Luka 2

E Isuseskoro bijanibe

1Ko adava vreme, o Rimsko caro o Avgust dengja naredba te kerel pe popis sa e manušenge ko carstvo. 2Adava sine prvo popis kerdo dži kote o Kvirinij sine upravniko ki Sirija. 3I sekoj gelo ko po gradi te potpišinel pe. 4Agjar o Josif gelo taro gradi Nazaret ki Galileja, ki Judeja, ko Vitleem, ko gradi e Davideskoro, adaleske so sine tari familija hem taro seme e Davideskoro. 5O Josif gelo adathe te potpišinel pe, ple verenicaja e Marijaja, so sine khamni. 6Dži kote sine adathe ko Vitleem, alo o vreme e Marijake te bijanel e čhave. 7Koga bijangja pe prvo čhave, pakjargja le ko pherne hem čhigja le ko pus, soske na sine gostinsko soba baši lenge.

O angejla vakerena e pastirenge deka bijandilo o Spasiteli

8Ko adava than, adaja rat sine paše nesave pastijra so arakhena sine pumare bakhren ki niva. 9I taro jekh puti pojavisalilo lenge o angeli e Gospodareskoro hem i slava e Gospodareskiri osvetlingja len, a ola but darandile.

10Ama o angeli phengja lenge: “Ma daran! Akje anava tumenge šukar haberi, so ka anel bari radost sa e manušenge! 11Avdive ko gradi e Davideskoro bijandilo tumenge o Spasiteli, soj tano o Hristos o Gospodari. 12Akava ka ovel tumenge o znako: ka arakhen e čhave pakjardo ko pherne hem pašlola ko pus.”

13Taro jekh puti, e angeleja pojavisalili bari vojska angejla so falindor e Devle vakerge:

14“Slava e Devleske ko učipe,

a ki phuv mir e manušencar, so lencar o Devel tano zadovolno!”

15Koga o angejla irange pe ko nebo, o pastijra phenge maškar peste: “Ajde te dža ko Vitleem hem te dikha adava so phengja amenge o Gospodari.”

16I gele sigate, hem arakhle e Marija hem e Josife hem e čhave sar pašlola sine ko pus. 17Koga dikhle e čhave, vakerge javerenge sa so sine phendo e čhavestar. 18Hem sarine so šunge adava taro pastijra sine začudime. 19Ama i Marija garavela sine sa akala bukja ko po srce hem razmislinela sine. 20O pastijra gele peske, slavindor hem falindor e Devle bašo sa so šunge hem so dikhle, agjar sar so sine phendo lenge.

21A ko oftoto dive koga trebela sine te obrezinen e čhave, denge le o anav Isus, sar so phengja sine o angeli angleder te ačhol i Marija khamni.

E Isuse anena ko Hrami

22Koga alo o vreme bašo adeti i daj te čistinel pe palo e Mojseskoro Zakoni, o Josif hem i Marija legarge e čhave ko Erusalim te anen le anglo Gospodari 23(sar so sine pišimo ko Zakoni e Gospodareskoro: “Sekova prvo bijamo murš trebela te posvetinel pe e Gospodareske”1) 24hem te den žrtva (sar soj phendo ko Zakoni e Gospodareskoro: “duj tikne gulubija ili duj terne gulubija.2”)

25A ko Erusalim sine jekh manuš so vikinela pe Simeon. Ov sine pravedno hem pobožno. Adžikerela sine te avel o Mesija te spasinel e Izraelcon, hem o Sveti Duh sine upro leste. 26Leske sine phendo taro Sveti Duh deka nane te merel sa dži kote angleder na dikhela e Gospodareskere Mesija3. 27O Sveti Duh vakergja leske te džal ko Hrami, i ov gelo. Togaš dikhla e Josife hem e Marija so ange e čhave e Isuse ko Hrami te keren adava so sine o adeti taro Zakoni. 28O Simeon lela e čhave ko pe vasta hem blagodaringja pe e Devleske vakerindor:

29“Gospode, akana me to sluga šaj te merav ko mir,

sar so phengja mange.

30Soske me jakha dikhle to spasenije,

31so spremingjan le anglo jakha sa e nacijenge.

32Ka ovel svetlina so ka svetinel okolenge so na džanena tut,

hem ka anel slava te narodoske e Izraelconge4.”

33E Isuseskoro dad hem i daj čudisalile adalestar so o Simeon phengja baši leske.

34Togaš o Simeon blagoslovingja len hem phengja e Marijake e Isuseskere dajake: “Akava čhavo i birimo buten te peravel hem te vazdel ko Izrael. Ov tano birimo te ovel e Devleskoro znako, ama but džene ka otfrlinen le. 35Ka sikaven pe butengere garavde misle, ama i čhurik ka posavel ti duša.”

I Ana blagodarinela e Devleske bašo Mesija

36Adathe sine i proročka i Ana, i čhaj e Fanuileskiri taro pleme e Asireskoro. Oj sine ko phure berša, a pe romeja živingja efta berša. 37Palo adava sine udovica dži ko oftovardešu štar berš. Oj nikat na mukhla o Hrami, nego služinela sine dive rat, molindor hem postindor. 38Ko adava momenti, ali uza lende, blagodaringja e Devleske bašo čhavo, hem lela te vakerel bašo čhavo sarinenge so adžikerena spasenije e Erusalimeske.

39Koga o Josif hem i Marija kerge sa so sine pišimo ko Zakoni e Gospodareskoro, irange pe ko pumaro gradi ko Nazaret ki Galileja. 40A o čhavo bajrola sine hem zorajlola, pherindor mudrost hem i blagodat e Devleskiri sine upro leste.

O čhavo o Isus ko Hrami

41Sekova berš o dad hem i daj e Isuseskere džana sine ko Erusalim bašo prazniko Pasha. 42Koga e Isuse sine le dešuduj berš, palo adeti, ola gele adari te slavinen o prazniko. 43Koga nakhla o prazniko, dži kote iranena pe sine khere o Josif hem i Marija na primetinge deka lengoro čhavo o Isus ačhilo ko Erusalim. 44Mislindor deka o Isus tano maškar o manuša so džana peske sine lencar, gele jekh dive phirindor. A poslem počminge te roden le maškar pumari familija hem ko amala. 45Koga našti arakhle le, irange pe ko Erusalim te roden le. 46I palo trin dive arakhle le ko Hrami, sar bešela maškar o učitejla, sar šunela len hem pučela len. 47Sarine so šunena le sine, začudime sine taro leskoro džandipe hem taro leskere odgovojra.

48Koga dikhle le leskoro dad hem i daj but čudisalile. Leskiri daj phengja leske: “Mo čhavo, soske kergjan amenge akava? To dad hem me but darandilem hem rodingjem tut!”

49A o Isus pučlja len: “Soske rodena man? Na džanena li deka mora te ovav me Dadeske ko kher?”

50Ama i Marija hem o Josif na svatinge so o Isus mangla te phenel lenge adaleja.

51Palo adava, o Isus gelo lencar ko Nazaret hem sine lenge poslušno. A i daj leskiri sa akala bukja garavela len sine ko po srce. 52A o Isus bajrola sine ki mudrost, ko telo hem ki blagodat anglo Devel hem anglo manuša.