1. Samuilo 21

O David ko rašaj Ahimeleh

1O David avilo ando gav Nov, ko rašaj Ahimeleh, savo ćinosajlo kana dikhla e Davide.

O Ahimeleh phučla les: “Sostar san korkoro? Sostar khonik naj tusa?”

2O David phendas: “O caro dija man posebno zadatko thaj phendas manđe: ‘Khonik či tromal khanči te džanel palo zadatko pe savo bičhalav tut, ni palo naređenje savo dijem tut.’ A mungre manušenđe phendem pe savo than arakhasa men. 3A akana, so si tut akate katar o hamasko? De man pandž mangre, ili bilo so aver so si tut.”

4Ali o rašaj phendas e Davidešće: “Naj man obično mangre. Si man samo posvetime mangre. Šaj han lestar samo ako ćire manuša či sutine varesavi vrjama pire romnjeca.”

5A o David phendas lešće: “Na, či sutine e romnjenca, sago vi uvek kana džas ande borba. E tela mungre manušenđe si čiste čak vi kana džas po obično zadatko, a posebno ađes.”

6Gajda o rašaj dija les o posvetime mangre, zato kaj okote nas aver mangro osim okova savo lel pe anglo GOSPOD te svako đes čhol pe tato mangro.

7A godova đes varesave bućava inća anglo GOSPOD zadržisajlo jek e Saulesko službeniko, o Doeg o Edomco, savo sas e Saulesko glavno pastiri.

8O David phučlas e Ahimeleho: “Te naj tut akate varesavo koplje ili mačo? Či lijem mungro mačo ni aver oružje, kaj e carosko nalog sas hitno.”

9O rašaj Ahimeleh phendas lešće: “Akate si o mačo katar o Filistejco o Golijat, saves mudardan ande dolina Ela. Ake paćardo si ando patavo thaj čhutino si paše rašajesko prusluko. Le les ako kames. Akate naj aver mačo osim godova.”

A o David phendas: “Lešće naj nijek ravno. An les akaring.”

O David ke Filistejcurja

10Godova đes o David našlo katar o Saul thaj đelo ko Ahiš, savo sas caro ando Gat.

11A e Ahišešće službenikurja phendine: “Zar akava naj o David, o caro e Izraelošće phuvjako? Zar vo naj okova kašće đilaben thaj ćhelen:

‘O Saul mudardas pe milje,

a o David pe deš milje’?”

12O David zurale gindisarda pe akala alava thaj but darajlo katar o caro Ahiš andar o Gat. 13Zato ćerelas pe anglal leste kaj si nasvalo ande šoro. Pošto sas ande lenđi vlast, ponašilas pe sago dilo: crtolas pe gavešći kapija thaj mućelas e čhungara te pićin lešće nuz e čhor.

14O Ahiš phendas pire službenikonenđe: “Dićhen akale diles! Sostar anen les mande? 15Zar naj akate dosta dile manuša, pa moraš vi les te andine mande, thaj te angla mande ćerel piro dilipe? Zar vo trubul te del andre ande mungro ćher?”