Santhali Project
आपोस का़मि 11
पातरास जेरुसालेमरेये रोड़ दोगोक्कान
आर आपोसतोलको आर जिहुदा़रे ओनते नोतेको ताहेंकान बोयहाकोको आँजोमकेदा बाङमा जिहुदि बाहरेरेनको हों इसोराक् काथाको आताङाकादा। आर पातरास जेरुसालेमतेये हेच्एन खान खातनारेनको दो उनि तुलुच्को रोपोड़ेना, मेनकेदाको आम दो बिन खातना होड़ ठेनेम बोलो ओडोकआकाना आर ओनको तुलुच्एम जोमेदा। मेनखान पातरास दो ओड़े ओड़ ला़इ बुजहा़वाको एहोप्केत्तेये मेनकेदा।
इञ दो जोप्पा नागराहारेञ कोयजोङकान ताहेंकाना, आर दोरसोन दोसारे पाड़ावेनतेञ ञेल केदेया मित्टेच् जिनिस फेड हिजुक्कान मित्टेच् ला़टु पिछा़उड़ि लेकानाक् पोनोन कोंडते तोलआकान सेरमा खोन फेड ओचोक्, आर ओना दो इञ ठेन हा़बिच् सेटेरेना। आर ओना सेच् बेङगेत् उरिच्कातेञ आ़रिबा़न्धियेत् ताहेंकाना। आर ओतरेन पोन जाङगावानको आर बिर जानवारको आर लेञोक्को आर चोटरेन उडा़उक् चेंड़ेंकोञ ञेलकेत्कोवा। आर मित्टेच् आड़ाङ हों मेता़ञकान इञ आँजोमकेदा, “मा बेरेत्मे पातरास गोच्काते जोमकोम।” मेनखान इञ दोञ मेनकेदा, “ओहोगे प्रोभु, एनते जाहान छुताक् से बेसाफावाक् दो तिस हों इञाक् मोचारे बाङ बोलोआकाना।” आदो सेरमा खोन दोसार छोट मित्टेच् आड़ाङे रोड़ रुवा़ड़केदा “ओकाको इसोरे साफाआकात्, ओनाको आम दो छुताक् आलोम मेताक्आ।” आर ओनका दो पे छोट होयेना आदो सानामाक् सेरमाते राकाप् रुवा़ड़ेना। आर ञेलपे इना घा़ड़िच्तेगे पे होड़ आलेले ताहेंकान ओड़ाक् ठेनको तेङगोयेना, ओने ओनको दो का़इसा़रिया़ खोन इञ ठेनको कोल ओचोवाकान ताहेंकान। आर जिउ दो जोप्पा खोन का़इसा़रिया़ते ओनको तुलुच् चालाक्ए मेतादिञा, आर बेगोर जाहान दिगधा़क्ते। आर इञ तुलुच् दो नोको तुरुइ बोयहा होंको सेनेना, आर उनि होड़ाक् ओड़ाक्तेले बोलोयेना। आदो उनिये ला़इयात्लेया, चेत् लेका उनि दो दुते ञेललेदे, आच् ओड़ाक्रे तेङगोवाकान, आरे मेतायकान, बाङमा जोप्पाते होड़ कोलकोम आर पातरासको मेताय सिमोन होहो आ़गु ओचोयेम; उनिगे काथाकोय ला़इयामा, ओने ओकाकोतेम बाञचावक्, आम आर आम घारोंजरेनको जोतोकोगे। आर गालमाराव इञ एहोप्केत् खानगे सोनोत जिउ दो ओनकोरेये फेडेना, चेत्लेका एतोहोप्रे आलेरेहों। आर प्रोभुवाक् काथाञ दिसा़केदा एनकाथाय, “जोहान मा दाक्तेये बा़प्तिसलेत्को, मेनखान आपे दो सोनोत जिउतेपे बा़प्तिस ओचोक्आ।” ओनाते इसोर इना़ मित् दानगे ओनकोय एमात्को खान, चेत् लेका प्रोभु जिसु मा़सिरे बोन पा़तिया़वेनरे आबो होंए एमात् बोन, एनडेखान इञ दो चेलेञ ताहेंकानते इसोर इञ आकोट दाड़ेकेया? आदो ओनाकोको आँजोमकेत् खानको हापेयेना, आर इसोर सारहावकेदेतेको मेनकेदा, “जिहुदि बाहरेरेनको हों एनडेखान इसोर दो जियोन ला़गित् मोन आ़चुरे एमआकावात्कोवा।”
आनटिओखिया़रे का़लिसिया़
आदो इस्टिफान बाबोत होयेन सानताव इया़ते छिञछा़तुरेनको दो फोयनिकि, आर कुपरोस आनटिओखिया़ हा़बिच्को सेन इदियेना, आर आको हों काथा दो बाको ला़इयात्कोवा, जिहुदिको छाडा। मेनखान ओनको मोदरेन आदोमको दो कुपरोस आर कुरेनिरेन होड़को ताहेंकाना, ओने ओनको आनटिओखिया़तेको सेटेरेन खान जुना़निको होंको गालमारावात्को, आर प्रोभु जिसु रेयाक् भागे सोमबातको पोरचारात्कोवा। आर प्रोभुवाक् ति दो ओनको साँवते ताहेंकाना, आर लेखारे दो आयमा होड़गे पा़तिया़वेनते प्रोभु सेच्को आ़चुरेना।
आर ओनको रेयाङ काथा दो जेरुसालेमरे ताहेंकान का़लिसिया़रेनकोको आँजोमकेदा आर ओनको दो बारनाबासको कोल केदेया आनटिओखिया़ते। आर उनि दो ओंडे सेटेरकाते इसोराक् भोर ञेलकेत्तेये रा़सका़येना, आर सानामकोय उसकुरकेत्कोवा, जेमोन मोने मुरुककाते प्रोभुरे जामाड़ाकानको ताहेन, एनते उनि दो भागे होड़े ताहेंकाना, सोनोत जिउ आर बिसवा़सते पेरेच्आकान आर आ़डि गादेल होड़ प्रोभु ठेनको आ़गु जुटुच्एना।
आर उनि दो ता़रसुसतेये चालावेना सा़उल ञामे ला़गित् आर ञामकेदेते आनटिओखिया़तेये आ़गु केदेया। आदो गोटा सेरमागे उनकिन दो का़लिसिया़रेनको सोङगेकिन ताहेंयेना, आर ढेर होड़किन चेत्आत्कोवा, आर आनटिओखिया़रे चेलाकोको दो पा़हिल धाव क्रिसतानको ञुतुमेना।
आर ओनाको दिनरे ना़बि होड़को दो जेरुसालेम खोन आनटिओखिया़तेको हेच्एना। आर ओनको मोदरेन आगाबुस ञुतुमान मित् होड़े तेङगोयेना, आर जिउ होतेतेये ला़इ लाहाकेदा, गोटा धा़रतिरे माराङ आकाल होयोक् ला़गिदोक् काना मेनते, ओने ओना दो कलोउडियोस ओकतेरे होयेन। खानगे चेलाको दो मिमित् होड़ आकोवाक् दाडे़ लेका जिहुदा़रे ताहेन बोयहा मिसराको गोड़ों ला़गित् दान कोलको निटकेदा, ओने ओनका होंको ओनकाकेत् बारनाबास आर सा़उल तिते मुरुबिको ठेनको कोलकेत्।
Santhali Project. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.