Santhali Project
आपोस का़मि 23
आर पावल दो माराङ बा़इसिरेनको सेच् बेङगेत् उरिच्कातेये मेनकेदा, “ए बोयहाको, इञ दो सानाम लेकाते नापाय इसोर सामाङरे भागे साँवबाक्डायतेञ चोलोन आ़गुवाकादा।” आदो माराङ नायके आनानिया़स दो सोररे तेङगोवाकानकोय हुकुमात्कोवा, मोचारे थापाये ला़गित्। खानगे पावल दो उनिये मेतादेया, इसोर दो आमे थापामेया, ए आम पोताव आकात् भित। आम दोम दुड़ुप् आकाना, आ़न लेकाते बिचा़रिञ ला़गित्, आर आ़न बेबाक्तावते उलटा़वेम हुकुमेदा थापा ओचोञ ला़गित्?1
आदो सोररे तेङगोवाकानकोको मेनकेदा, “इसोररेन माराङ नायकेयेम बेमानोतायकाना?”
आदो पावले मेनकेदा, बा़ञ बाडायलाक्आ, बोयहा माराङ नायके कानाय मेनते दो एनते ओल आकाना, आम जा़तरेन जाहाँय मुखिया़ रेयाङ बा़ड़िच् दो आलोम रोड़ा।2
मेनखान पावले बाडायकेत् खान, मित् दोल दो सा़दुकिको, आर एटाक् दोल दो फा़रिसिको कानाको मेनते, माराङ बा़इसिरे होहोवातेये मेनकेदा, “ए बोयहाको इञ दो फा़रिसि होड़ का़ना़ञ, फा़रिसिकोरेन होपोनगे, आर गोच्को खोन जिवेत् बेरेदोक् रेयाङ आस इया़ते इञ दोञ बिचा़र ओचोक्आकाना।”3
आदो नोवाए रोड़केत् खान फा़रिसिको आर सा़दुकिको तालारे रेटेपेटे जानामेनते बा़इसिरेनको दोको बार हा़टिञेना। एनते सा़दुकिको दोको मेना जिवेत् बेरेदोक् हों बा़नुक्आनाङ, आर दुत आर जिउको हों बा़नुक्कोवा, मेनखान फा़रिसिको दो नोवा जोतोगेको आङगोचा।4 मेनखान आ़डि माराङ गुलमाल होयेना, आर फा़रिसिको दोलरेन आदोम आदोम सोसतोर बाडायको तेङगोयेनतेको रापठा रा़पठियेना, मेनकेदाको, “चेत् बा़ड़िच् हों बाले ञामेदा, उनि होड़रे दो, मित्टेन जिउ से दुतगेये गालमारावादे खान, आदो चेत्?”
आदो रोपोड़ झोगोड़ आँट इदियेन खान माराङ सुबेदार दो पावलको ओर चिरा़ बोतेच्के बोतोरते पालटोनकोय हुकुमात्कोवा, जेमोन फेड चालाक्ते ओनको ताला खोन उनिको रेच् आ़तकिरे आर पालटोन गाड़तेको इदिये।
आर एन हिलोक् ञिंदा़ प्रोभु दो उनि ठेन तेङगोयेनतेये मेतादेया, दिल जोङमे, एनते जेरुसालेमरे इञ रेयाङ गोहाम एम आकात् लेका, रोमरे हों गोहा एमोक् होयोक्तामा।
पावल गोजे रेयाक् पोन्था
आर सिञ मारसालेन खान जिहुदिको दोको मिलिमिसिया़वाना, आर एकराड़ेनतेको सारापाना, जोम हों बाको जोमा आर ञु हों बाको ञुया, पावल आ़उरिको गोजे हा़बिच्। आर ओनको दो पोनगेल खोन बाड़तिको ताहेंकाना, ओने ओनको बा़ड़िच् पोन्था साजावरेको ताहेंकान। आर ओनको दो माराङ नायकेको आर मुरुबिको ठेन चालावेनतेको मेनकेदा, आले दो आपनारतेगेले साराप आकावाना, चेत् हों बाले चेकाया, पावल आ़उरिले गोजे हा़बिच्। ओना इया़ते नितोक् आपे दो माराङ बा़इसिरेनको लागायते माराङ सुबेदार दोहायायपे, जेमोन आपे ठेने आ़गुये, आच् काथाय उनि रेयाङ आरतेत् बेस ओकोच्तेपे बिचा़र छिन्डा़उ ला़गित्, आर आले दो उनि आ़उरिये सेटेरोक्रेगे गोजे ला़गित् तेयार मेनाक्लेगेया।
मेनखान पावल भा़गना़ततेत् दो ओनकोको ताँड़ाँगोक् रेयाक्ए आँजोम ञामकेदा, आर सेनकाते पालटोन गाड़ते बोलोयेनते पावले ला़इयादेया। खानगे पावल दो मित्टेन सुबेदार होहो सोरकेदेतेये मेतादेया, नुय कोड़ा दो माराङ सुबेदार ठेन इदियेम, एनते चेत् काथा चोङ ला़इयाय रेयाक् मेनाक्ताया। आदो उनि सोङगेकेदेते माराङ सुबेदार ठेने इदि केदेया, आरे मेनकेदा, हाजोतिच् पावल दो आच् ठेन होहोवादेतेये खोजकेदा, नुय कोड़ा आम ठेनिञ आ़गुया मेनते, चेत् काथा चोङ ला़इयाम ला़गित् मेनाक्तायते।
खान माराङ सुबेदार दो उनियाक् ति साप्काते एसकाररेये इदिकेदेतेये कुलि केदेया, चेत् काथा मेनाक्तामा, ला़इया़ञ ला़गित्?
आदोए मेनकेदा, जिहुदिको दोको रिया़उ मित् आकाना नेहोंराम ला़गित् जेमोन गापा पावल दो माराङ बा़इसिते ओनको ठेनेम इदिये, उनि रेयाक् आरतेत् बेस ओकोच्तेम कुलिजोङ ला़गित्। आम दो आलोम रा़मजा़उक्आ, एनते ओनको मोदरेन पोनगेल खोन बाड़ति होड़को ताँड़ाँक्आय काना, ओने ओनको आपनारतेको सापड़ावाकाना, जोम हों आलोको जोम, आर ञु हों आलोको ञुयमा, उनि आ़उरिको गोजे हा़बिच्, आर नितोक् दोको सापड़ावगेया, एकेन आम ठेन खोन काथाको ञेल होहोरकाना।
आदो माराङ सुबेदार उनि कोड़ा बिदा़केदेतेये का़जिया़ँउकादेया, ओकोय हों आलोम ला़इयाकोवा नोवाकोम ला़इ सोदोर आकावादिञा मेनते।
पावल का़इसा़रिया़तेको इदिकेदे
आर सुबेदारको मोदरेन बार होड़ होहो सोरकेत्किनतेये मेतात्किना, बार साय पालटोन तेयारकोबेन का़इसा़रिया़ हा़बिच् चालाक्आ मेनते आर एयायगेल आसवारिको, आर बार साय बोरलोमानको, ञिंदा़ रेयाक् आरे बाजा ओकतेरे, आर सादोमको तेयारकाको ला़गित्ए मेतात्किना, जेमोन पावलको देच् इदियेते दिसा़म चाक्लाविच् फेलिक्स ठेनको बाञचाव सेटेरकाय, आर नोक्ओंय नोनकान मित्टेच् चिठिये ओलकेदा।
कलोउडियोस लुसियोस ठेन खोन आ़डि मानोतान फेलिक्स दिसा़म चाक्लाविच् ला़गित्, जोहार। नुय होड़ दो जिहुदिको साप्लेदेया, आरको गोजे ला़गिदोक्कान ताहेंकाना, खान इञ दो पालटोनको सालाक् सेन होत् एनतेञ रुखिया़केदेया, रोमि होड़ कानाय मेनतेञ बाडायकेत्ते। आर ओकाटाक् इया़तेको बोहोक्एदेया, ओना रेयाङ कारोन बाक्डाय इञ मेनवानते ओनकोवाक् माराङ बा़इसितेञ इदि केदेया। आर इञ बुजहा़उ ञामकेदा आकोवाक् आ़न रेयाक् रेटेपेटे बाबोतरेको बोहोक्एदेया मेनते, मेनखान गोजे से तोले लेक दो बाको बोहोक्लेदेया। मेनखान उनि होड़ उपा़रते बा़ड़िच् पोन्थाको बेनावकेदा मेनतेको सोदोरादिञ खान, इना़ तापतेगे आम ठेनिञ कोल गोत्कादेया, आर बा़दिको होंञ हुकुमात्कोवा, आम सामाङरे उनि उपा़रते मेनाक्ताकोवाक्को रोड़ा मेनते।
आदो पालटोनको दो हुकुमात्को ताहेंकान लेका, पावल इदितोराकेदेते ञिंदा़गे आनटिपाटरिसतेको सेटेरकेदेया। मेनखान दोसार हिलोक् दो आसवारिकोगे उनि सोङगेतेको सेन इदि ओचोवात्कोवा, आर आरको दो पालटोन गाड़तेको रुवा़ड़ेना। आर ओनको दो का़इसा़रिया़रे सेटेरकाते दिसा़म चाक्लाविच् ओना चिठि एमायते पावल हों उनि सामाङरेको हा़जिरकेदेया। आदो पाड़हावकेत् खान, ओका दिसा़मरेन कानाय मेनतेये कुलि केदेया, आदो किलिकिया़रेन कानाय मेनतेये चेत्केत् खाने मेनकेदा, आमरेन बा़दि होंको हेच्लेन खान इञ आँजोमतामा, आर हेरोद रेयाक् दोलानरेको होरहोयेया मेनतेये हुकुमकेदा।
Source notes (4)
- Cross-reference माथ २३:२७-२८
- Cross-reference एकसो २२:२८
- Cross-reference आ का़ २६:५; फिलि ३:५
- Cross-reference माथ २२:२३; मा़र १२:१८; लु २०:२७
Santhali Project. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.