Santhali Project
आपोस का़मि 15
जेरुसालेमरे दुपुड़ुप्
आर आदोम होड़ दो जिहुदा़ खोन आनटिओखिया़रे हेच्काते बिसवा़सिकोको चेत् आकोकान ताहेंकाना, बाङमा मोसेयाक् चा़लिलेका बापे खातना ओचोलेन खान, ओहोपे बाञचाव दाड़ेलेना।1 आदो पावल आर बारनाबास ओनको तुलुच् आ़डि आपठा आ़पठि आरकिन तेखड़ा तेखड़ियेन खानको गोटाकेदा जेमोन पावल आर बारनाबास, आर आको मोदरेन आदोम एटाक्को नोवा रेटेपेटे काथा बाबोतरे आपोसतोलको आर मुरुबिको ठेन जेरुसालेमतेको चालाक्,
आदो का़लिसिया़रेनको होतेते इदि गोत् ओचोयेनते ओनको दो फोयनिकिया़ आर सा़मा़रिया़ तालाते होंको सेन पारोमेना, जिहुदि बाहरेरेनको मोनको आ़चुरकेत् रेयाक्को ला़इ इदिआत्कोते आर सानाम बिसवा़सिको आ़डिको रा़सका़ ओचोकेत्कोवा। आर जेरुसालेमको सेटेरेन खान का़लिसिया़रेनको आर आपोसतोलको आर मुरुबिको दो ओनकोको आताङ दाराम केत्कोवा सानामाक् किन ला़इयात्कोवा, तिना़क् इसोर दो आ़किन तुलुच्ए का़मिआकात्आ। मेनखान फा़रिसिकोवाक् सिकना़त दोलरेनको मोद खोन पा़तिया़वाकान आदोम आदोम होड़ दो तेङगोयेनतेको मेनकेदा, ओनको खातना ओचोक्को आर मोसे रेयाक् आ़न दोक्हो हुकुमाको दो जा़रुड़गेया।
आर आपोसतोलको दो नोवा काथा रेयाक् तोजबिजा मेनतेको जारवायेना आर ढेर तेखड़ा तेखड़ि होयेन खान पातरास दो तेङगोयेनतेये मेताक्कोवा, ए बोयहा आर मिसराको आपेपे बाडायगेया, एहोप् दिनकोरे चेत् लेका इसोर दो आपेको ताला खोने बाछावाना, जेमोन इञाक् मोचाते जिहुदि बाहरेरेनको भागे सोमबात रेयाक् काथाको आँजोम आरको पा़तिया़उक्।2 आर ओनतोर बाक्डायिच् इसोर दो ओनकोय गोहावात्कोवा सोनोत जिवे एमात्कोते आबोय एमात्बोन लेकागे।3 आर चेत् बेगार बाय दोहोलाक्आ आबोन आर ओनको तालारे बिसवा़स होतेते ओनकोवाक् मोने साफाकेत् ताकोते। एनडेखान नितोक् दो चेत् इया़ते इसोरपे बिडा़उएदेया, चेलाकोवाक् तारेनरे मित्टेच् आराँड़पे लादे लेगायेत्ते ओने ओकाटाक् आबोरेन हापड़ामको हों आर आबो हों बाबोन गोक् दाड़ेयात्? बिचकोमबोन पा़तिया़उ आकाना, प्रोभु जिसुवाक् दायातेबोन बाञचावक्आ ओनको लेकागे।
खान गादेल होड़ सानामको थिर हापेयेना, आर बारनाबास आर पावल ला़ला़इकानको आँजोमकेत्किना, ओकाको चिनहा़ आर हाहाड़ावाक्को इसोर दो जिहुदि बाहरेरेनको तालारे आ़किन होतेये का़मिआकात् आदो उनकिनकिन थिरेन खान जाकोब दो रोड़ रुवा़ड़केत्तेये मेनकेदा, ए बोयहा मिसराको आँजोम तिञपे। सिमोने का़इकेदा, चेत् लेका इसोर दो पा़हिल खोन जिहुदि बाहरेरेनकोय बेङगेत्आत्को जेमोन ओनको मोद खोन आयाक् ञुतुम ला़गित् निज होड़े हातावजोङ। आर नोवा तुलुच् ना़बिकोवाक् काथाको मिदुक्काना, ओलआकान लेका
नोवाको तायोमतेञ आ़चुरोक्आ
आर दा़उद रेयाक् ताहेनोक्आक् इञ बेनाव रुवा़ड़ा,
ओने ओकाटाक् ला़ँदुड़ आकान, आर ओना रेयाक् धाङधासेराक्कोञ बेनाव रुवा़ड़ा,
आर ओनाञ तेङगो रुवा़ड़ा।4
जेमोन मानवाकोरेन सारेच्को दो प्रोभुको ञाम बाड़ाये,
हें सानाम जिहुदि बाहरेरेनकोगे ओने ओनकोरे इञाक् ञुतुम मेनाक्,
प्रोभुइ मेनेदा ओने उनि ओनाकोय का़मियेत्, जुग खोन बाडायाक्कोगे।
ओना इया़ते इञाक् बिचा़र दो नोवाकाना जिहुदि बाहरेरेनको मोद खोन इसोर सेच् आ़चुरोक्को दो आलो बोन मुसकिलकोमा। मेनखान बोन चिठियाकोमा, जेमोन मुरहुत् सेवाते भोंडोक् खोन, आर लोटघुटि खोन, आर लिमबा़त् गोच्को रेयाक् जेल खोन आर माँयाँम खोन साहाड़ाकानको ताहेन।5 एनते मोसेयाक् आ़न दो सेदाय खोनगे मिमित् नागराहारे पोपोरचारको मेनाक्कोताया, जिरा़उक् माँहाँ पिछे सुना़गोगकोरे पाड़हावक् कानतायते।
जिहुदि बाहरेरेन बिसवा़सिको ठेन चिठि
खानगे आपोसतोलको आर मुरुबिको दो गोटा का़लिसिया़रेनको साँवते बेसको मेतात्आ आको मोद खोन होड़ बाछावकाते, पावल आर बारनाबास साँवते आनटिओखिया़तेको कोलको ला़गित्। आर बारसाबासको मेताय जिहुदा़, आर सिलास बिसवा़सिको तालारे मुखिया़ होड़किनको बाछावकेत्किना। आदो ओलकाते ओनको तितेको कोलकेदा,
आले आपोसतोलको आर मुरुबि बोयहाको आनटिओखिया़, आर सुरिया़ आर किलिकिया़रे मेनाक्पे जिहुदि बाहरेरेन होड़ खोन ओडोक हेच्एन बोयहा मिसराकोले जोहारापे काना। आलेले आँजोम आकादा, आले ठेन खोन ओडोक सेन आकान आदोम आदोम होड़ दो काथातेको हादोस आकात्पेया, आपेयाक् जिविको दुक ओचोवाकात् तापेया, ओने ओनको आले दो बाले हुकुमाकावात्को, ओना इया़ते आले दो मित् मोनोक्ते बेसले मेतात्आ जेमोन होड़ बाछावकाते आपे ठेनले कोलकिन, दुला़ड़िया़ बारनाबास आर पावल सोङगेते उनकिन होड़गे। ओने ओकोय आबोरेन प्रोभु जिसु मा़सियाक् ञुतुमते जिविकिन आलाय आकात्ता़किन। ओनाते जिहुदा़ आर सिलासले कोल आकात्किना, ओने उनकिन आ़किन हों मोचाते इना़कोगेकिन ला़इयापे, ओकाकोले ओल आकात्। एनते सोनोत जिउ आर आले हों बेसले मेतात्आ जेमोन बा़ड़ति बोजहा चेत् हों आलोले लादेयापे, नोवाको जा़रुड़ाक् छाडा दो बाङमा “बोङगा सामाङाक्को खोन आर माँयाँम खोन, आर लिमबा़त् गोच्को रेयाक् जेल खोन आर लोटघुटि खोन साहाड़ाकानपे ताहेन, ओनाको खोन सोनतोराकानपे ताहेन खान बेसगे होयोक्तापेया। नापाय ओकोच्ते ताहेनपे।”
आदोको बिदा़येन खान आनटिओखिया़तेको चालावेना, आर गादेल होड़को जारवाकेत्कोते ओना चिठिको एमात्कोवा। आर ओनको दो ओना पाड़हावकेत्तेको रा़सका़येना जिवि राड़ेच्आक् ञुतुमते। आर जिहुदा़ आर सिलास दो आ़किन हों ना़बिकिन ताहेंकानते, आ़डि ओकोच् काथाते बोयहाकोवाक् जिविकिन राड़ेच्केत् ताकोवा आरकिन दिड़होकेत्कोवा। आदो तिन उडि दिन चोङ ताहेंकान सुलुकते बोयहाको ठेन खोनकिन बिदा़येना आ़किन कोललेत्किनको ठेन रुवा़ड़ ला़गित्। मेनखान सिलास दो ओंडे ताहेन बेसे मेतात्आ।
आर पावल आर बारनाबास दो आनटिओखिया़रेकिन ताहेंयेना, ढेर एटाक्को साँवते प्रोभुवाक् काथाकिन चेत्आकोवा आरकिन पोरचाराको कानगे।
पावल आर बारनाबास तालारे बेगारोक्
आदो तिन दिन तायोमते चोङ पावल दो बारनाबासे मेतादेया, देलाङ रुवा़ड़ सेनकाते बिसवा़सिकोलाङ हिरिकोवा मिमित् नागराहारे, ओने ओकाकोरे प्रोभुवाक् काथालाङ जा़हिरलेत्, भाला चेत् लेका मेनाक्कोवा। आर बारनाबास दोए मोने आकावान ताहेंकाना, मा़रकुसको मेताय जोहान इदि तोराये ला़गित्। मेनखान पावल दो बेसे मेतात्आ उनि ओकोय पामफिलिया़रेये बा़गि ओटोवात्किन आर का़मि ला़गित् आ़किन तुलुच् बाय सेनलेन, उनि जेमोन आलोकिन इदि तोराये। नोवा बाबोतरे उनकिन तालारे काथा बाङ जुरिलेनतेकिन बेगारेना, आर बारनाबास दो मा़रकुस इदि तोराकेदेते जाहाजते कुपरोसतेये चालावेना। मेनखान पावल दो सिलास बाछावकेदेतेये ओडोक चालावेना, बिसवा़सिको प्रोभुवाक् दायारेगेको जिमा़केदेते। आर सुरिया़ आर किलिकिया़ तालाते पारोम चालाव इदियेनते का़लिसिया़कोरेनकोय दिड़हो इदिकेत्कोवा।
Source notes (5)
- Cross-reference लेबि १२:३
- Cross-reference आ का़ १०:१-४३
- Cross-reference आ का़ २:४; १०:४४
- Cross-reference आमो ९:११-१२
- Cross-reference एकसो ३४:१५-१७; लेबि १७:१०-१६; १८:६-२३
Santhali Project. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.