Santhali Project
आपोस का़मि 14
इकोनियम रे
आर इकोनियोमरे उनकिन दो मित्तेगे जिहुदिकोवाक् सुना़गोगतेकिन बोलोयेना आर ओनकोकिन गालमारावात्कोवा, ओनाते जिहुदिको आर जिहुदि बाहरेरेनको खोन आ़डि उता़र होड़को पा़तिया़वेना। मेनखान ओनको बेपा़तिया़उक् जिहुदिको दो जिहुदि बाहरेरेनकोवाक् मोनको उसकुर आरको बा़ड़िच्केत्ताकोवा, बोयहाको बिरुदरे। आदो पावल आर बारनाबास ढेर ञोक् दिन ओंडे किन ताहेंयेना, प्रोभुरे सोहोसाते रोरोड़तेगे, ओने उनि आच् भोर ञामआकात् रेयाक् काथाय गोहावाक्कान ताहेंकान उनकिन तिते चिनहा़को आर हाहाड़ावाक्कोय होय ओचोकेत्ते। मेनखान नागराहारेन गादेल होड़ दोको बार दोलेना, आदोम दो जिहुदिको सेच्को ताहेंकाना, आर आदोमको दो आपोसतोलकिन सेच्। आदो जिहुदि बाहरेरेनको आर जिहुदिको हों आकोरेन मुखिया़को लागायते उनकिन बेमानोत आर तिञकिन ला़गित्को गोटा केदा। आर ओनाकिन बाडाय ञामकेत् खान लुका़उनिया़ रेयाक् नागराहा लुसतरा़ आर डेरबे ओनाकिन बेड़हाय तेयाक् टोठातेकिन दा़ड़केदा। आर ओंडे भागे सोमबातकिन पोरचार केदा।
लुसतरा़ आर डेरबेरे का़मि
आर लुसतरा़रे जाङगा बाङ मुरुकोक्ताय मित् होड़े दुड़ुप् आकान ताहेंकाना एङगात कुखि खोन लेडहायिच्गे ओने ओकोय तिस हों बाय दाँड़ाँ बाड़ावाकात् ताहेंकाना। उनि दो पावल गालमाक्रावकाने आँजोम केदेया, आर नुय दो उनि बेङगेत् उरिच् आदेते आर बोगे ओचोक् ला़गित् बिसवा़स मेनाक्ताया मेनतेये ञेलकेत्ते, आँट आड़ाङतेये मेनकेदा, “आमाक् जाङगाते सोजहे तेङगोनमे।” खानगे उनि दो दोन बेरेत्एनतेये दाँड़ाँ बाड़ाकेदा। आदो गादेल होड़ पावले का़मिकेत्आक्को ञेलकेत् खान होहोवाते लुका़उनिया़ पा़रसितेकिन मेनकेदा, “देबको दो मानवा छिनते आबो ठेनको फेड हेच् आकाना।” आर बारनाबास दो जेयुसको ञुमकेदेया, आर पावल दो हेरमेस, उनिगे रोरोड़रे चोलोनतिये ताहेंकान इया़ते। आर जेयुसरेन नायके दो ओने उनियाक् थान दो नागराहा सामाङ ठेन ताहेंकान डाङगराको आर गुतु बाहा मालाको फाटोक ठेन आ़गुकाते गादेल होड़को साँवतेये तेङगेन ला़गिदोक्कान ताहेंकाना।
खान बारनाबास आर पावल आपोसतोलकिन ओनाकिन आँजोमकेत् खान आ़किनाक् किचरिच् ओड़ेच्केत्ते गादेल होड़को ठेनकिन ञिर जालात्एना, आर होहोवातेकिन मेनकेदा, ए हो चेदाक्पे नोनकायेदा? आ़लिञ हों चोङ आपे लेका दुक सुक जोजोम मानवा कानगेलिञ, भागे सोमबातलिञ पोरचारापे काना, जेमोन नोवा आ़उड़ियाक्को खोन जिवेत् इसोर सेच् पे आ़चुरोक्, ओने उनि सेरमारे आर धा़रति, आर जालापुरि आर ओनाकोरे मेनाक् सानामाक्ए बेनाव आकात्।1 ओने उनि चालावेन पिड़हिरेन सानाम होड़को आको आकोवाक् पा़तिया़उक् रेयाक् होरतेये सेन ओचोवात्को। एनरेहों आच् दो बेगोर गोहाते दो बाय ताहेंहेच् आ़गुवाकाना, उनिये भा़ला़इ आ़क्गुकान सेरमा खोन जा़ड़िदाक् आर साँवाँय दिनकोय एम आ़गुवापे कान, जोमाक् आर रा़सका़ते आपेयाक् ओनतोरे पुरुनेत्तापेया। आर नोवाको काथाते गादेल होड़ आलोको तेङगेनाकिना मेनते आ़डि कुरुमुटुकातेकिन आकोटकेत्कोवा।
मेनखान आनटिओखिया़ आर इकोनियोम खोन जिहुदि होड़ ओंडेको हेच्एना आर गादेल होड़को रा़मजा़उकेत्कोते पावल दो धिरितेको तिञकेदेया, आर नागराहा बाहरेतेको ओर गिडिकादेया, गोच्एनाय मेनतेको बुजहा़उकेत्ते। मेनखान चेलाको उनिको तेङगो आ़चुराकादे ताहेंकानरे उनि दो बेरेत्एनते नागराहातेये बोलोयेना आर दोसार हिलोक् दो बारनाबास तुलुच् डेरबेतेये ओडोक चालावेना।
सुरिया़ खोन आनटिओखिया़ते रुवा़ड़ोक्
आर डेरबे रे भागे सोमबात पोरचारकाते ढेरकिन चेलाकेत्को खान लुसतरा़, इकोनियोम आर आनटिओखिया़तेकिन रुवा़ड़ेना, आर चेलाकोवाक् मोनकिन दिड़होकेत्ताकोवा, आरकिन सिखा़उ पाड़हावकेत्कोवा, जेमोन बिसवा़सरे जामाड़ाकानको ताहेन, आर बाङमा आ़डि सानताव तालाते इसोराक् राजते बोलोक् होयोक्ताबोना। आदो मिमित् का़लिसिया़रे ओनको ला़गित् मुरुबिकोकिन बाछाव बाहालकेत्को खान, उपा़साते कोयकाते प्रोभु ठेनकिन जिमा़केत्कोवा, ओने उनिरेको पा़तिया़वाकान।
आर पिसिदिया़ तालाते पारोमकाते पामफिलिया़रेकिन सेटेरेना। आर पेरगारे काथाकिन गालमारावात्को खान आतालिया़तेकिन चालावेना। आर ओंडे खोन दो जाहाजते आनटिओखिया़तेकिन चालावेना, ओने ओका खोन इसोराक् दायातेकिन जिमा़ ओचोलेन ओना का़मि ला़गित् ओकाटाक् नितकिन पुरा़उआकात्।
आदो सेटेरकाते का़लिसिया़रेनको जारवाकेत्कोतेकिन ला़इयात्कोवा तिना़क् इसोर दो आ़किन तुलुच्ए का़मिआकात्, आर चेत् लेका जिहुदि बाहरेरेनको बिसवा़स रेयाक् दुवा़रे झिच् आकावात्को। आर चेलाको साँवते ढेर दिनकिन ताहेंयेना।
Source notes (1)
- Cross-reference एकसो २०:११; देउ १०:१७; सेरे १४६:६
Santhali Project. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.