Macedonian Arli Romani
Luka 3
O Jovan Krstitel spreminela o drumo
Koga o caro o Tiberija vladingja upro e Rimeskoro carstvo dešupandž berš, o Pontij Pilat vladingja ki Judeja, o Irod vladingja ki Galileja, a leskoro phral o Filip vladingja ki Itureja hem ko Trahonitida, o Lisanija vladingja ki Avilinija, hem koga o Ana hem o Kajafa sine bare sveštenikija, e Devleskoro lafi alo e Zaharijaskere čhaveske e Jovaneske ki pustina. I o Jovan gelo ko sa o thana tari reka Jordan te propovedinel e manušenge deka trebela te iranen pe ko Devel hem te oven krstime, te šaj o Devel te oprostinel lengere grevija. Sar soj pišimo ko prorok Isaija:
“Ov tano o glaso so vikinela ki pustina:
‘Spreminen o drumo e Gospodareskoro!
Ramnonen o drumija leskere!
Sekoja dolina te phergjol,
a sekoja planina hem rido te peren!
O bange drumija te oven ispravime
a o neramna drumija te oven ramnome!
I sa o manuša ka dikhen e Devleskoro spasenije1.’ ”
A o Jovan vakergja bute manušenge so iklile te krstinel len: “Tumen e sapeskere čhave! Koj vakergja tumenge te našen tari e Devleskiri holi so avela? Sikaven tumare životoja deka čače pokajngjen tumen hem ma mislinen deka i dovolno te phene ki tumende: ‘O Avraam tano amaro parapapo.’ Adaleske vakerava tumenge o Devel šaj akale barendar te vazdel čhave e Avraameske. Akje o tover taro sudo e Devleskoro više tano ko koreno e kašteske, hem sekova kaš so na dela šukar plodi ka ovel čhindo hem frdimo ki jag.”
A o narodo pučlja le: “So trebela te kera?”
A o Jovan odgovoringja lenge: “Kas isi duj gada, neka del okole kas so nane, a kas isi hajbaske, neka del okole kas so nane.”
Nesave danočnikija da ale te oven krstime hem pučle e Jovane: “Učitele, so te kera amen?”
Ov odgovoringja lenge: “Ma roden poviše danok taro adava so o zakoni phenela tumenge te roden.”
Togaš nesave vojnikija da pučle e Jovane: “A amen so te kera?”
A ov odgovoringja lenge: “Nikastar ma len pare silaja hem nikas ma tužinen hovavno, i oven zadovolna tumare plataja.”
A o narodo adžikerela sine e Mesija i sarinen pučle pe ki peste nane li o Jovan adava. Adaleske o Jovan odgovoringja sarinenge: “Me krstinava tumen pajneja, ama avela pobaro mandar, kaske so na sijum dostojno leskere sandale te phravav. Ov ka krstinel tumen e Sveti Duhoja hem e jagaja. Ko leskere vasta tani i lopata, hem ka odvinel o giv taro lušpe, ka khedel po giv ki štala, hem ka tharel o lušpe jagaja so na ačhola.” Hem bute javere lafencar o Jovan vakergja lenge o evangelije.
A o Jovan opomeningja e vladitele e Irode, adaleske so lela romnake pe phraleskere romna e Irodijada hem bašo but javera lošna bukja so kergja. Togaš o Irod kergja javer lošnipe: čhigja e Jovane ko zatvor.
O Jovan krstinela e Isuse
Koga sa o manuša krstinge pe, krstingja pe o Isus da. I togaš dži kote o Isus molinela pe sine, phravdilo o nebo, hem o Sveti Duh hulilo upro leste ko oblik gulubeskoro. Togaš šundilo glaso taro nebo: “Tu sijan mo manglo Čhavo so tute tani mi vojla.”
E Isuseskere predcija
O Isus počmingja pi služba anglo narodo koga sine le trijanda berš. A o narodo mislinge deka o Isus tano čhavo e Josifeskoro.
O Josif sine čhavo e Ilijaskoro.
O Ilija sine čhavo e Matateskoro,
o Matat sine čhavo e Levijaskoro,
o Levija sine čhavo e Melhijaskoro,
o Melhi sine čhavo e Janajeskoro,
o Janaj sine čhavo e Josifeskoro.
O Josif sine čhavo e Matatijeskoro,
o Matatij sine čhavo e Amoseskoro,
o Amos sine čhavo e Naumeskoro,
o Naum sine čhavo e Eslijaskoro,
o Eslij sine čhavo e Nangejeskoro.
O Nangej sine čhavo e Maateskoro,
o Maat sine čhavo e Matatijeskoro,
o Matatij sine čhavo e Semeineskoro,
o Semein sine čhavo e Josiheskoro,
o Josih sine čhavo e Jodaskoro.
O Joda sine čhavo e Joananeskoro,
o Joanan sine čhavo e Risaskoro,
o Risa sine čhavo e Zorovaveleskoro,
o Zorovavel sine čhavo e Salatieleskoro,
o Salatiel sine čhavo e Niriskoro.
O Niri sine čhavo e Melhijaskoro,
o Melhi sine čhavo e Adiskoro,
o Adi sine čhavo e Kosameskoro
o Kosam sine čhavo e Elmadameskoro,
o Elmadam sine čhavo e Ireskoro.
O Ir sine čhavo e Isuseskoro2
o Isus sine čhavo e Eliezereskoro,
o Eliezer sine čhavo e Jorimeskoro,
o Jorim sine čhavo e Matateskoro,
o Matat sine čhavo e Levijaskoro.
O Levij sine čhavo e Simeoneskoro,
o Simeon sine čhavo e Judaskoro,
o Juda sine čhavo e Josifeskoro,
o Josif sine čhavo e Jonameskoro,
o Jonam sine čhavo e Elijakimeskoro.
O Elijakim sine čhavo e Melejaskoro,
o Meleja sine čhavo e Menaskoro,
o Mena sine čhavo e Matataskoro,
o Matata sine čhavo e Nataneskoro,
o Natan sine čhavo e Davideskoro.
O David sine čhavo e Jesejeskoro,
o Jesej sine čhavo e Ovideskoro,
o Ovid sine čhavo e Voozeskoro,
o Vooz sine čhavo e Salmoneskoro,
o Salmon sine čhavo e Naasoneskoro.
O Naason sine čhavo e Aminadaveskoro,
o Aminadav sine čhavo e Admineskoro,
o Admin sine čhavo e Arnieskoro,
o Arni sine čhavo e Esromeskoro,
o Esrom sine čhavo e Fareseskoro,
o Fares sine čhavo e Judaskoro.
O Juda sine čhavo e Jakoveskoro,
o Jakov sine čhavo e Isakoskoro,
o Isak sine čhavo e Avraameskoro,
o Avraam sine čhavo e Taraskoro,
o Tara sine čhavo e Nahoreskoro.
O Nahor sine čhavo e Seruheskoro,
o Seruh sine čhavo e Ragaveskoro,
o Ragav sine čhavo e Falekeskoro,
o Falek sine čhavo e Evereskoro,
o Ever sine čhavo e Salaskoro.
O Sala sine čhavo e Kainaneskoro,
o Kainan sine čhavo e Arfaksadeskoro,
o Arfaksad sine čhavo e Simeskoro,
o Sim sine čhavo e Noeskoro,
o Noe sine čhavo e Lameheskoro.
O Lameh sine čhavo e Matusalaskoro,
o Matusala sine čhavo e Enoheskoro,
o Enoh sine čhavo e Jaredeskoro,
o Jared sine čhavo e Malaleileskoro,
o Malaleil sine čhavo e Kainaneskoro.
O Kainan sine čhavo e Enoseskoro,
o Enos sine čhavo e Siteskoro,
o Sit sine čhavo e Adameskoro,
o Adam sine čhavo e Devleskoro.
Source notes (2)
- Cross-reference Spasenije Isa 40:3-5.
- Footnote Isuseskoro Isus Navin
Macedonian Arli Romani. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.