Santhali Project
आपोस का़मि 12
आपोसतोलको चेतानरे सानताव
ओना जोखेच्गे हेरोद राज दो का़लिसिया़रेनको आदोम आदोमको सानताव ला़गित् हाते लागावकेदा जोहानरेन बोयहा जाकोब दो तारवाड़ितेये माक्गोच् केदेया। आर ओनाते जिहुदिकोको कुसियेने ञेलकेत् खान पातरास होंए साप् जुटुच्केदेया, खान बिन ता़ड़ियानाक् पिठा़ पोरोब दिनकोगे ताहेंकाना। आर उनिये साप्केदे खान हाजोतरेये दोहोकेदेया, आर पोपोन होड़काते पा़रि पा़रिते होरहोये ला़गित् पालटोनकोय सोपरोतात्कोवा आर सेन पारोम पोरोब तायोम दिसा़म होड़को सामाङरे ओडोक आ़गुइये मेनजोङकान ताहेंकाना। ओनाते पातरास दो हाजोतरेये होरहो ओचोक्कान ताहेंकाना; मेनखान का़लिसिया़रेनको दो उनि ला़गित् इसोर ठेन दिला़मुंडतेको कोयजोङकान ताहेंकाना।
पातरास का़द खोने छोडावेन
आर हेरोद उनि ओडोक आ़गुइये ला़गिदोक्कान ताहेंकानरे इना़ ञिंदा़गे पातरास दो बारया पालटोन तालारे, बारया सिकड़िते तोलआकाने जा़पित् आकात् ताहेंकाना, पाहराकिन दो दुवा़रा ठेन का़द ओड़ाक् किन होरहोकान ताहेंकाना खानगे ञेलपे, प्रोभुरेन मित्टेन दुत दो उनि ठेने तेङगो गोत्एना, आर ओना कांदहारे मारसाल बामबेरेना, आर कोखारे पातरास चेटाक्केदेतेये एबहेनकेदेया, आरे मेतादेया मा बेरेत् होदोक्मे आर सिकड़िकिन दो उनियाक् ति खोन ञुर गोत्एना, आदो दुत उनिये मेतादेया, “मा पाठे केटेजोक्मे आर खारपा होरोगताम” आदोए ओनकाकेदा, खाने मेतादेया, “किचरिच् ओयोयताम आर पाँजाञमे,” आदो ओडोक इदिएनतेये पाँजा इदि केदेया, आर बाय बाडायलाक्आ, आर दुत होतेते होयोक् कानाक् दो सा़रि काना मेनते, हुदिसेत् ताहेंकाना, दोरसोनगेये ञेलेत्काना मेनते। आदो पा़हिल आर दोसार पाहराकोकिन पारोमकेत्को खान नागराहाते सेनोक् मेंड़हेंत् फाटोक ठेनकिन सेटेरेना, आर ओना दो आच्तेगे उनकिन ला़गित् झिच् गोत्एना, आर ओडोककाते मित्टेच् कुलहिकिन सेन पारोमेना, खानगे दुत दो साटमेनतेये बा़गि गोत्आदेया।
आदो पातरास दिसा़ आ़चुरेनताय खाने मेनकेदा, नितोक् दो सा़रिगेञ बाडायकेदा, प्रोभु दो आच्रेन दुत कोलकाते हेरोद ति खोन आर जिहुदि होड़कोको ञेल होहोरकान सानामाक् खोने रुखिया़ बाञचावकेदेञा
आदोए बुजहा़उ ओरोमकेत् खान मा़रकुसको मेताय जोहानरेन एङगात मा़रिया़म ओड़ाक्तेये चालावेना ओने, ओकारे आयमा होड़को जारवा आकान आरको कोयजोङकान ताहेंकान। आर दुवा़र रेयाक् सिलपिञे ठोप् ठोप्केत् खान रोदा ञुतुमान मित्टेन का़ड़मि कुड़ि आक्तेने हेच्एना। आर पातरास रेयाक् आड़ाङे ओरोमकेत् खान रा़सका़ते सिलपिञ दो बाय झिच् लाक्आ बिचकोम ञिर बोलोयेनतेये ला़इयात्कोवा, “पातरास दो दुवा़र ठेने तेङगोवाकाना मेनते” ओनको दो उनिको मेतादेया, “कुङकिआकानाम।” मेनखान उनि दो तिरित्लेकाय मेनकेदा, “ओनका कानगेया मेनते। खानगेको मेनकेदा, तोबे उनिरेन दुत कानाय।”
मेनखान पातरास दो ठोप् ठोप्तेगेये ताहेंयेना। आदोको झिच्केत् खानको ञेल केदेया आरको ठाक एना। खान हापे ओचोको ला़गित् तितेये इसा़रावात्कोवा आरे ला़इयात्कोवा चेत् लेका प्रोभु दो हाजोत खोने ओडोक आ़गु केदेया। आरे मेनकेदा, “नोवाको काथा दो जाकोब ला़इयायपे, आर बोयहाको हों” खान ओडोक चालावेनते मित्टेच् एटाक् जायगातेये चालावेना।
आदो सिञ मारसालेन खान पालटोनको दो आको तालारे आ़डि आँटको आँदमांदाव चाबायेना, पातरास दोए ओकायना मेनते।
आर हेरोद दो उनि सेंदरा बाड़ाकेदे खान बाय ञामलेदेते पाहराकोय कुलिकेत्कोवा, आर गोच्को ला़गित् इदिकोवा मेनतेये हुकुमकेदा। आदो जिहुदा़ खोन का़इसा़रिया़ते सेनकाते ओंडेगेये ताहेंयेना।
हेरोदाक् गुजुक्
उनि दो टुर आर सिदोनरेनको आ़डिये एदरेआकोकान ताहेंकाना, खान ओनको रिया़उ मित्काते उनि ठेनको हेच्एना आर राजाक् गितिच् कांदहारेन सोरदार बालासतुसको रा़मजा़उकेदेते सुलुकोक् ला़गित्को कोयकेदा, एनते आको दिसा़मरेनको दो राज रेयाक् खोनगे आ़सुलोक्आक्को ञामेत् ताहेंकाना
आदो नेनडा दिनरे हेरोद दो राज किचरिच् होरोक्काते सिङघा़सोनरेये दुड़ुप् एना आरे गालमारावात्कोवा। आर होड़को दो होहोवातेको मेनकेदा, “नोवा दो इसोराक् आड़ाङकाना, मानवा रेयाङ दो बाङ।” खान इना़ ओकतेरेगे प्रोभुरेन मित्टेन दुत दो उनिये घा़ल भिनदा़ड़केदेया, इसोर साबासि बाय एमादे इया़ते, आरको तेजोकेदेते जिवि चालावेनताया।
मेनखान इसोराक् काथा दो पासनाव आर बाड़हाव इदियेना।
आर बारनाबास आर सा़उल दो जेरुसालेम खोनकिन रुवा़ड़ेना, साप्दाप् का़मिकिन पुरा़उकेत् खान, आर मा़रकुसको मेताय जोहानकिन आ़गुदाराकेदेया।
Santhali Project. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.