Chergash New Testament
1. Samuilo 15
O Del odbacil e Saule sago care
O Samuilo phendas e Saulešće: “Me sem okova saves o GOSPOD bičhaldas te pomažil tut palo caro pe lesko izraelsko them. Zato akana ašun so phenel o GOSPOD:
Agajda phenel o GOSPOD pe vojske: ‘Dikhlem so ćerdine e Amalečanurja kana napadnisardine e Izraelcen nakon so inkljistine andar o Egipat. Zato akana dža thaj napadnisar e Amalečanen thaj uništisar dži ko krajo sa so si len. Na poštedisar khonikas – mudar svako manuše thaj manušnja, čhavren thaj e čhavren save si pe čuči, svako guruve, bakhre, kamila thaj magarco.’ ”
Askal o Saul ćida e vojska thaj đinada len ando Telaim. Sas duj šela milje vojnikurja save džanas phujatar thaj deš milje vojnikurja andar e Juda. Posle godova đelo dži ko gav katar e Amalečanurja thaj ćerda zamka ande dolina.
O Saul poručisarda e Kenejconenđe: “Džan! Odvojin tumen katar e Amalečanurja, te na uništiv tumen zajedno lenca! Kaj, tumen senas milostive sa e Izraelconenđe kana inkljenas andar o Egipat.”
Gajda e Kenejcurja odvoisajle katar e Amalečanurja.
Askal o Saul napadnisarda e Amalečanen katar e Havila dži ko Šur, istočno katar o Egipat. E Amalečanenđe caro e Agage astardine džude, a sa e theme mudardine e mačesa. Ali o Saul thaj e vojska poštedisardine e caro Agage thaj e majlačhi hurdi stoka thaj e guruven, ugojime terne guruven thaj e bakhren, thaj sa aver so si vredno. Godova či kamline te uništin, nego uništisardine samo okova so sas lenđe beskorisno thaj bezvredno.
Askal o alav e GOSPODESKO avilo e Samuilešče: “Žao si manđe kaj e Saule čhutem te avel caro, kaj bolda pe mandar thaj či izvršisarda okova so phendem lešće.”
O Samuilo sas but holjariko, pa sasti rjat vapilas e GOSPODEŠĆE.
Thejara đes o Samuilo uštilo rano thaj teljardas te araćhel pe e Saulesa, ali phendine lešće: “O Saul đelotar ando gav Karmel. Kote pešće ande čast vazdas spomeniko, pa okotar đelo tele ando Gilgal.”
Kana o Samuilo avilo ko Saul, o Saul phendas lešće: “O GOSPOD te blagoslovil tut! Ćerdem okova so o GOSPOD phendas manđe!”
A o Samuilo phendas: “Katar askal ašunav o rknjipe e bakhrengo thaj e guruvengo?”
O Saul phendas: “Andine len katar e Amalečanurja, kaj e vojska poštedisarda e majlačhe bakhren thaj e guruven te prinesin len po žrtveniko e GOSPODEŠĆE, ćire Devlešće. A sa aver dži ko krajo uništisardam.”
O Samuilo phendas lešće: “Ač! Kamav te phenav tuće so o GOSPOD araći arjat phendas.”
A o Saul phendas: “Mothov.”
O Samuilo phendas e Saulešće: “Dok još sanas khanči ande ćire jakha, či li postanisardan šoro e Izraelošće plemenenđe? O GOSPOD pomažisarda tut te aves caro ando Izrael. O GOSPOD bičhalda tut ando ratno pohod thaj phendas tuće: ‘Dža thaj dži ko krajo uništisar okole bezahale themes, e Amalečanen. Bori tut lenca dok sa či uništis len.’ Sostar či čhutan kan ko GOSPOD, nego astardan tut palo pleno thaj ćerdan okova so si bilačhe ande GOSPODEŠĆE jakha?”
A o Saul phendas e Samuilešće: “Ali čhutem kan ko GOSPOD: teljardem ando ratno pohod pe savo o GOSPOD bičhalda man, dži ko krajo uništisardem e Amalečanen thaj andem lenđe caro e Agage. E vojska katar o pleno lijas e bakhren thaj e guruven, majlačho katar okova so trubuja te avel dži ko krajo uništime, te ando Gilgal prinesin po žrtveniko e GOSPODEŠĆE, ćire Devlešće.”
Ali o Samuilo phendas lešće:
“Zar si e GOSPODEŠĆE e žrtve paljenice thaj žrtve kaj den pe čhurjasa
mile sago o paćivalipe?
O paćivalipe si majlačho katar e žrtva,
thaj e pokornost si majlačhi katar e bakhresko loj.
Kaj, e pobuna si bezeh sago kana drabarel pe
thaj o bahatost si sago kana slavin pe e idolurja.
Zato kaj odbacisardan o alav e GOSPODESKO,
vo tut odbacisarda sago caro.”
Askal o Saul phendas e Samuilešće: “Ćerdem bezeh. Či čhutem kan ke GOSPODEŠĆI zapovest thaj ke okova so tu phendan. Darajlem katar e vojska, pa čhutem kan lende. Akana moliv tut, jartosar mungro bezeh thaj bolde tut manca, te pokloniv man e GOSPODEŠĆE.”
Ali o Samuilo phendas lešće: “Či boldava man tusa, kaj odbacisardan o alav e GOSPODESKO, thaj o GOSPOD odbacisarda tut sago caro ando Izrael.”
Kana o Samuilo lija te džaltar, o Saul astarda les palo ogrtači, thaj o ćoško katar o ogrtači čhindilo.
Askal o Samuilo phendas lešće: “Ađes o GOSPOD čhinda tutar o izraelsko carstvo thaj dija jećhe ćire pašutnešće, savo si majlačho tutar. A o Del, e Izraelošći Slava, či hohavel thaj či predomislil pe, kaj vo naj manuš te predomislil pe.”
O Saul phendas: “Ćerdem bezeh. Ali, moliv tut, sikav manđe čast angle starešine mungre themešće thaj anglo Izrael: bolde tut manca, te pokloniv man e GOSPODEŠĆE, ćire Devlešće.”
Thaj o Samuilo bolda pe e Saulesa, thaj o Saul poklonisajlo e GOSPODEŠĆE.
Askal o Samuilo phendas: “Anen mande e Agage, e Amalečanenđe caro.”
O Agag avilo dži leste phanglo ande lancurja, thaj gindilas: “Sar si ćerko o smrto!”
O Samuilo phendas lešće: “Sago kaj tu e mačesa mudardan e bute manušnjenđe čhavren, gajda vi ćiri dej akana ačhela bičhavrengo.”
Askal o Samuilo mudarda e Agage anglo GOSPOD ando Gilgal.
O Samuilo askal đelotar ande Rama, a o Saul bolda pe ćhere ande Giva e Saulešći. Sa dži ke piro smrto o Samuilo majbut či dikhla e Saule, ali rovelas pale leste.
A e GOSPODEŠĆE sas žao kaj čhuta e Saule te avel caro ando Izrael.
Chergash New Testament. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.