1. Samuilo 20

O Jonatan thaj o David sklopin savez

1O David pale godova našlo andar o than Najot paše Rama thaj đelo ko Jonatan, pa phučla les: “So ćerdem? So sem došalo? Savo bilačhipe ćerdem ćire dadešće kana kamel te lel mungro trajo?”

2O Jonatan phendas lešće: “Dur te avel tutar! Či tu aveja mudardo! Kaj mungro dad či ćerel khanči, ni baro, ni cikno, te godova či phenel manđe. Sostar askal godova garadasas mandar? Godova naštik te avel.”

3Ali o David hala solah thaj phendas: “Ćiro dad lačhe džanel kaj arakhlem milost ande ćire jakha, pa gndisarda: ‘O Jonatan či tromal te džanel pale akava, te či ražalostil pe.’ Ali hav solah e džude GOSPODESA thaj tusa, po korako sem katar o smrto.”

4Askal o Jonatan phendas e Davidešće: “Ćerava pale tute sa so kames.”

5A o David phendas lešće: “Ake, thejara si o prazniko e terne čhonesko thaj trubul te hav e carosa. Ali tu muk man te džav thaj garadov ando polje dži overthejara talerjat. 6Ako ćiro dad uopšte primetil kaj naj man, tu phen: ‘O David šukar zamolisarda man te mukav les te džal dži ke piro bijando gav o Vitlejem, kaj lešći sasti familija prinesil e bršešći žrtva.’ 7Ako vo phenel: ‘Lačhe’, me, ćiro sluga, avava mirno. Ali ako holjavol, av sigurno kaj odlučisardas te ćerel manđe bilačhipe. 8Zato av lačho prema mande, ćire slugaste kaj manca sklopisardan o savez anglo GOSPOD. Ako sem došalo, askal korkoro mudar man! Sostar te predais man ćire dadešće?”

9O Jonatan pe godova phendas: “Dur te avel katar godova! Kana čače džanglemas kaj mungro dad kamel te ćerel tuće varesavo bilačhipe, dali či phendemas tuće?”

10Askal o David phučla e Jonatane: “Ko javila manđe ako ćiro dad kamel manđe bilačhipe?”

11O Jonatan phendas e Davidešće: “Hajde te džas ando polje.”

Kana liduj džene đele ando polje, 12o Jonatan phendas e Davidešće: “Hav solah e džude GOSPODEJA, e Izraelošće Devleja! Obećisarav kaj dži overthejara talerjat crdava katar mungro dad so gindil pale tute. Ako gindil lačhe, bičhalava tuće poruka. 13Ali ako mungro dad kamel te ćerel tuće varesavo bilačhipe, neka o GOSPOD majstrogo kaznil man ako godova odma či javiv tuće. Mukava tut te mirno džastar. Neka o GOSPOD avel tusa sago kaj sas mungre dadeja. 14A tu prema mande av milostivo sago o GOSPOD dži kaj god sem džudo, te na avav mudardo. 15Thaj na nikad te uskratis ćiri milost mungre familijaće, čak vi askal kana o GOSPOD istrebil ćire dušmajen katar e phuv.”

16Askal o Jonatan sklopisardas o savez e Davideja thaj lešće potomkonenca, phendas: “Neka o GOSPOD kaznil e Davidešće dušmajen.”

17O Jonatan još jekhvar manglas katar o David te hal lešće solah ande piri bari ljubav, kaj volilas les sago korkoro pes.

18Askal o Jonatan phendas lešće: “Thejara si o praznik e terne čhonesko. Savora dićhena kaj naj san okote, kaj ćiro than avela čučo. 19Overthejara talerjat dža pe okova than kaj sanas garado kana akala nevolje počnisardine thaj ažućar ko bar Ezel. 20Me bašalava trin strele ande ćiro pravco, sago kaj gađiv e meta, 21pa bičhalava e slugo te džal thaj araćhel e strela. Ako phenav lešće: ‘E strele si akate majpaše, bolde tut thaj an len’, askal šaj inkljes andar o than kaj san garado. Hav solah e džude GOSPODEJA, godova značila kaj naj san ande opasnost. 22Ali ako e slugašće phenav: ‘E strele si inća majdur’, askal moraš te džastar, kaj o GOSPOD bičhalel tut akatar. 23Uvek de tut gođi ke amaro savez, kaj o GOSPOD si amenđe svedoko pale uvek.”

24Gajda o David garadilo ando polje.

Kana avilo o prazniko e terne čhonesko, o caro bešlo te hal. 25Kana o caro bešlo pe piro than sago vi uvek, pašo zido prekal e Jonatanešći rig. O Avner bešelas pašo Saul, a e Davidesko than sas čučo.

26O Saul godova đes či phendas khanči, kaj gndisardas: “E Davidešće sigurno vareso dogodisajlo, pa postanisardas nečisto.”

27Ali thejara o đes, aver đes ando čhon, e Davidesko than sas palem čučo, pa o Saul phučla pire čhave e Jonatane: “Sostar e Jesejesko čhavo ni araći ni ađes či avilo pe gozba palo terno čhon?”

28A o Jonatan phendas: “O David šukar zamolisarda man te mukav les te džal ando Vitlejem. 29Phendas manđe: ‘Muk man, kaj mungri familija prinesil e žrtva ando gav thaj mungro phral zapovedisarda manđe te avav okote. Ako arakhlem milost ande ćire jakha, muk man te džav te dikhav mungre phralen.’ Zato či avilo pale carošći sinija.”

30Askal o Saul holjajlo po Jonatan thaj phendas lešće: “Tu san bilačho thaj buntovniko! Dali gndis kaj či džanav kaj ačhilan pe Jeseješće čhavešći rig, pe ćiro thaj ćire dejako ladžavo! 31Kaj sa dok e Jesejesko čhavo trajil pe phuv, či aveja sigurno ni tu, ni ćiro carstvo. A akana, bičhal pale leste thaj an les manđe, kaj moraš te merel!”

32O Jonatan phučla pire dade: “Sostar moraš te avel mudardo? So ćerda?” 33A o Saul čhudas pe leste o koplje, te mudarel les.

Askal o Jonatan dikhla kaj lesko dad odlučisarda te mudarel e Davide. 34O Jonatan uštilo katar e sinija. Sas holjariko pe piro dad thaj či kamlas te hal o dujto đes e praznikosko kaj lesko dad ponizisarda e Davide thaj kaj kamlas te mudarel le. 35Thejara detharinako rano o Jonatan đelo ando polje te malavel pe e Davideja, a inđarda pesa jećhe terne slugo.

36O Jonatan phendas e slugašće: “Praste thaj arakh e strele save bašalava.”

Dok o sluga prastelas, vo muklas e strela majdur lestar.

37Kana o sluga avilo dži ko than kaj peli e Jonatanešći strela, o Jonatan čhuta muj pale leste: “Zar naj e strela inća majdur tutar?”

38A askal čhuta muj: “Siđar! Dža brzo! Na ačhav tut!”

O sluga ćida e strela thaj bolda pe ko Jonatan. 39Khanči či primetisarda, kaj samo o Jonatan thaj o David džangline so si godova.

40Askal o Jonatan dija piro oružije e slugašće thaj phendas: “Dža thaj bolde akava ando gav.”

41Kana o sluga đelotar, o David inkljisto katar e južno rig e barešći kaj sas garado, pelo e mujesa dži ke phuv thaj trin drom poklonisajlo. Askal čumidine pe thaj rujine. A o David rujas majbut.

42O Jonatan phendas e Davidešće: “Dža ando miro, kaj jek avrešće halam solah ande GOSPODESKO alav po večno drugarstvo. O GOSPOD si svedoko maškar amende thaj maškar amare potomkurja pale uvek!”

Askal o David đelotar, a o Jonatan bolda pe ando gav.