Santhali Project
आपोस का़मि 24
पावल बिरुदरे मुद्दा़
आदो मोंड़ें माँहाँ तायोमते माराङ नायके आनानिया़स दो आदोम आदोम मुरुबिको, आर मित्टेन उकिल तेरतुलुस सोङगेकाते का़इसा़रियातेये हेच्एना। आर ओनको दो पावल उपा़रते दिसा़म चाक्लाविच ठेनको दा़रसा़उकेत्आ।
आदो पावलको होहोवादे खान तेरतुलुस दो नोनका मेनकाते दुहमा़ते एहोप्केदा, आम होतेते आ़डि निरा़इले ञामेदा, आर नोको जा़तरेनको ला़गित् आमाक् दोहायते आ़डि लेकान बा़ड़िच्आक्को खोनको सुधा़र ओचोक्काना। ओना दो सानाम ओकते आर गोटा टा़न्डिगेले आङगोचेदा, “ए आ़डि मानोतान फेलिक्स, आ़डि गुन मानाव जोहार।” मेनखान जेमोन बा़ड़ति आलोञ आ़उझा़ड़मे, नेहोंराम काना़ञ, जिवि हाताड़काते मित् बार काथाम आँजोमताले। एनते नुय होड़ दो मित्टेन भिक्ङगड़ा़उ होड़ कानाय मेनतेले बाडाय ञाम केदेया, आर गोटा धा़रतिरे सानाम जिहुदिको तालारे मित्टेच् हुलमाल सिसिरजा़विच्, आर नासारिया़ सिकना़त दोलरेन आ़क्युरिच्गे। उनि दो कोयजोङ ओड़ाक् भोंडे मेनवान ताहेंकाना, आदोले साप् केदेया। मेनखान माराङ सुबेदार लुसियोस दोए हेच्एना, आर आलेयाक् ति खोन जोबोरगेये ओडोक इदि केदेया। जुदि उनिगेम कुलिले खान, नोवाको सानामाक्एम बाडाय दाड़ेकेया, ओने ओकाको रेयाक् ले बोहोक्एदेकान। जिहुदिको दो उनियाक् काथाको सुहियादा आर ओनका कानगेया मेनतेको मेनकेदा।
फेलिक्स सामाङरे पावलाक् रोड़ दोगोक्
आर दिसा़म चाक्लाविच् दो रोड़ा मेनतेये इसा़रावादे खान, पावल दो रोड़ रुवा़ड़केत्तेये मेनकेदा। ढेर सेरमा खोन नोको जा़तरेनको ला़गित् बिक्चा़रिच्एम ताहें हेच् आकान इञ बाडायेत्ते, हिया़ खालासकातेञ रोड़ दोगोक् काना। एनते आमेम बाडाय ञाम दाड़ेयाक्आ, जे गेलबार दिन खोन बा़ड़ति दो बा़ञ होयोक्काना, इञ दो सेवा ला़गित् जेरुसालेमतेञ राकाप् सेनलेना। आर जिहुदिको दो कोयजोङ ओड़ाक्रे जाहाँय तुलुच् आपठा आ़पठिक्कान से गादेल होड़ आ़उला़वेत्को बाको ञामलेदिञा, सुना़गोगरे हों बाङ, आर नागराहारे हों बाङ। आर ओनाको दो सा़बुत हों बाको सा़बुत दाड़ेयामा, ओने ओकाको रेयाक्को बोहोक्एदिञकान मेनखान नोवा दो आम ठेनिञ आङगोचेदा, जे ओना होर लेकाते, ओने ओकाटाक् सिकना़त दोलको मेताक्कान, ओना लेकाते हापड़ामकोरेन इसोर इञ सेवावायकान, आ़न लेकातेयाक्को आर ना़बिकोवाक्कोरे ओलआकान सानामाक्कोरेञ पा़तिया़उक्कानते। इसोररे आस मेनाक्तिञते, ओने ओना नोको आको होंको ञेल होहोरकान, मेताक्मे बोगे आर बा़ड़िच्को होंको जिवेत् बेरेदोक्आ हापेन। ओनाते होंञ कुरुमुटुएदा जेमोन इसोर आर मानवाको सेच् सिञ सा़टुप् इञाक् साफा साँवबाक्डायाक् दो बिन ता़क्किच्आक्गे ताहेनतिञ। आदो ढेर सेरमा तायोम इञ जा़तरेनको ला़गित् एमाक् दान आ़क्गुञ हेच्लेना, आर सामाङाक्को हों।1 आदो ओनको सेलेत् कोयजोङ ओड़ाक्रे पुरुछुनकानको ञामकेदिञा, गादेल होड़ानते हों बाङ आर हुलमालाते हों बाङ। मेनखान आ़सिया़रेन आदोम आदोम जिहुदिको ताहेंकाना, ओने ओनको नोंडे आम सामाङरे हा़जिरोक् आर बोहोगिञ लेकताको, इञ उपा़रते जाहानाक् मेनाक्ताको खान। से नोको आकोगेको मेनमा, माराङ बा़इसि सामाङरेञ तेङगोलेन जोखेच् इञरे चेत् दोसको ञामलाक्आ। निया़ मित्टेन काथा छाडा, ओने ओनको तालारे तेङगोकाते होहोवातेञ मेनलेत्, बाङमा गोच्को रेयाक् जिवेत् बेरेदोक् बाबोतरे तेहेञ दिन आपे सामाङरेञ बिचा़र ओचोक्काना।2
मेनखान फेलिक्स दो ओना होरते रेयाक् बेस ओकोच्तेये बाडायकान ताहेंकानते दिने ठेलावकेत्ताकोवा, नोवा मेनकाते, लुसियोस माराङ सुबेदारे हेच्लेनरेगे आपेयाक् दोञ छिन्डा़उतापेया। आर सुबेदारे हुकुमादेया, जेमोन पावले होरहोये आर थोड़ा आवसान माछाये दोहोये, आर जेमोन उनिरेन जाहाँयगे साप्सोराय ला़गित् आलोय मानाको।
पावल फेलिक्स आर द्रुसिला सामाङरे
मेनखान तिन दिन तायोमते चोङ फेलिक्स दोए हेच्एना, आच् ओड़ाक् होड़ द्रुसिला़ साँवते, ओने उनि जिहुदिये ताहेंकान, आर पावले होहो आ़गु ओचोकेदेते मा़सि जिसुरे पा़तिया़उक् रेयाङे आँजोमकेत्ताया। आर भा़क्ला़इ आर सामबड़ावक् आर दाराकान बिचा़र रेयाङे गालमारावेत् ताहेंकानरे, फेलिक्स दो बोतोरेनतेये रोड़ रुवा़ड़केदा, नितोक् दो मा सेन हाताड़ोक्मे। ओपसोर इञ ञामलेनरेञ होहोवामा नाहाँक्। उनि दो आस होंए आसोक्कान ताहेंकाना, पावल दो टाकाय एमाया मेनते, ओना इया़ते आ़डि धाव उनि होहोवायते उनि तुलुच्ए गालमारावकान ताहेंकाना।
मेनखान बार सेरमा दिन पुरा़वेन खान फेलिक्स बोदोलते पोरकियोस फेसतुसे बाहालेना, आर फेलिक्स दो जिहुदिको ठेन बा़सुत ओचोक् रेयाक् मोने ताहेंकानतायते पावल तोलगेये बा़गि ओटोवादेया।
Source notes (2)
- Cross-reference आ का़ २१:१७-२८
- Cross-reference आ का़ २३:६
Santhali Project. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.