1. Samuilo 14

1Jek đes e Saulesko čhavo o Jonatan phendas e slugašće savo sas lesko štitonoša: “Hajde džas pe okoja rig dži ko filistejsko tabor.”

Ali pale godova či phendas pire dadešće.

2O Saul bešelas ando hlado e narešće kaštesko ando Migron. Lesa sas varekaj katar šov šela vojnikurja, 3sas okote vi o Ahija, savo inđarelas e rašajesko prusluko. O Ahija sas e Ahituvesko čhavo. O Ahituv thaj o Ihavod sas phral, e Pinhasošće čhave thaj e Eliješće unukurja, savo sas e GOSPODESKO rašaj ando Šilo. Khonik či primetisarda kaj o Jonatan đelotar.

4Pe liduj riga ko klanco prekal savo o Jonatan trubuja te naćhel po drom karingal o filistejsko tabor, savo sas maškar e duj strme stene. Jek akhardolas Bocec, a aver Sene. 5E severno stena sas majpaše ko Mihmas, a e južno ande Geva.

6O Jonatan phendas pire terne štitonošće: “Hajde te džas ando tabor okolenđe save naj obrezime. Šaj kaj o GOSPOD pomognila amenđe kaj e GOSPODE khanči či sprečil te anel e pobeda, bilo ta avel amen but ili cara.”

7A o štitonoša phendas: “Ćer sar gndis kaj si majlačhe. Tusa sem.”

8Pe godova o Jonatan phendas: “Nakhasa lende thaj mukasa te dićhen amen. 9Ako phenen amenđe te ažućaras len dok von aven amende, ačhasa kaj sam thaj či lasa men opre lende. 10Ali, ako akharen amen te amen avas opre lende, lasa men opre. Godova avela znako kaj o GOSPOD dija len ande amare vas.”

11Gajda von duj džene sikadine pe e Filistejcenđe.

A e filistejske stražarja čhutine muj: “Dićhen! E Hebreja inkljen andar e hvja ande save sas garade!”

12E Filistejcurja čhutine muj e Jonatanešće thaj lešće štitonašće: “Aven opre! Sikavasa amen tumenđe.”

A o Jonatan askal phendas pire štitonašće: “Letu opre pale mande. O GOSPOD predaisarda len ande vas e Izraelconenđe.”

13O Jonatan lelas pe opre e vastenca thaj e pungrenca, a o štitonoša džalas pale leste. O Jonatan pobedilas e Filistejcen, a lesko štitonoša mudarelas len. 14Ando prvo napad po polje savo sas baro te oril pe varekaj katar opaš o đes, pobedisardine varekaj katar biš manuša. 15Askal e dar dija ande sa e Filistejcurja, ando tabor thaj vi avrjal leste, sa e vojska thaj e četen, thaj e phuv ćhinosajli thaj zavladisardas bari panika bičhaldi katar o Del .

E Filistejcurja si porazime

16E Saulešći straža ande Giva e Venijaminešći dikhline sar e filistejsko vojska ande panika našen pe sa e riga.

17Pe godova o Saul phendas pire saste vojskaće: “Đinaven tumen thaj dićhen ko falil.”

Kana đinadine pe, dikhla pe kaj falil o Jonatan thaj lesko štitonoša.

18Askal o Saul phenas e Ahijašće: “An e Devlesko Kovčeg!” (Ande godoja vrjama e Devlesko Kovčeg sas maškar e Izraelcurja).

19Dok o Saul ćerelas svato e rašajesa, e buka ando filistejsko tabor sas sa majbari, pa o Saul phendas e rašaješće: “Ač, crde ćiro vas!”

20Askal o Saul thaj sa lešći vojska ćidine pe thaj teljardine ande bitka. Arakhline e Filistejcen ande bari dar sar vazden e mačurja jek pe avreste. 21A e Hebrejurja, save sas dži askal e Filistejenca ande lengo tabor, akana priklonisajle e Izraelconenđe save sas e Sauleja thaj e Jonataneja. 22Sa e Izraelcurja save sas garade ande Efremešće gore, ašundine kaj e filistejske vojnikurja našen. Vi von akana teljardine ande bitka thaj e potera pale Filistejcurja.

23Gajda o GOSPOD godova đes spasisardas e Izraelcen, a e bitka buljili sa dži palo Bet-Aven.

O Jonatan prekršil e Saulešći zabrana

24E Izraelcurja sas godova đes hićine thaj bokhale kaj o Saul dija len akaja romaja: “Prokleto te avel ko lel vareso te hal majsigo nego so perel e rjat, majsigo nego so osvetiv man mungre dušmajenđe!”

Gajda khonik katar e vojska khanči či okusisarda.

25Sasti vojska dija ande varesavo voš, kaj pe phuv sas medo. 26Kana dine ando voš, dikhline sar o medo pićal. Ali khonik či usudisajlo te hal les, kaj daranas katar e romaja.

27Ali o Jonatan či ašunda kaj lesko dad e romajasa obavezisarda e vojska. Vo inzardas e rovlji savi inćarelas ando vas thaj umočisarda lat ande saće e medošće. Kana lijas te hal o medo, lešće jakha zasijosardine.

28Askal jek katar e vojnikurja phendas lešće: “Ćiro dad obavezisarda e vojska e romajenca. Phendas: ‘Prokleto te avel ko ađes lel vareso te hal!’ Zato si e vojska hićini.”

29A o Jonatan phendas: “Mungro dad spidel e phuv ando propast. Dićhen sar mungre jakha zasijosardine kana samo cara okusisardem akava medo. 30So avilosas te e vojska halasas katar o pleno savo arakhlas ko dušmano? Šaj mudardamas još majbut Filistejcen.”

31Godova đes e Izraelcurja mudardine e Filistejcen katar o Mihmas dži ko Ajalon. E manuša sas iscrpime thaj bokhale. 32Askal e vojska čhuda pe po pleno, pa line e bakhren, guruven thaj e terne gurumnja. Dine len čhurjasa okote pe phuv thaj haline zajedno e ratesa.

33Godova javisardine e Saulešće: “Eke e vojska ćerel bezah protiv o GOSPOD gajda kaj han o mas e rateja!”

O Saul phenas: “Ćerdine bezah. Odma angle mande dokotrljin o baro bar!”

34Askal o Saul palem zapovedisardas: “Dža maškar e vojska thaj phenen lenđe neka svako lendar anel pire guruven ili bakhren, pa akate den len čhurjasa thaj han, te na grešin protiv o GOSPOD, gajda kaj han o mas ande savo si još o rat.”

Godoja rjat svako okote andas pire guruve tha dija les čhurjasa. 35Gajda o Saul vazdas piro prvo žrtveniko e GOSPODEŠĆE.

36O Saul phendas: “Hajde džas arjat tele pale Filistejcurja, te opljačkis len dži ke zora. Khonikas či mukasa po trajo.”

A von phendine lešće: “Ćer sar gndis kaj si majlačhe.”

Ali o rašaj predložisarda: “Ajde te prvo phučas e Devle so te ćeras.”

37O Saul phučla e Devle: “Dali trubul te džav tele pale Filistejcurja? Dali deja len ande amare vas?”

Ali o Del godova đes či odgovorisarda lešće.

38Zato o Saul phendas: “Aven akaring sa e zapovednikurja e vojskaće, te saznajin savo bezah si ađes ćerdo. 39Hav solah e džude GOSPODEJA, savo spasil o Izrael, čak vi ako ćerda o bezah mungro čhavo o Jonatan, moraš te merel!”

Ali khonikal katar e vojska či phendas ni alav.

40Askal o Saul phendas sa e Izraelconenđe: “Tumen ačhen pe jek rig, a me thaj mungro čhavo o Jonatan ačhasa pe aver rig.”

E vojnikurja phendine: “Ćer sar gndis kaj si majlačhe.”

41Askal o Saul gajda pomolisajlo e GOSPODEŠĆE, e Izraelošće Devlešće: “GOSPODE, sostar ađes či dijan man, ćire slugašće, odgovor? GOSPODE, Devla e Izraelosko, ako sem došalo me, ili mungro čhavo o Jonatan, de o Urim. A ako si došale e Izraelcurja, de o Tumim.”1

E kocka peli po Jonatan thaj po Saul, a e vojska sas slobodno katar e optužba.

42Pe godova o Saul phendas: “Neka e kocka odlučil maškar mande thaj mungro čhavo o Jonatan.”

Thaj e kocka peli po Jonatan.

43Askal o Saul phučla e Jonatane: “Phen manđe so ćerdan.”

O Jonatan phendas: “Samo okusisardem cara medo katar o vrho e rovljako savi sas ande mungro vas. Dali zbog godova akana trubul te merav?”

44A o Saul phendas: “Neka o Del majstrogo kaznil man ako či meres, Jonatane!”

45Ali e vojska phendas e Saulešće: “Zar te merel o Jonatan savo dija e Izraelconenđe akaja bari pobeda? Dur te avel! Has solah e džude GOSPODEJA, ni jek bal katar lesko šoro či perela! Kaj, ađes sas o Del lesa.”

Gajda e vojska arakhlas e Jonatane katar o smrto.

46O Saul askal ačhilo te džal pale Filistejcurja, a von crdine pe ande piri phuv.

47Kana o Saul preuzmisardas e carsko vlast po Izrael, ratuilas protiv sa aver okolne dušmaja: protiv e Moavcurja thaj e Amoncurja, e Edomcurja thaj e carurja andar e Cova thaj e Filistejcurja. Kaj god džalas, anelas pobeda. 48Hrabro borilas pe thaj pobedisardas e Amalečanen. Oslobodisardas e Izraelcen katar sa okola save pljačkinas len.

E Saulešći familija

49E Saulešće čhave sas o Jonatan, Jišvi thaj o Malki-Šua. Lešći majpurani čhej akhardolas Merav, a e majterni Mihala. 50E Saulešći romnji akhardolas Ahinoama savi sas čhej e Ahimaacošći.

O glavno zapovedniko lešće vojskako akhardolas Avner, e Nerosko čhavo, a o Ner sas e Saulesko kako. 51E Saulesko dad o Kis thaj e Avneresko dad o Ner sas e Avielošće čhave.

52O Saul vodilas o baro rato e Filistejenca sa e vrjama dok vladilas. Kana god o Saul lijasas sama varesave zurale ili hrabre manuše, lijasas les ande piri služba.