Tingoḏi'i 16

Sawo'o tumudingi Ma Jou'ongu Madutu 'ai borata

1Ḏua ngoi to 'isene iḏingi siduga-duga ra Ma Jou'ongu Madutu 'ai Wala ma dara ino, kanau i'a toma mala'ekata tumudingi gena-ge, “Tagi na pa'ala sawo'o tumudingi ma dara, ga'a 'age Ma Jou'ongu Madutu 'ai borata toma dungia.”

2Mala'ekata ma mulaingi 'o tagi 'a pa'ala 'ai sawo'o ma dara toma dungia. Ḏua ngowa'a mo-moini toma dungia ga'a 'aḏi sanga ḏua nana'o haiwani gena-ge re ngowa'a ga'a 'aḏi silamo'o re siḏubuso dulada haiwani gena-ge, ananga mo-moini 'aḏi sanga si-siḏi bu'u ma jira.1

3Pasala i'a, mala'ekata ma nyo-nyoimi romoḏiḏi 'a pa'ala 'ai sawo'o ma dara toma ngoloto. Ḏua 'o ngoloto 'i dadi ma tero sa'olo ngowa'a senge-sengene manga ngaunu. Dadi makhluk mo-moini toma ngoloto 'i sengene mo-moini.

4Gena ḏua, mala'ekata ma nyo-nyoimi ro'ange 'a pa'ala sawo'o ma dara toma ḇanyo ma lese re ḇanyo ma 'utu'u. Dadi ḇanyo mo-moini 'i dadi ngaunu.2 5Ḏua, ngoi to 'isene mala'ekata ga'a 'ai kuasa toma ḇanyo 'o kanau,

“Ma Jou'ongu Madutu ga'a 'O 'Ofi-'Ofi ma pari cua,

Ma Jou'ongu Madutu ga'a 'age nange-ne re toma 'ua re 'au wali!

'Ani hukumu ga'a siḏingoto toma dungia gena-ge 'i 'adili.

6Sababu ananga ya sipa'ala ḏua 'Ani ngowa-ngowa'a re nabi-nabi manga ngaunu.

Sababu gena-ge nange-ne, Ma Jou'ongu Madutu no si'a'a ananga 'aḏi ka'e ngaunu ḏi'i.

Tero mode'e, ananga balasu sanga so'o gena!”

7Ḏua ngoi to 'isene iḏingi toma tau'u jou-jou ma ngi'i ino ma betongo so'o ne:

“Ya, Ma Jou ga'a Ma Jou'ongu Madutu, Unanga ga'a 'Ai kuasa ma pari cua,

Unanga 'o singe-ngeta'a 'Ai hukumu gena-ge ga'a 'i 'adili re banari!”

8Pasala i'a, mala'ekata ma nyo-nyoimi rata 'a pa'ala sawo'o ma dara toma wangere ma la'o. Dadi ngowa'a mo-moini na'o wangere ma la'o ya'u 'erese, ananga 'aḏi ro'u sababu ma sa-sau'u siḏi woḏi. 9Ngowa'a ga'a 'aḏi ro'u toma wangere ma sa-sau'u, ananga gena-ge 'aḏi sosowini Ma Jou'ongu Madutu 'ai lomanga ga'a 'o kuasa toma bahala mo-moini gena-ge. Kalaha ananga 'aḏi sanga bahala gena-ge, ananga 'aḏi maḏibo ua toma ngo'omo boloto, re ananga 'aḏi oḏu'u puji re silamo'o Ma Jou'ongu Madutu 'ai kabasarana.

10Ḏua mala'ekata ma nyo-nyoimi romotoa 'a pa'ala sawo'o ma dara toma haiwani ma mulaingi ma ḏe-ḏegoro. Dadi haiwani ma pareta mo-moini 'i dadi hafu-hafu re manusia ya goḏi manga yai'i sababu sangisara siḏi woḏi.3 11Ḏua ananga gena-ge 'aḏi sosowini Ma Jou'ongu Madutu toma soroga sababu ananga manga bu'u-bu'u ma sa'ara siḏi woḏi. Mada'a ananga 'aḏi maḏibo ua toma ngo'omo boloto re ya sieanga i'a ua 'aḏi 'a'a 'ori i'a ma jira.

12Pasala i'a, mala'ekata ma nyo-nyoimi rarama 'a pa'ala 'ai sawo'o ma dara toma ḇanyo lamo'o, ma lomanga Efrat. Dadi ḇanyo gena-ge 'i dudungu singadolo 'olana-'olana toma wangere ma la'o ino nyengara 'aḏi tagi ya tola'a i'a.4 13Ḏua ngoi to oḏi'i roh ma jira ro'ange ma duhu sa'olo papa'a: Papa'a ngai moi 'i supu toma naga ma madanga, ngai moi toma haiwani ma madanga, re ngai moi ḏi'i toma nabi sa-sakala 'ai madanga. 14Roh-roh ma jira ro'ange gena-ge 'i 'a'a didina'o heranga re 'i tagi toma 'olana-'olana toma dungia sitabi donga di'a 'i lomu ananga di'a 'aḏi maparangi toma wangere lamo'o. Gena-ge Ma Jou'ongu Madutu 'Ai wangere, Unanga ga'a 'Ai kuasa ma pari cua, wakutu Unanga 'o sijuruhakimi ngowa-ngowa'a mo-moini.

15Ma Jou Yesus 'o kanau, “Na 'isene, Ngoi ḏuanga i'a to sapolo sa'olo ngowa'a to-tori'i. Bara'utungu ngowa'a ga'a ma'istiari tau-taunu re 'aḏi maḏu-ḏuanga ḏua manga pakeanga, la wakutu Ngoi ḏuanga i'a to sapolo ngowa'a gena-ge awa 'aḏi tagi mawa-watolo. Dadi ananga 'aḏi mara'a ua toma mandan manga biono.”5

16Pasala i'a roh-roh ma jira gena-ge 'i lomu 'olana-'olana toma ngi'i rimoi, toma demo 'Ibrani si'aro'o “Harmagedon.”6

17Gena ḏua, mala'ekata ma nyo-nyoimi tumudingi 'a pa'ala 'ai sawo'o ma dara toma ngawa-ngawa. Dadi to 'isene iḏingi lai siḏi ra Ma Jou'ongu Madutu 'ai ḏe-ḏegoro Tai wala ma betongo so'o ne: “Togumu ḏua!” 18Ḏua 'i dadi ḇeḇelanga cawi-cawi re 'o murasa 'i te'iri ma'u sango-sangoro re 'o wusu siḏi madutu. Mulaingi wakutu Ma Jou'ongu Madutu 'o sidadi manusia singadolo nange-ne, sanga nyangu wusu ma siḏi so'o nena-ne.7 19Limau lamo'o Babel gena-ge 'i polongara dadi balangu ro'ange re toma nagara-nagara toma dungia sitabi donga ma limau-limau mo-moini 'i pinya'olo. Ḏua Ma Jou'ongu Madutu 'a si'elingi ie limau lamo'o Babel ma ngowa'a manga kajahatana. Dadi Unanga 'o si'a'a ananga gena-ge 'aḏi ka'e 'Ai 'anggur toma sawo'o. 'Ai 'anggur ma ngale: 'Ai borata 'i kekolo.8 20Pulo re kie mo-moini 'i iranga.9 21Besa'a 'es maḏi ma lamo'o 'i 'uci: rimoi-rimoi ma ḏubuso kilo nyagi romotoa. Enanga 'i eta'a da'u diwanga tala be-be'ara ngowa-ngowa'a. Ḏua ananga 'aḏi sosowini Ma Jou'ongu Madutu sababu bahala besa'a 'es maḏi gena-ge.10