1. Samuilo 4

1A okova so o Samuilo phenelas ašundilo po sasto Izrael.

E Filistejcurja otmin o Kovčeg e savezosko

Kana e Izraelcurja teljardine ando rato protiv e Filistejcurja, utaborisajle ko Evenezer, a e Filistejcurja ko Afek. 2E Filistejcurja ačhiline ande bojne redurja prema e Izraelcurja, pa teljardas e bari bitka. E Filistejcurja pobedisardine e Izraelcen thaj mudardine štar milje manušen po bojno polje.

3Kana e vojska bolda pe ando tabor, e izraelske starešine phučline: “Sostar o GOSPOD ađes mukla te e Filistejcurja pobedin amen? Hajde te anas o Kovčeg e GOSPODEŠĆE savezosko andar o Šilo, te avel paše amende thaj spasil amen andar e vas amare dušmajengo.”

4Gajda e vojska bičhaldas e manušen ando Šilo thaj akala andine o Kovčeg ande savo sas o savez e GOSPODESKO savo si pe sa e vojske thaj bešel po prestolje maškar e heruvimurja. A uz o Kovčeg e Devlešće savezosko sas vi duj Eliješće čhave: o Hofni thaj o Pinhas. 5Kana o Kovčeg e GOSPODEŠĆE savezosko areslo ando tabor, sa e Izraelcurja počnisardine gaći glasno te veselin pe kaj ćhinosajli e phuv.

6E Filistejcurja ašundine vika thaj phučline: “Sošći si okoja vika ando Izraelsko tabor?”

Kana saznaisardine kaj godova o Kovčeg e GOSPODEŠĆE savezosko areslo ando tabor, 7darajle thaj phendine: “E devla aresline ando tabor! Teško amenđe! Godova dži akana nas! 8Teško amenđe! Ko spasila men andar e vas godole moćne devlenđe? Godova si okola devla save e Egipćanen ande pustinja pekline e svakakve bilačhipeja! 9Ohrabrin tumen! Inćaren tumen muški, Filistejcalen, te na aven roburja e Izraelconenđe, sago kaj sas von roburja tumenđe. Inćaren tumen muški thaj borin tumen!”

10Askal e Filistejcurja napadnisardine e Izraelcen, save našline svako pire ćherešće. Sas godova baro mudaripe: trijanda milje Izraelošće vojnikurja peline ande bitka. 11A e Filistejcurja otmisardine e Devlesko Kovčeg, a o Hofni thaj o Pinhas, e duj Eliješće čhave, sas mudarde.

E Elijesko smrto

12Godova đes jek andar e Venijaminesko pleme našlo andar o bojno polje ando Šilo, pharade drzenca thaj e čhorde prahosa po šoro te sikavel o žalovanje. 13Baš kana vo avelas, o Eli bešelas pašo drom pe piri stolica thaj posmatrilas, kaj daralas zbog e Devlesko Kovčeg. Kana okova manuš dija ando gav thaj phendas so sas, sasto gav zakukisarda.

14O Eli ašunda o kukipe, pa phučla: “Sošći si godoja buka?”

Okova manuš siđardas te javil e Eliješće. 15E Elije sas askal injavardeš thaj ohto brš, a lešće jakha gaći oslabisardine kaj majbut či dićhelas. 16O manuš phendas e Elieše: “Aresav katar o bojno polje. Ađes našlem okotar.”

O Eli phučla les: “Sar sas, čhaveja mungreja?”

17O glasniko phendas: “E Izraelcurja našline angle Filistejcurja. E vojska pretrpisardas baro poraz. Ćire duj čhave, o Hofni thaj o Pinhas, mudarde si, a e Devlesko Kovčeg si otmime.”

18Kana okova manuš spomenisarda e Devlesko Kovčeg, o Eli, purano thaj pharo, pelo palpale dumenca katar e stolica, pašo vudar, phagla e kor thaj mulo. O Eli sas sudija ando Izrael štarvardeš brš.

19A e Eliešći bori, e Pinhasešći romnji, sas phari thaj samo so či bijanel. Kana ašunda kaj si e Devlesko Kovčeg otmime thaj kaj si lako sokro thaj lako rom mule, zgrčisajli katar e dukha thaj bijanda. Ali naštik inćarda e dukha.

20Dok merelas, e manušnja save sas paše late phendine: “Na dara, bijandan čhaves!”

Ali voj khanči či phendas, niti sikada kaj ačhilo laće ke godova.

21E čhavrešći dija alav Ihavod1, kaj phendas: “E Devlešći slava đelitar andar o Izrael”, zato kaj sas otmime e Devlesko Kovčeg thaj kaj muline lako sokro thaj lako rom. 22Zato phendas: “E Devlešći slava đelitar andar o Izrael, kaj si otmime e Devlesko Kovčeg.”