Sahu Bible
Tingoḏi'i 15
Mala'ekata nga tumudingi rema bahala ma ḏo-ḏogumu
Gena ḏua, ngoi to oḏi'i toma soroga 'i dadi didina'o rimoi ga'a heranga masala ma pari cua. 'Age mala'ekata nga tumudingi rema bahala tumudingi ga'a ma ḏo-ḏogumu ḏua. Sababu Ma Jou'ongu Madutu 'a sipa'ala 'Ai borata ma ḏo-ḏogumu reo bahala gena-ge.
Gena ḏua, ngoi to oḏi'i 'ori i'a rimoi sa'olo ngoloto kaca 'i ma'u capuru reo u'u. Ngoi to oḏi'i ḏi'i ngowa-ngowa'a ga'a raḏi sita'aloko haiwani re dulada haiwani. Ananga gena-ge 'aḏi silamo'o re siḏubuso ua haiwani bolo dulada haiwani re sanga ua nana'o haiwani ma nyo-nyoimi.1 Ngowa-ngowa'a ga'a raḏi 'utungu 'aḏi made-de'oso toma ngoloto kaca ma 'uḏu re 'aḏi gu'u-gu'u kecapi ga'a Ma Jou'ongu Madutu 'o pula'a ḏua ra ananga. Ananga ya sinyanyi 'a Musa 'ai nyanyi, unanga ga'a to de-de'oso Ma Jou'ongu Madutu ma tero sa'olo 'Ai budaka,2 re sinyanyi Doba ma Ngowa 'ai nyanyi,
“Ma Jou ga'a Ma Jou'ongu Madutu, Unanga ga'a 'Ai kuasa ma pari cua,
'Ani munara 'i heranga masala,
Ma Jou'ongu Madutu no dadi bangsa-bangsa manga 'Olana.
'Oru ḇato Ma Jou'ongu Madutu no 'a'a, enanga 'i 'adili re banari.3
'A guna 'o mojongo ua Ma Jou'ongu Madutu?!
'A guna 'o oḏu'u siajele 'Ani kabasarana, Ma Jou'ongu Madutu?!
Pa'i Ma Jou'ongu Madutu masiretene ḇato no 'Ofi-'Ofi.
Bangsa mo-moini ḏuanga i'a 'aḏi sapolo
re 'aḏi silamo'o re siḏubuso Ma Jou'ongu Madutu,
sababu ngowa'a repe raḏi oḏi'i 'Ani munara loasa re banari.”4
Gena ḏua, ngoi to oḏi'i toma soroga Ma Jou'ongu Madutu 'ai Wala, gena-ge Unanga 'ai suyu'u, ma ngalana 'i welanga.5 Ḏua mala'ekata nga tumudingi ga'a gu'u bahala tumudingi gena-ge 'aḏi supu ra Ma Jou'ongu Madutu 'ai Wala ino. Ma pakeanga reo ḇa'a lenan kama faja ua re 'i jama-jamanga, re ananga manga katere 'a sirangi reo ban ga'a si'a'a reo guraci. Gena ḏua, 'age makhluk rimoi toma makhluk nga ḏuata ma sigolona, 'i pula'a sawo'o guraci tumudingi toma mala'ekata ma nyo-nyoimi tumudingi. Sawo'o guraci gena-ge 'i romanga reo Ma Jou'ongu Madutu 'ai borata, Unanga gena-ge ga'a 'o 'ahu kasingado-ngadolo i'a. Ḏua Ma Jou'ongu Madutu 'ai Wala gena-ge ma dara 'i romanga reo loworo. Loworo gena-ge ma ngale Ma Jou'ongu Madutu 'Ai mulia re 'Ai kuasa. Re matengo i'a mai ua nga'unu osama ra Ma Jou'ongu Madutu 'ai Wala ma dara, singadolo mala'ekata nga tumudingi manga munara ri togumu. Mala'ekata gena-ge manga munara di'a gasa bahala ma ḏo-ḏogumu.6
Source notes (6)
- Footnote Gena-ge ma ngale haiwani ma lomanga
- Footnote Demo gena-ge toma demo Yunani: “'Ai budaka” mada'a toma konteks gena-ge ma ngale: ngomi ga'a ta Ma Jou'ongu Madutu ma tero sa'olo 'Ai budaka. Oḏi'i demo budaka toma kamus.
- Cross-reference Sup. 15:1
- Cross-reference Yer. 10:7; Nya. 86:9
- Cross-reference Sup. 38:21
- Cross-reference Sup. 40:34; 1'Oln. 8:10-11; 2Taw. 5:13-14; Yes. 6:4
Sahu Bible. Copyright © The Seed Company. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.