1. Samuilo 24

O David poštedil e Saulesko trajo

1Kana o Saul bolda pe andar e potera pale Filistejcurja, javisardine lešće: “Eke o David ande pustinja En-Gedi.”

2Askal o Saul odabirisarda trin milje vojnikurja andar sasto Izrael thaj teljarda te roden e Davide thaj lešće manušen. Rodine len ke Stene e divlje buznjenđi. 3E dromesa dine pe bakhrešće torurja, kaj sas vi jek pećina, ande savi dija o Saul te džal pešće avri. A o David thaj lešće manuša sas handuk andre ande pećina.

4E manuša phendine e Davidešće: “Akava si godova đes pale savo phenelas o GOSPOD kana phendas tuće: ‘Predaiva ćire dušmajen ande ćire vas, a tu ćer lenca so kames.’”

Askal o David čordane avilo leste majpaše thaj čhinda lestar o ćoško katar lesko ogrtači. 5Ali pale godova mučilas les e savest zbog godova, 6pa phendas pire manušenđe: “Na de GOSPODE te gajda vareso ćerav mungre gospodarešće, e GOSPODEŠĆE pomazanikošće. Či vazdava o vas pe leste kaj si vo e GOSPODESKO pomazaniko.”

7Godole alavenca o David ačhada pire manušen thaj či dija len te napadnin e Saule. A o Saul inkljisto andar e pećina thaj đelo pire dromesa.

8Askal o David inkljisto andar e pećina thaj čhuta muj e Saulešće: “Gospodarina, carona mungreja!”

Kana o Saul bolda pe, o David pelo pe koča e mujesa dži ke phuv, 9pa phendas: “Sostar čhos kan kana e manuša phenen kaj me kamav tuće bilačhipe? 10Ađes ćire jakhenca šaj dikhlan sar o GOSPOD ande pećina predaisarda tut ande mungre vas. Varesave manuša nagovorinas man te mudarav tut, ali me poštedisardem tut. Phendem: ‘Či kamav te vazdav o vas pe mungro gospodari, kaj si vo e GOSPODESKO pomazaniko.’ 11Dik, dade mungreja, akava ćoško katar ćiro ogrtači ande mungro vas! Čhindem les, a či mudardem tut. Haćar kaj či grešisardem thaj kaj či kamav tuće bilačhipe. Či ćerdem tuće khanči po žao, a tu palem progonis man thaj kames te les mungro trajo. 12Neka o GOSPOD presudil maškar mande thaj tute. Neka o GOSPOD osvetil o bilačhipe savo ćerdan manđe, ali mungro vas či vazdela pes pe tute. 13Sago kaj phenel e purani izreka: ‘Katar e bilačhe manuša aven e bilačhe delurja’, zato či vazdava o vas pe tute. 14Pe kaste godova inkljisto o caro e Izraelosko? Kas godova progonis? E mule džućhele? E pišoma? 15Neka o GOSPOD avel amaro sudija thaj neka presudil maškar amende. Nek dićhel mungro slučaj, neka opravdil man thaj spasil man tutar.”

16Kana o David godova phendas, o Saul phendas: “Dali si godova ćiro glaso, Davide, čhaveja mungreja?”

Thaj glasno teljarda te rovel.

17Thaj phendas e Davidešće: “Tu san majpravedno mandar, kaj ćerdan manđe lačhipe, vi ako ćerdem tuće bilačhipe. 18Korkoro ađes phendan sar ćerdan manđe lačhipe: o GOSPOD predaisarda man ande ćire vas, ali tu či mudardan man. 19Kana o manuš araćhel pire dušmano, dali mućela les te džaltar ando miro? Neka o GOSPOD barvale nagradil tut pale godova sar ađes postupisardan prema mande. 20Akana džanav kaj sigurno aveja caro thaj kaj o izraelsko carstvo avela zuralo tale ćiri vlast. 21Zato ha manđe solah e GOSPODEJA kaj či istrebija mungre potomkonen, niti či khoseja mungro alav andar mungri familija.”

22Thaj o David hala solah e Saulešće.

Askal o David bolda pe ćhere, a o David thaj lešće manuša boldine pe ande piro planinsko sklonište.