Chergash New Testament
1. Samuilo 3
O Del akharel e Samuile
O terno čhavo Samuilo služilas e GOSPODEŠĆE tale Elijesko nadzor. Ande godoja vrjama o GOSPOD retko ćerelas svato e manušenđe, a ni e proročke vizije nas česte.
Jek rjat o Eli pašljolas pe piro kreveto. Lešće jakha sas gadići slabe kaj phares vareso šaj dićhelas. E svetiljka ande GOSPODESKO Šator još nas mudardi, a o Samuilo sovelas okote, a okote sas vi e Devlesko Kovčeg.
O GOSPOD akharda e Samuile, a vo phendas: “Akate sem!”
Prastaja ko Eli thaj phendas: “Akate sem, akhardan man.”
Ali o Eli phendas lešće: “Či akhardem tut. Bolde tut ando kreveto.”
Thaj o Samuilo bolda pe ando kreveto.
O GOSPOD palem akharda les: “Samuilo!”
Vo uštilo, đelo ko Eli thaj phendas: “Akate sem, akhardan man.”
Ali o Eli phendas: “Či akhardem tut, čhaveja. Bolde tut ando kreveto.”
O Samuilo još či pindžarelas e GOSPODE, kaj o GOSPOD još či ćerdas svato lesa.
O GOSPOD akharda e Samuile po trito drom, a vo uštilo, đelo ko Eli thaj phendas: “Akate sem, akhardan man.”
Askal o Eli haćardas kaj o GOSPOD akharel e čhave, pa phendas lešće: “Dža pašljov, ako palem akharel tut, phen: ‘Mothov GOSPODE. Ćiro sluga čhol kan tute.’ ”
Thaj o Samuilo đelo thaj pašljilo ando kreveto.
Askal o GOSPOD avilo thaj ačhilo okote, akharda e Samuile sago vi majranije: “Samuilo! Samuilo!”
A o Samuilo phendas: “Mothov. Ćiro sluga čhol kan tute.”
O GOSPOD phendas e Samuilešće: “Ake, ćerava ando Izrael vareso katar soste svakonešće ko pale godova ašunela ande liduj kan zazuila. Godova đes ćerava sa so phendem protiv o Eli thaj lešći familija, katar o početko dži ko krajo. Phendem e Eliješće kaj lešće familija osudiva zauvek, zbog sa lenđe bezeha. Džanelas kaj lešće čhave či sikavenas manđe poštovanje godolesa so ćerenas, a či ćerda lenđe khanči. Zato hav solah e Eliješće familijaće kaj nisošći žrtva, niti prinos či thovela e doš katar e lešći familija.”
O Samuilo ačhilo ando kreveto dži ke detharin, a askal putardas o vudar katar e GOSPODESKO Šator. Sas lešće dar te mothol e Eliješće piri vizija.
Ali o Eli akharda les: “Samuilo, čhaveja mungreja!”
O Samuilo phendas: “Akate sem.”
O Eli phendas lešće: “So o Del phendas tuće? Na garav mandar khanči. O Del neka majstrogo kaznil tut ako vareso garaves mandar katar okova so o Del phendas tuće.”
Thaj o Samuilo mothoda lešće sa, khanči či garada lestar.
Askal o Eli phendas: “Vo si o GOSPOD. Neka ćerel sar si majlačhe ande lešće jakha.”
O Samuilo barjolas, a o GOSPOD sas lesa thaj či mućelas te na avel pherdo vareso so o Samuilo phendas. Gajda sa e manuša andar o sasto Izrael, katar o Dan po sever dži ke Beer-Ševa po jugo, dikhla kaj o Samuilo si čače proroko e GOSPODESKO. O GOSPOD vi majdur sikavelas pe ando Šilo, kaj ćerelas svato e Samuilesa.
Chergash New Testament. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.