दाड़ेते उनिये ओजोक्केदे; ओने उनि दो दाँड़ाँ दाँड़ाँते भागे का़मिये का़मिकेत् आर सायतान ठेन जोतो जुलुम ओचोक् कानकोय बोगेकेत्को एनते इसोर दो उनि तुलुच्ए ताहेंकाना। आर आले दो ओनाको सानामाक्रेन गोहाको कानाले, ओकाकोय का़मिलेत् जिहुदिकोवाक् दिसा़मरे हों आर जेरुसालेमरे हों; ओने उनि दो गोच् होंको गोच्लेदे, कुरुसरे आकाकाते। उनिगे इसोर दो पे माँहाँ हिलोक्रेये जिवेत् बेरेत् केदेया आर सोदोरोक् रेयाक्ए दानादेया, सानाम होड़को ठेन दो बाङा, मेनखान इसोर होतेते लाहा खोन बाछाव निट आकात्को गोहाको ठेन, मेताक् मे, आले ठेनगे, ओने उनि गोच्को खोने जिवेत् बेरेत्एन तायोम उनि तुलुच् जोम आरले ञुलेत्। आरे हुकुमात्लेया दिसा़म होड़को पोरचाराको आर गोहा एमाको ला़गित्, बाङमा उनि कानगेयाय इसोरे निट आकादे, जिवेत् आर गोच्कोरेन बिक्चा़रिच् दो। उनि रेयाङगे जोतो ना़बिको गोहाको एमेदा, उनिरे पा़तिया़उक् मित्के मित् होड़ दो उनियाक् ञुतुमते का़इ इका़को ञामा मेनते।
जिहुदि बाहरेरेनको सोनोत जिउको ञामकेदे
पातरास ओनाको काथाय रोरोड़कान ताहेंकान तुलुच्गे काथा आँजोमकानको सानामकोरे सोनोत जिवे फेडेना। आर खातना आकान पा़तिया़उको मोदरे तिना़क् पातरास साँवतेको हेच् आकान ताहेंकानको दोको ठाकएना, जिहुदि बाहरेरेन को हों सोनोत जिउ रेयाक् दान दुल ओडोकएन इया़ते। एनते एटाक् पा़रसिकोते रोरोड़ कान ओनको दो इसोर सारहावेकानको आँजोमकेत्कोवा। आदो पातरासे मेनकेदा, नोको, ओकोय आबो लेका सोनोत जिउको ञामआकादे, आलोको बा़प्तिसोक्आ मेनते जाहाँय होड़ दाक्ए आकोट दाड़ेकेया? आदोए हुकुमकेदा जेमोन जिसु मा़सि ञुतुमतेको बा़प्तिसोक्। खान ओनको दो थोड़ा दिने ताहें ञोगोक्आ मेनतेको नेहोंरादेया।
Source notes (1)
- Cross-reference देउ १०:१७
Santhali Project. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.