1. Samuilo 25

E Samuilesko smrto

1O Samuilo mulo, thaj sa o Izrael ćida pe thaj žalilas pale leste. Prahosardine les ande lesko gav ande Rama. A o David đelo tele ande pustinja Paran.

O David thaj o Naval

2Ando Maon trajilas jek manuš saves sas imanje ando Karmel. Sas but barvalo: sas les trin milje bakhre thaj milja buznja. Baš ande godoja vrjama randelas pire bakhren ando Karmel. 3Akhardolas Naval, a lešći romnji akhardolas Avigajila. Voj sas šukar thaj gođaver manušnji, a lako rom, savo sas e Kalevesko potomko, sas grubo thaj bilačho manuš.

4Kana o David ande pustinja ašundas kaj o Naval randel e bakhren, 5bičhaldas deše slugen thaj phendas lenđe: “Džan ko Naval opre ando Karmel thaj pozdravin les ande mungro alav. 6Phenen lešće: ‘Neka avel tut lungo trajo ando miro! Miro tuće thaj ćire ćherešće thaj savorešće so si ćiro! 7Ašunav kaj akana randes e bakhren. Kana ćire pastirja sas amenca, či ćerdam lenđe khanči bilaćhe, niti vareso nestanisardas lenđe sa e vrjama dok sas ando Karmel. 8Phuč ćire slugen, thaj von phenena tuće. Zato av lačho prema mungre sluge, kaj avas tute ande vrjama kana si o obilje. Moliv tut, de len, ćiren slugen, thaj manđe, ćire čhavešće e Davidešće, so šaj te des.’ ”

9Kana e Davidešće sluge aresline, phendine e Navalešće akaja Davidešći poruka, thaj ažućarenas.

10O Naval phendas e Davidešće slugenđe: “Ko si godova David? Ko si Jesejesko čhavo? But si sluge ande akala đesa save našen katar pire gospodarja. 11Sigurno či lava mungro mangro, mungro paj thaj o mas katar mungri stoka savi dijem čhurjasa pale manuša save randen mungre bakhren te dav e manušenđe save aven ko džanel katar!”

12Pe godova e Davidešće sluge boldine pe thaj đeline palpale. Kana aresline, phendine e Davidešće svako alav.

13Askal o David phendas pire manušenđe: “Neka savora len piro mačo pesa!”

Thaj savora line piro mačo, a o David lijas piro mačo. Varekaj katar štar šela manuša đele opre e Davideja, dok duj šela ačhile te len sama pe oprema.

E Avigajila sprečil e nevolja

14Jek katar e sluge phendas e Avigajilaće, e Navalešće romnjaće: “O David bičhaldas e glasnikonen andar e pustinja te amare gospodarešće anen lešće pozdravurja, a vo čhuta muj pe lende. 15Godola manuša sas but lačhe prema amende. Či ćerdine amenđe khanči žao niti vareso nestanisardas amenđe sa e vrjama dok samas ando polje paše lende. 16Đes thaj rjat sas amenđe zaštita sago bedem dok paše lende čarjarasas e bakhren. 17Akana gndisar thaj dik so ćereja, kaj o bilačhipe spremol pe amare gospodarešće thaj savorenđe ande lesko ćher, a amaro gospodari si bilačho manuš kašće khonik našti khanči te phenel.”

18E Avigajila sigo lijas duj šela mangre, duj mešine mol, pandž gata ćerde bakhren, pandž merice pržome điv, šel grudve šuće draka thaj duj šela presane koluturja smokve thaj sa godova natovarisarda po magarco.

19Askal phendas pire slugenđe: “Tumen teljaren anglal, a me džava pale tumende.”

Ali pire romešće e Navalešće či phendas khanči.

20Dok jašilas po magarco, fuljelas e planinsko dromesa. Angle late avilo o David pire manušenca thaj voj arakhla pe lenca.

21O David baš gindilas ande peste: “Zar ivja lavas sama ande pustinja pe sa so si akale manušes, te khanči či nestanil lešće. A vo boldel manđe bilačhipe palo lačhipe. 22Neka o Del majstrogo kaznil man ako dži detharin mukav po trajo i jećhe muško katar sa so si les!”

23Kana e Avigajila dikhla e Davide, sigo fuljisti katar o magarco, peli pe koča e mujesa dži ke phuv thaj poklonisajli lešće.

24Pošto gajda peli angla lešće pungre, phendas: “Gospodarina, neka sa e doš perel samo pe mande. Moliv tut, muk te me, ćiri sluškinja, ćerav svato tusa thaj čho kan mande. 25Moliv tut, na le sama pe okova bilačho Naval1. Vo si, baš sago kaj lesko alav phenel, bigođako thaj godova pratil les. Me ćiri sluškinja, či dikhlem ćire slugen saven tu gospodarina bičhaldan. 26Pošto, gospodarina, o GOSPOD akana bolda tut katar godova te čhores o rat thaj te osvetis tut ćire vastesa, hav solah e džude GOSPODESA thaj ćire trajosa, neka sa ćire dušmaja thaj okola save kamen tuće bilačhipe aven sago o Naval. 27Thaj neka akava poklon savo andem tuće, gospodarina, del pe e slugenđe save pratin tut. 28Moliv tut, jartosar mungri doš, gospodarina, kaj o GOSPOD sigurno učvrstila ćiri familija zato kaj tu vodis e GOSPODEŠĆE bitke thaj ande ćiro trajo či ćerdan nisosko bilačhipe. 29Ako vareko teljarel te progonil tut thaj kamen te mudaren tut, o GOSPOD, ćiro Del, araćhela ćiro trajo a ćire dušmanenđe trajurja avena čhudine sago o bar andar e praćka. 30Gospodarina, kana o GOSPOD ćerel sa okova lačhe so obećisarda tuće thaj kana čhola tut palo vladari po Izrael, 31či avela tut pe savest o baro pharipe zbog o rat savo či trubuja te čhorel pe thaj zbog e osveta savi lijan korkoro ćire vastesa. A kana o GOSPOD del tut uspeh, de tut gođi mande, ke ćiri sluškinja.”

32O David phendas e Avigajilaće: “Neka avel blagoslovime o GOSPOD, o Del e Izraelosko, savo ađes bičhalda tut manđe ando susret! 33Blagoslovime te aves zato kaj san gajda razumno thaj blagoslovime te aves zato kaj ađes ačhadan man te čhorav o rat thaj te osvetiv man mungre vastesa. 34Hav solah e džude GOSPODESA, e Izraelošće Devlesa, savo sprečisarda man te ćerav tuće bilačhipe, te či siđardan thaj či avilan dži mande, ni jek Navalesko muškarco či ačhilosas džudo dži ke detharin.”

35Askal o David lijas okova so voj andas lešće thaj phendas: “Dža ćhere ando miro. Čhutem kan tute thaj ćerava sar manglan mandar.”

E Naval merel

36Kana e Avigajila bolda pe ko Naval, vo ćerda ando ćher bari gozba sago palo caro. Sas lačhe raspoložime thaj but mato, zato voj dži detharin či phendas lešće khanči. 37A detharinako kana o Naval traznosajlo, lešći romnji sa mothodas lešće thaj les astarda ando ilo thaj vo ukočisajlo sago bar. 38Varekaj katar deš đesa majkasnije, o GOSPOD dija dab e Navale thaj vo mulo.

39Kana o David ašundas kaj o Naval mulo, phendas: “Neka avel blagoslovime o GOSPOD savo inćarda mungri rig protiv o Naval thaj osvetisardas o ladžavo savo vo čhuta pe mande. Sprečisardas man, pire slugas, te ćerav bilačhipe, a e Navalesko bilačhipe čhuta lešće po šoro.”

Pale godova o David bičhaldas poruka e Avigajilaće. Manglas latar te postanil lešći romnji.

40Lešće sluge đeline ando Karmel thaj phendine e Avigajilaće: “O David bičhaldas men te inđaras tut leste te aves lešći romnji.”

41Voj uštili thaj poklonisajli e mujesa dži ke phuv thaj phendas: “Me sem ćiri sluškinja, gospodarina, spremno sem te služiv tuće thaj te thovav e pungre ćire slugenđe.”

42Pe godova e Avigajila sigo bešla po magarco thaj ande pratnja pire pandže sluškinjenca, teljardas pale Davidešće glasnikurja, thaj postanisardas lešći romnji. 43O David sas oženime vi e Ahinoamasa andar o Jizreel, pa gajda sas les duj romnja. 44O Saul pire čhora e Mihala, e Davidešće romnja, dija e Paltijele, e Laišešće čhave, andar o Galim.