1. Samuilo 22

O David ande pećina Adulam thaj ande Micpa

1O David đelotar andar o Gat thaj našlo ande pećina Adulam. Kana pale godova ašundine lešće phral thaj lešći familija, đele dži leste. 2Savora save sas ande nevolja ili varekašće udžile ili nezadovoljne, ćidine pe oko leste thaj vo postanisarda lengo vođe. Oko leste sas varekaj katar štar šela manuša.

3Askal o David đelo ande moavsko Micpa thaj phendas e moavske carošće: “Moliv tut, muk te mungro dad thaj mungri dej sklonin pe tute dok či saznajiv so o Del ćerela manca.”

4Gajda muklas pire dade thaj pire deja ko moavsko caro, kaj ačhiline dok o David sas ando sklonište.

5Askal o proroko Gad phendas e Davidešće: “Na majbut te garados, nego dža ande Judašći phuv.”

Gajda o David teljarda po drom thaj areslo ando voš Heret.

O Saul mudarel e rašajen

6O Saul ašundas kaj pojavisajlo o David thaj e manuša save sas lesa garade. O Saul bešelas e kopljesa ando vas talo kaš tamarisk, po brdo ke Giva, a oko leste ačhenas sa lešće službenikurja.

7Askal o Saul phendas lenđe: “Čhon kan, Venijamincurja! Dali o David dela tumen savoren njive thaj vinogradurja? Dali čhola tumen pale zapovednikurja pe milje thaj pe šela manuša? 8Sostar askal urotisajle protiv mande? Khonikal tumendar či phendas manđe kaj mungro čhavo sklopisardas o savez e Davideja. Khonikal tumendar či vodisarda e briga pale mande thaj khonik či phendas manđe kaj mungro čhavo nagovorisarda mungre slugo protiv mande. Ađes godova manuš vrebol man andar e zaseda.”

9Pe godova o Doeg o Edomco, savo ačhelas e Saulešće službenikonenca, phendas: “Me dikhlem e Davide ando Nov kana avilo ko Ahimeleh, ke Ahituvesko čhavo. 10O Ahimeleh phučla e GOSPODE te del les savet palo David, dija les hamasko thaj o mačo katar o Filistejco o Golijat.”

11Askal o caro bičhaldas palo rašaj Ahimeleh, e Ahituvesko čhavo, thaj sasti lešće familija, save sas rašaja ando Nov. Thaj savora von aviline anglo caro.

12O Saul phendas: “Ašun tu, e Ahimelehona!”

A akava phendas: “Čhav kan, gospodarina!”

13O Saul phendas lešće: “Sostar urotisajle protiv mande zajedno e Davideja? Dijan les mangro thaj mačo thaj phučlan e GOSPODE pale leste, pa vo vazda pe protiv mande andar e zaseda, sago kaj ćerel godova ađes.”

14O Ahimeleh phendas e carošće: “Ko si katar sa ćire službenikurja verno sago o David, e caresko džamutro, zapovedniko ćire stražako thaj manuš zurale poštujime ande ćiro ćher? 15Dali askal prvo data phučlem e Devle pale leste? Naravno kaj či! Neka o caro či optužil man, pire slugo ili bilo kas katar mungri familija, kaj me, ćiro sluga, baš khanči či džanav pale sa godova.”

16Ali o caro phendas: “Mereja, Ahimelehona, tu thaj vi sasti ćiri familija!”

17Askal naredisarda e stražarenđe save ačhenas paše leste: “Džan thaj mudaren e GOSPODEŠĆE rašajen, kaj vi von ačhiline pe Davidešći rig! Džangline kaj našel, a či javisardine manđe godova.”

Ali e carošće sluge či kamline te vazden e vas pe GOSPODEŠĆE rašaja.

18O caro askal phendas e Doegošće: “Tu dža thaj mudar len!”

Thaj o Doeg Edomco đelo thaj mudarda len. Vo godova đes mudarda ohtovardeš thaj pandž manušen save inđarenas pe peste laneno rašajesko prusluko, 19thaj e mačesa mudarda sa so sas džudo ando Nov, gav e rašajengo, e manušen thaj e manušnjen, e čhavren thaj e beben, e guruven, e magarcen thaj e bakhren.

20Ali o Avijatar, jek katar e Ahimelehošće čhave, e Ahituvesko unuko, umaknisardas thaj našlo ko David 21thaj javisarda lešće kaj o Saul mudarda e GOSPODEŠĆE rašajen.

22Askal o David phendas e Avijatarešće: “Okova đes kana o Doeg o Edomco sas okote, džanglem kaj sa phenela e Saulešće. Me sem došalo palo smrto ćire saste familijako. 23Ačh manca thaj na dara. O manuš savo kamel te mudarel tut, kamel te mudarel vi man. Manca aveja sigurno.”