Santhali Project
आपोस का़मि 22
ए बोयहाको आर बाबाको, “नितोक् आपे ठेनिञ रोड़ दोगोक् कानाक् आँजोमतिञपे।”
आर इबरि पा़रसितेये गालमारावाकोकानको आँजोमकेदे खान, आरतेत्गेको थिरेना; आदोए मेनकेदा,
इञ दो जिहुदि होड़ का़ना़ञ, किलिकिया़ रेयाक् ता़रसुसरेञ जानामलेना, मेनखान नोवा नागराहारेञ आ़सुल हारावाकाना, गामालिएलाक् जाङगा ठेन, हापड़ामकोवाक् आ़न काजाकते सेनाक् इञ चेत् ओचोलेना, इसोर ञुतुमते आँटोक्इच् इञ ताहेंकाना, चेत् लेका तेहेञ दिन आपे होंपे आँटोक् कान। आर नोवा होररेनकोञ खेदलेत्कोवा, गुजुक् हा़बिच्गे हेरेल हों आर मायजिउको हों तोलकेत्कोते हाजोतरेञ जिमा़कात्कोवा। ओना रेयाङ मा माराङ नायके, आर गोटा मुरुबिको बा़इसिरेनको होंको गोहा दाड़ेयाक्, ओने ओनको खोनगे बोयहाको ला़गित् चिठिकोञ ञामलेत् दामेसेकतेञ चालाक्कान ताहेंकाना, ओंडेनको हों तोलकाते जेरुसालेमते आ़गुको ला़गित्, जेमोनको सा़जा़इ ओचोक्।
पावल आयाक् मोन आ़चुरोक् रेयाङे ला़इयेदा
(आपोस का़मि ९:१-१९; २६:१२-१८)
आदो नोनका होयेना, चालाक् चालाक्ते दामेसेकइञ सोरोक्कान ताहेंकानरे, तिकिन जोखेच् आचकागे सेरमा खोन मित्टेच् माराङ मारसाल इञ बेड़हायते बामबेरएना। आर ओतरेञ भिनदा़ड़गोत् एनते मित्टेच् आड़ाङ मेता़ञकान इञ आँजोमकेदा, ए सा़उल, ए सा़उल, चाक्एम खेदेञकाना? आदोञ रोड़ रुवा़ड़केदा, ए प्रोभु, आम दोम ओकोय काना? उनि दोए मेतादिञा, इञ दो नासारेतरेन जिसुगे, ओने आमेम खेदेञकान। आर इञ साँवते ताहेंकानको दो मारसाल ञेल माको ञेललेत्गे, मेनखान इञे गालमारावादिञिच् रेयाक् आड़ाङ दो बाको आँजोमलाक्आ। आदोञ मेनकेदा, ए प्रोभु, चेत् इञ चेकाया? खानगे प्रोभु दोए मेतादिञा, मा बेरेत्काते दामेसेकते चालाक्मे, आर ओंडेगे सानामाक्एम ला़इ ओचोक्आ, ओने ओनाकोम का़मिया मेनते निट आकावात्मे। आर ओना मारसाल रेयाक् ठोनोक इया़ते बा़ञ ञेञेलकान ताहेंकानते इञ सोङगेतेनकोको तिया़क् इदिकेदिञते दामेसेकरेञ सेटेरेना।
आर आनानिया़स मित् होड़, आ़न लेकाते इसोर भोकति होड़गे, ओने उनि ओंडे गिरा़बास आकान सानाम जिहुदिको ठेन भागे ञुतुम ताहेंकानताय। उनि दो इञ ठेने हेच्एना, आर इञ सोररे तेङगोकातेये मेतादिञा, ए बोयहा सा़उल, मा ञेञेलमे। आर इना़ घा़ड़िच्तेगेञ बेङगेत्आदेया, खानगे उनि दोए मेनकेदा, आबोरेन हापड़ामकोरेन इसोर दो आमे बाछाव आकात्मेया, जेमोन उनियाक् मोनेम बाडाय आर भा़क्ला़यिच्एम ञेले, आर उनियाक् मोचा खोन आड़ाङेम आँजोमताय। एनते उनि ला़गित् सानाम होड़को सामाङरे जिसु बाबोतरे आमेम ञेल आरेम आँजोमाकात्आक्को रेयाक् गोहाम होयोक्आ। आर नितोक् दो चेत्एम बिला़मेदा? मा बेरेत्ते बा़प्तिस ओचोक्मे, आर आमाक् का़इको आ़रुप् गिडिताम, उनियाक् ञुतुम दोहायाक्ते।
जिहुदि बाहरेरेनको पोरचाराको ला़गित् पावले होहो ओचोक्कान
आर नोनका होयेना जेरुसालेमतेञ रुवा़ड़ेनते कोयजोङ ओड़ाक्रे कोयजोङकान ताहेंकानरे दोरसोन दोसारेञ पाड़ावेना। आर मेता़ञकान इञ आँजोम केदेया, मा उसा़रायमे आर जेरुसालेम खोन ओडोक होदोक्मे, एनते ओनको दो इञ रेयाङ आमाक् गोहा दो बाको आङगोचा। आदोञ मेनकेदा, ए प्रोभु, आकोको बाडाया, इञ दो आमरे पा़तिया़उक्कोञ दाल हाजोतेत्को आर मिमित् सुना़गोगरे ओनकोञ दाल उर ओचोयेत्को ताहेंकाना। आर आमरेन गोहा इस्टिफानाक् माँयाँम जोरो ओचोयेनरे, इञ हों ओंडेञ तेङगोवाकान ताहेंकाना, आर ओनारे रा़जिगेञ ताहेंकाना। आर उनि गोगोच्कोवाक् किचरिच्कोञ होरहोवाकात् ताहेंकाना। खानगे उनि दोए मेतादिञा, दो चालाक्मे, एनते इञ दो आ़डि सा़ङगिञ जिहुदि बाहरेरेनको ठेनिञ कोलमेया।
आर ओना काथा हा़बिच्को आँजोम इदिकेत्ताया, खानगे आँटते होहोवातेको मेनकेदा, धा़रति खोन ओचोक् गिडिकायपे नोनकानिच् दो एनते जिवेत्ए ताहेन लेक दोए बाङ काना। आर ओनको दोको रा़गा़उ रा़गा़वेत् ताहेंकाना आर आकोवाक् किचरिच्कोको चापात् गिडियेत् आर चोटते धुड़िको उडिया़वेत् ताहेंकाना खान माराङ सुबेदार दोए हुकुमकेदा, पालटोन गाड़तेये आदेर ओचोक् आर चा़रना़वेतेये पुछा़र ओचोक्आ मेनते, जेमोने बाडाय दाड़ेयाक्, चेत् कारोनते उनि बिरुदरे ओनकोको होहोयेत् ताहेंकाना। मेनखान चा़रना़वे ला़गित्को तोलेकान ताहेंकानरे पावल दो सोररे तेङगोवाकान सुबेदारे मेतादेया, रोमि होड़ बिन बिचा़र दुसिते चा़रना़वे रेयाक् हुकुम मेनाक्तापेया?
आदो सुबेदार ओनाय आँजोमकेत् खान माराङ सुबेदार ठेन सेनेनते ओना ला़इयादेतेये मेतादेया, चेत्एम चेकाय ला़गिदोक्काना? नुय होड़ माय रोमिकान चोङ।
खान माराङ सुबेदार दो उनि ठेन हेच् एनतेये मेतादेया, “ला़इया़ञमे, रोमि कानाम?” आर उनि दोए मेनकेदा, “हें कानगेया़ञ”
खानगे माराङ सुबेदारे रोड़ रुवा़ड़केदा, “इञ दो आ़डि उता़र टाका एमकाते नोवा पोरजा होक इञ ञाम आकावाना।” आदो पावले रोड़ रुवा़ड़केदा, “मेनखान इञ दो जानामते रोमरेन पोरजा का़ना़ञ।” खानगे चा़रना़वेते पुछा़रे ला़गिदोक्कानको दो साटमेनतेको इका़कादेया, आर माराङ सुबेदार होंए बोतोरेना, रोमि कानायमेनतेये बाडायकेत्ते आर उनिये तोल ओचोवाकादे ताहेंकान इया़ते।
पावल माराङ बा़इसि सामाङरे
मेनखान दोसार हिलोक् दो जिहुदिको चेत् रेयाक्को बोहोक्एदेया, ओना रेयाक् खा़टितेत् बाडाय ञाम ला़गित्ए मोनेयानते पावले राड़ाकेदेया, आर माराङ नायकेको आर गोटा माराङ बा़इसिरेनको हेच् जारवाक्ए हुकुमात्कोवा आर पावल फेड इदिकेदेते ओनको सामाङरेये तेङगोकेदेया।
Santhali Project. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.