Santhali Project
आपोस का़मि 8
आर सा़उल दो उनि गोच् ओचोक्रे रा़जिगेये ताहेंकाना।
सा़उल का़लिसिया़रेनकोय सानतावेत्को
आर एनहिलोक् दो जेरुसालेमरे ताहेंकान का़लिसिया़ उपा़रते माराङ ओकोच् सानताव एहोप् एना; आर आपोसतोलको छाडा सानाम जिहुदा़ आर सा़मा़रिया़ रेयाक् टोठाकोतेको छिञछा़तुर एना, आर इसोर भोकति होड़को दो इस्टिफानको बायकेदेया आर उनि ञुतुमते आ़डिको होमोर हालाङकेदा।
मेनखान सा़उल दो का़लिसिया़ उक्जा़ड़तेगेये ताहेंकाना, आर ओड़ाक् ओड़ाक् बोलोकाते हेरेल आर मायजिउको ओर तोत्काते हाजोतोक् ला़गित्ए सोपरोतेत्को ताहेंकाना।1
सा़मा़रिया़रे भागे सोमबात पोरचारोक्काना
आर छिञछा़तुरेनको दोको सेन इदियेना भागे सोमबात रेयाक् काथा पोरचार पोरचारते। आर फिलिप दो सा़मा़रिया़ रेयाक् मित्टेन नागराहाते फेड सेनेनते ओंडेनको मा़सि रेयाक्ए पोरचारात्कोवा। आर गादेल होड़को दो फिलिपे ला़इयाकोकान ताहेंकानाक्को मित् मोनतेको हेतावादा, ओनेको आँजोमकेत्ताय आर उनिये का़मियेत् ताहेंकान चिनहा़कोको ञेलानते। एनते बेसाफा जिउको ताहेंकानताकोवा आयमा होड़को खोन ओनको दो आँट होहोवातेको ओडोकेना; आर आ़डि उता़र मित् काड़ गोच् होड़ आर लेडहाकोको बोगे ओचोयेना। आर ओना नागराहारे आ़डि रा़सका़ होयेना।
मेनखान सिमोन ञुतुमान मित् होड़ पा़हिल खोन ओना नागराहारेये ताहेंकाना, ओने उनि दोए गुनियेत् ताहेंकाना आर सा़मा़रिया़रेन होड़कोय ठाक ओचोयेत्को ताहेंकान, आच्गे मित्टेन माराङ होड़े ला़इयोगोक्कान ताहेंकानते, उनि दो हुडिञ हापड़ाक् सानामको मानोतायकान ताहेंकाना, ओनेको मेनेत् ताहेंकान, “नुयगे इसोर रेयाक् दाड़े दो, ओने माराङे ञुमोगोक्कान।” उनिको गानावएदे ताहेंकाना, एनते आ़डि दिन खोन गुनिकोते ओनकोय ठाक ओचोआकात्को ताहेंकाना। मेनखान इसोराक् राज आर जिसु मा़सियाक् ञुतुम रेयाक् भागे सोमबाते पोरचारात्कोते फिलिप रेयाक्को पा़तिया़वात्ताय खानको बा़प्तिस ओचोयेना, हेरेल हों आर मायजिउ हों। आर सिमोन आच् होंए पा़तिया़वेना, आर बा़प्तिस ओचोयेनते फिलिप तुलुच् जामाड़ाकाने ताहेंयेना, आर चिनहा़को आर माराङ दाड़ेयानाक् का़मिको होयोक्कान ञेलतेये ठाकएना।
आदो जेरुसालेमरेको ताहेंकान आपोसतोलको आँजोमकेत् खान, बाङमा, सा़मा़रिया़रेनको दो इसोराक् काथाको आताङकेदा, ओनको ठेन पातरास आर जोहानको कोलकेत्किना; आर उनकिन दो हेच्एनते बिसवा़सिको ला़गित्किन कोयकेदा, जेमोन सोनोत जिउको ञामे। उन हा़बिच् एनते ओनको मोदरेन ओकोयरे हों सोनोत जिउ दो बाय हेच् आकान ताहेंकाना, एकेन प्रोभु जिसु ञुतुमतेको बा़प्तिस आकान ताहेंकाना। खानगे पातरास आर जोहान दो ओनकोकिन चापोकेत्कोवा आर सोनोत जिउको ञाम केदेया।
आदो आपोसतोलकिन तिकिन चापोवाकोते सोनोत जिवे एमोगोक्काना मेनते सिमोने ञेलकेत् खान टाका नेयात्किनतेये मेतात्किना, “नोवा एकतिया़रि दो देन इञ हों एमा़ञबेन, जेमोन जाहाँयगेञ चापोये सोनोत जिवे ञामे।”
मेनखान पातरास दोए मेतादेया, “आमाक् टाका दो आम साँवते बाड़े नोसटोक् मा एनते इसोर रेयाक् दान दो टाकाते ञामोक्काना मेनतेम हुदिसकेत् इया़ते। नोवा काथारे होक से बाखरा दो बा़नुक्तामा, एनते आमाक् मोन दो इसोर सामाङरे बाङ सोजहेतामा।2 ओनाते आमाक् दुस्टा़मि खोन मोन बाड़े आ़चुरताम, आर प्रोभु ठेन नेहोंरजोङमे, पासेच्रे पासेच् आमाक् मोन रेयाक् हुदिस दो इका़क्तामगे। एनतेञ ञेलेदा, हाड़हात् सिसिर रेयाक् हाड़हात्रे आर बा़ड़िच्आक्को रेयाक् तोनोलरे मेनामा।”
खानगे सिमोने रोड़ रुवा़ड़केदा, “आबेनगे इञ ला़गित् प्रोभु ठेन नेहोंरोक्बेन, जेमोन आबेन बेन रोड़ाकात्को दो ओकाटाक् हों इञरे आलो बाड़े पाड़ावक्।”
आदो उनकिन दो गोहा एम इदिकेत्ते जेरुसालेमतेकिन रुवा़ड़ेना, सा़मा़रिकोवाक् आयमा आतोकोरे भागे सोमबात किन पोरचार इदिकेदा।
फिलिप आर इथुपिया़रेन माराङ एकतिया़रियान होड़
आर प्रोभुरेन मित्टेन दुत दो फिलिपे मेतादेया, मा बेरेत्मे आर दा़खिन सेच् ओना होरते चालाक्मे ओकाटाक् जेरुसालेम खोन गाजाते सेनआकान, ओना दो निसुनगेया। आर उनि दो बेरेत् एनतेये चालावेना आर ञेलपे इथुपिया़रेन मित्टेन होड़, इथुपिया़ कानदाके रा़निरेन माराङ एकतिया़रियानिच् मित्टेन चा़करा़ ओकोय उनियाक् सानाम धोनरेन लोनबोनिच् ए ताहेंकाना। उनि दो जेरुसालेमतेये हेच्लेन ताहेंकाना देवा सेवाय ला़गित्; आरे रुवा़ड़ चालाक्कान ताहेंकानरे आयाक् सादोम गा़डिरे दुड़ुप्काते जेसाया ना़बि रेयाक् पुथिये पाड़हावजोङकान ताहेंकाना। आर जिउ दो फिलिपे मेतादेया, दो सेन सोरोक्मे आर ओना सादोम गा़डि साँवतेक्मे। खानगे फिलिप दो ञिर सोरेनते जेसाया ना़बि रेयाक् पुथि पाड़हावक्काने आँजोम केदेया; आदोए मेतादेया, आमेम पाड़हावेत् दोम बुजहा़वेत्गेया से?
खानगे उनि दोए मेनकेदा, चेकातेञ दाड़ेकेया, जाहाँय बाय बुजहा़वा़ञ खान? आर फिलिपे नेहोंरादेया जेमोन देच्काते आच् साँवतेये दुड़ुप्। आर ओकाटाक्ए पाड़हावेत् ताहेंकान सोसतोर रेयाक् हा़टिञ दो नोक्ओंय नोवा ताहेंकाना,
भिडि लेका तेङगेनोक् ला़गित्ए तिया़क् इदिओचोयेना
आर भेडा होपोन आच् का़पचियेदेकानिच् सामाङरे हापे आकाने ताहेनकान लेका,
ओनकागे आयाक् मोचा बाय चाहाप् लेत्ताया।
उनियाक् निंधा़न दोसारे उनियाक् बिचा़र दो इदि फाराकेनताया;
उनि पिड़हिरेनको दो ओकोय ला़इ दाड़ेकेकोवा?
एनते धा़रति खोन उनियाक् जियोन दो उठा़उक्काना।3
आर उनि चा़करा़ दो फिलिपे मेतादेया, नेहोंराम का़ना़ञ ना़बि दो ओकोय रेयाङ नोवाय रोड़ेदा? आच् रेयाङ से जाहाँय एटागिच् रेयाङ? खान फिलिप दो गालमारावे एहोप्केदा आर ओना सोसतोर रेयाक् खोन एहोप्काते जिसु रेयाङ भागे सोमबाते ला़इयादेया। आर होर होरतेकिन सेनोक्कान ताहेंकानरे मित्टेच् दाक् जायगा ठेनकिन सेटेरेना; आर चा़करा़ दोए मेनकेदा, “नोक्ओंय चोङ दाक् चेत् आकोट मेनाक्आ इञिञ बा़प्तिस ओचोक्रे दो?” आर फिलिपे मेनकेदा, “आमाक् गोटा मोनतेम पा़तिया़उक्कान खान बोगेगे।” आर उनि दो रोड़ रुवा़ड़केत्तेये मेनकेदा, “पा़तिया़वाकानगेया़ञ जिसु मा़सि दो इसोररेन होपोन कानाय मेनते”
आर सादोम गा़डि तेङगोये हुकुमकेदा आर बाना होड़ दाक्तेकिन फेड सेनेना, फिलिप हों आर चा़करा़ हों, आदो उनिये बा़प्तिसकेदेया। आर दाक् खोन किन राकाप्एन खान प्रोभुरेन जिउ दो फिलिपे इदि केदेया, आर चा़करा़ दो घुरिया़ँ उनि बाय ञेललेदेया, खान रा़सका़वाते आयाक् होरतेये सेन इदियेना। खान फिलिप दो आसदोदरेये ञामेना, आर पारोम चालाक् तुलुच् सानाम नागराहारे भागे सोमबाते पोरचार इदिकेदा, का़इसा़रिया़रे आ़उरिये सेटेरोक् हा़बिच्।
Source notes (3)
- Cross-reference आ का़ २२:४-५; २६:९-११
- Cross-reference सेरे ७८:३७
- Cross-reference जेसा ५३:७,८
Santhali Project. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.