Luka 4

E Isuseskoro iskušenie

1A o Isus, pherdo e Sveti Duhoja, irangja pe tari reka Jordan, i taro Duho sine legardo ki pustina, 2kote so sine saranda dive iskušimo taro Beng. Ko adala dive na hala ništo, a koga nakhle adala dive, ov bokhalilo.

3Togaš o Beng phengja leske: “Ako sijan o Čhavo e Devleskoro, vaker akale bareske te ovel maro.”

4A o Isus odgovoringja: “Pišimo i: ‘O manuš nane te živinel samo taro maro.’ ”12

5Togaš o Beng legargja le ko jekh učo than i taro jekh puti sikavgja leske sa o carstvija e svetoskere, 6hem phengja leske: “Ka dav tut sa akaja vlast hem i slava lengiri, adaleske soj mange dendi, i šaj te dav la kaske so me mangava. 7Ako pokloningjan tut mange, sa akava ka ovel tlo.”

8O Isus odgovoringja leske: “Pišimo tano: ‘Poklonin tut e Gospodareske, te Devleske, hem samo leske služin.’ ”

9Palo adava o Beng legargja le ko Erusalim hem čhigja le ko najučo than e Hrameskoro hem phengja leske: “Te sijan o Čhavo e Devleskoro, frde tut akatar tele! 10Soske pišimo tano:

‘Ka zapovedinel pe angelenge te arakhen tut,

11te ikeren tut ko vasta te na khuve to pro ko bar.’ ”3

12A o Isus odgovoringja leske: “Pišimo tano: ‘Ma iskušin e Gospodare, te Devle.’ ”

13Koga završingja sekova iskušenie, o Beng cidingja pe lestar dži ki javer šanca.

O Isus sikavela ki Galileja

14O Isus irangja pe ki Galileja ki sila e Duhoskiri, a baši leske šundilo ko celo adava than. 15A ov sikavela sine e manušen ko lengere sinagoge, hem sarinen falinena le sine.

O Isus nane prifatimo ko Nazaret

16I o Isus alo ko Nazaret kote so barilo hem, palo po adeti ki sabota, khugja ki sinagoga hem uštilo te čitinel. 17I sine leske dendo o lil taro prorok Isaija. Ov phravgja o lil, hem arakhla o than kote so sine pišimo:

18“O Duho e Gospodareskoro tano upro mande,

soske pomazingja man,

te objavinav o šukar haberi e čorolenge.

Bičhalgja man te propovedinav i sloboda e phandlenge,

hem e korolenge deka ka iranel pe lengoro dikhibe,

e mučimenge deka ka mukhel len ki sloboda,

19te objavinel o berš tari e Gospodareskiri milost.”4

20Togaš phandla o lil, irangja le e slugaske, hem bešla te sikavel. A o jakha sarinengere ki sinagoga sine upro leste. 21O Isus počmingja te vakerel lenge: “Avdive pherdile akala lafija so šungjen len tumare kanencar.”

22I sarine šukar vakerge lestar hem sine čudime taro šukar lafija so iklona sine leskere mostar, i vakerge: “Nane li akava e Josifeskoro čhavo?”

23A ov phengja lenge: “Sigurno ka vakeren mange akaja izreka: ‘Doktore, sasljar korkori tut!’ Adava so šungjem so ulo ko Kapernaum ker le hem akate ko to than kote so barilan.”

24I phengja: “Čače vakerava tumenge, nijekh proroko nane poštojmo ko than kote so barilo. 25Čače vakerava tumenge, ko vreme e Ilijaske, sine but udovice ko Izrael, koga na pelo bršim trin tekvaš berš hem sine ki celo phuv baro bokhalipe. 26I nijekheste na sine bičhavdo o Ilija, samo ki jekh udovica ko jabandžisko gradi Sarepta uza ko Sidon. 27I sine but leprozna ko Izrael ko vreme e prorokoskoro e Elisejeskoro, ama nijekh lendar na sine sasljardo, osven o Neeman o Sirijco.”

28Koga sa o manuša ki sinagoga šunge akava holange but. 29I uštile hem ikalge le taro gradi hem legarge le ko brego kote so sine kerdo lengoro gradi, te šaj te frden le upraldan. 30Ama o Isus nakhla maškar lende hem gelo peske.

O Isus ikalela demonen

31Togaš o Isus hulilo ko Kapernaum, ko gradi e Galilejakoro, hem sikavela sine e manušen ki sabota. 32Ola sine čudime taro leskoro učibe, adaleske so leskere lafija sine len avtoriteti.

33A ki sinagoga sine jekh manuš so sine opsednimo taro demonsko lošno duho, so vikingja sa pe glasoja: 34“Ej, so mangeja tu amendar, Isuse taro Nazaret? Alan li te uništine amen? Džanava koj sijan tu: Tu sijan o Svetco e Devleskoro!”

35Togaš o Isus zaptingja le vakerindor: “Phan to muj hem iklov lestar!”

I o demoni frdingja le ki phuv anglo sarine hem iklilo lestar bizo te povredinel le.

36Sa o manuša sine čudime hem vakerge maškar peste: “Savo tane akala lafija! Vlasteja hem silaja naredinela e lošno duhonge hem ola iklona!”

37Hem šundilo baši o Isus ko sa o pašutne thana.

O Isus sasljarela bute manušen

38O Isus iklilo tari sinagoga hem gelo ko kher e Simoneskoro. A e Simoneskiri sasuj sine la bari treska. I zamolinge e Isuse te sasljarel la. 39O Isus alo uza late, zapovedingja e treskake, hem i treska mukhla la. I oj odma uštili hem počmingja te služinel len.

40Koga pelo o kham, sarine so sine len nasvale manuša taro razno nasvalipe ange len ko Isus. A ov upro sekova jekh čhigja pe vasta hem sasljargja len.

41A bute manušendar iklona sine demojna vikindor: “Tu sijan o Čhavo e Devleskoro!”

O Isus zaptinela len sine hem na mukhela len sine te keren lafi, soske ola džange deka ov tano o Hristos.

42Koga phravdilo o dive, o Isus gelo ko jekh čučo than. A o manuša rodena le sine hem koga resle adathe kaj so sine o Isus, na mukhena le sine te džal peske lendar.

43A ov phengja lenge: “I ko javera da gradija mora te propovedinav o evangelije bašo carstvo e Devleskoro, soske bašo adava sijum bičhavdo.”

44Hem prodolžingja te propovedinel ko Judejska sinagoge.