1. Samuilo 18

O David thaj o Jonatan postanin drugarja

1Pale godova, kana o David ćerda svato e Sauleja, o Jonatan haćarda bari povezanost e Davideja thaj zavolisarda les sago korkoro pes. 2Katar godova đes, o Saul inćarelas e Davide paše peste thaj či mućelas les te boldel pe ande pire dadesko ćhere. 3A o Jonatan sklopisardas savez e Davideja kaj volilas les sago korkoro pes. 4Fuljarda pal peste piri sasti ratno oprema thaj dija lat e Davidešće, dija les piro oklop, mačo, luko thaj o pojas.

5Kana god o Saul bičhalelas les te vareso ćerel, o David gajda godova uspešno ćerelas kaj o Saul čhuta les palo zapovedniko pe vojska. Sa o them volilas e Davide, čak vi e Saulešće sluge.

6Kana e vojnikurja boldenas pe ćhere andar e bitka ande savi o David mudardas e Golijate, e manušnja andar sa e izraelske gava inkljistine te dočekin e care Saule. Bahtale đilabenas thaj ćhelenas uz o zvuko e dairako thaj e lirako. 7A dok ćhelenas, đilabenas:

“O Saul mudardas pe milje,

a o David pe deš milje.”

8E Saulešće či sviđosajli e đilji thaj zurale holjajlo.

Kaj gndisarda: “Palo David phendine deš milje, a pale mande samo milje! Još cara thaj dena les vi o carstvo!”

9Katar godova đes o Saul e Davide dićhelas popreko.

10Thejara o đes o bilačho duho bičhaldo katar o Del fuljisto po Saul. O Saul počnisarda te ćerel dilipe ando ćher, a o David sago vi obično, đilabelas ande harfa, a o Saul inćarelas o koplje ando vas, 11pa čhuda o koplje karingal o David thaj phendas ande peste: “Zabiva e Davide ando zido!”

Ali o David duvar izmaknisajlo lešće.

12O Saul daralas katar o David, kaj o GOSPOD sas lesa, a katar o Saul đelotar. 13Zato o Saul lija pestar majdur e Davide thaj čhuta les palo zapovedniko pe milje. Gajda o David džalas thaj boldelas pe pire manušenca andar e bitke, 14thaj sas zurale uspešno ande sa so ćerelas, kaj sas o GOSPOD lesa. 15Kana o Saul dikhla kozom si o David uspešno, lija les e još majbari dar. 16A sasto Izrael thaj e Juda volinas e Davide kaj džalas angle lende ando rato.

17O Saul phendas e Davidešće: “Dava tut e Merava, mungre majpurane čheja, pale romnji, samo služi manđe hrabro thaj vodi e GOSPODEŠĆE raturja.”

Kaj o Saul gndisarda: “Či trubuv me te vazdav mungro vas pe leste, neka godova ćeren e Filistejcurja.”

18Ali o David phendas e Saulešće: “Ko sem me thaj ko si mungri familija thaj so si o ćher mungre dadesko ando Izrael, te avav e carosko džamutro?”

19Kana avili e vrjama te e Merava udajil pe palo David, udajisardine lat palo Adriel andar e Mehola.

20A e Saulešći čhej e Mihala sas zaljubime ando David. Kana godova phendine e Saulešće, sas lešće drago.

21O Saul phendas ande peste: “Dava lat lešće te avel lešće sago zamka thaj e Filistejcurja majloće mudarena les.”

Gajda o Saul phendas e Davidešće: “Ađes si tu aver prilika te postanis mungro džamutro.”

22Askal zapovedisardas pire slugenđe: “Crden e Davide pe rig thaj phenen lešće: ‘Ake, drago san e carošće, a volin tu vi sa lešće sluge, zato av e caresko džamutro.’ ”

23Gajda e Saulešće sluge ćerdine svato e Davideja. Ali vo phendas: “Dali gndin kaj si cikni bući te postanis e caresko džamutro? Me sem samo čoro thaj biugledosko manuš.”

24E sluge phendine e Saulešće sa so o David phendas, 25a o Saul phendas: “Phenen e Davidešće kaj o caro či manđel khanči pale piri čhej osim šel filistejske morćhora katar o obrezanje te osvetiv man mungre dušmajenđe.”

O Saul nadisajlo kaj e Filistejcurja mudarena e Davide.

26Kana e sluge godova phendine e Davidešće, vo pristanisardas te postanil e Saulesko džamutro. Zato vi majsigo nego so nakhli e vrjama, 27vo thaj lešće manuša đele thaj mudardine duj šela Filistejcen. O David andas lenđe morćhora katar o obrezanje ko caro, sar avilosas e caresko džamutro. Askal o Saul dija les pire čheja e Mihala pale romnji.

28Kana o Saul dikhla kaj si o GOSPOD e Davideja thaj kaj lešći čhej e Mihala volil e Davide, 29još majbut daralas katar o David thaj dži ko krajo sas lesko dušmano.

30E filistejske zapovednikurja nastavisardine te ratujin protiv e Izraelcurja, ali o David svako drom pobedisarda len. Sas majuspešno katar sa e Saulešće zapovednikurja. Thaj gajda postanisardas slavno.