1. Samuilo 9

O Saul si odabirime palo caro

1Ande godoja vrjama trajilas jek but ugledno manuš andar Venijaminesko pleme savo akhardolas Kis. Vo sas e Avielesko čhavo. O Aviel sas e Ceroresko čhavo. O Ceror sas e Behoratesko čhavo. A Behorat sas e Afiahesko čhavo.

2E Kise sas šukar terno čhavo, po alav Saul, lešće maškar e Izraelcurja khonik nas ravno po šukaripe, a sas majvučo palo šoro katar sa aver.

3Jekhar hasajle e magarice e Kisošće, e Saulešće dadešće. O Kis phendas e Saulešće, pire čhavešće: “Le tusa jećhe slugas, pa dža rode e magaricen.”

4Gajda o Saul nakhlo kroz e Efremešće gore thaj kroz o područje Šališa, ali či arakhline e magaricen. Nakhline vi kroz o područje Šaalim, ali e magarice nas ni inća. Askal nakhline vi kroz o Venijaminesko područje, ali ni okote či arakhline magaricen.

5Kana aresline ando područje Cuf, o Saul phendas pire slugašće savo sas lesa: “Ajde te boldas amen, kaj mungro dad či hala briga majbut pale magarice, a počnila te hal briga pale amende.”

6Ali o sluga phendas: “Ake, ande akava gav si jek Devlesko manuš savo si but poštujime. So god te phenel, godova gajda avel. Hajde džas inća. Šaj te phenela amenđe save dromesa te džas.”

7O Saul phučla e slugas: “Ako džas ke Devlesko manuš, so das les? Ande gone naj amen majbut hamasko, a naj amen nisosko poklon savo inđardamas lešće. So si amen?”

8O sluga phendas lešće: “Ake, man si cara rupune love. Dav len e Devlešće manušešće, a vo phenela amenđe save dromesa te džas.”

9(Varekana ando Izrael, kana džalas pe te e Devlestar rodel pe savet, phenelas pe: “Hajde džas ko vidovnjako”, kaj okoles saves ađes akharen “proroko”, varekana akharenas “vidovnjako”.)

10O Saul phendas e slugašće: “Lačhe phenes. Ajde džas.”

Thaj teljardine ando o gav kaj sas e Devlesko manuš.

11Dok džanas opre prema o gav, maladine e rakhljen save džanas palo paj, pa phučline lendar: “Dali si o vidovnjako akate?”

12Phendine lenđe: “Akate si, cara angle tumende. Samo siđaren, kaj ađes avilo ando gav, zato kaj o them pe uzvišica prinosil žrtva. 13Čim den ando gav, araćhena les majsigo nego so džal opre pe uzvišica te hal. O them či počnila te han dok vo či avel te blagoslovil e žrtva, pošto moraš te blagoslovil e žrtva. Zato odma džan opre ando gav, kaj akana šaj araćhena les.”

14Gajda von teljardine opre ando gav. Baš kana denas ando gav, dikhline e Samuile sar džalas prema lende e dromesa prema e uzvišica.

15A đes majsigo nego so o Saul avilo, o GOSPOD phendas e Samuilešće: 16“Thejara ande akaja vrjama bičhalava tuće jećhe manuše andar e Venijaminesko pleme. Les pomažisar palo vladari pe mungro them Izrael. Vo spasila mungre theme andar e vas e Filistejenđe. Kaj, dikhlem e nevolja mungre themešći. Lengo vapaj avilo dži mande.”

17Kana o Samuilo dikhla e Saule, o GOSPOD phendas lešće: “Godova si o manuš pale savo phendem tuće. Vo vladila pe mungro them.”

18O Saul avilo ko Samuilo pe kapija thaj phendas lešće: “Moliv tut, phen manđe kaj si e vidovnjakosko ćher.”

19O Samuilo phendas lešće: “Me sem godova vidovnjako. Hajde angla mande pe uzvišica. Ađes haja manca, a detharinako majsigo nego so mukav tut te džastar phenava tuće sa so pašljol tuće po ilo. 20A pale magarice save hasardan majsigo trin đes, na ha briga, arakhline len. A pale kaste o sasto Izrael čeznil, ako na pale tute thaj pale ćiri familija?”

21A o Saul phendas: “Ali me sem andar e Venijaminesko pleme, andar majcikno izraelsko pleme, a mungro rodo si majcara džanglo katar sa Venijaminešće rodurja. Sostar ćeres manca svato askal agajda?”

22O Samuilo askal inđarda e Saule thaj lešće slugos ande soba thaj čhuta len po čikat e sinijaći, pale savi već sas varekaj katar trijanda akharde manuša.

23O Samuilo phendas e kuvarešće: “An okova kotar mas savo dijem tute thaj phendem tuće te čhos les pe rig.”

24O kuvari lijas o buto thaj čhuta les anglo Saul, a o Samuilo phendas: “Ake, angla tute si okova so muklam tuće. Ha, kaj akava mukla pe pale tut baš pale akaja posebno prilika još kana phendem: ‘Akhardem gosten.’ ”

Gajda o Saul godova đes halas e Samuilesa.

25Kana katar e uzvišica fuljistine ando gav, e Saulešće lačhardine kreveto po krovo e ćheresko1.

26Uštiline anda detharin, a o Samuilo čhuta muj e Saulešće savo sas po krovo: “Spremisar tut, te isprativ tut po drom!”

O Saul spremisajlo thaj e Samuilesa inkljisto avri.

27Kana avile dži ko krajo e gavesko, o Samuilo phendas e Saulešće: “Phen e slugašće te džal anglal, a tu ačh cara akate, te phenav tuće o alav e Devlesko.”

Thaj gajda o sluga đelo anglal.