Jakov 5

Opomenibe bašo barvale

1Šunen akana, tumen barvajlalen! Silno roven hem kukjinen bašo bare muke so ka arakhel tumen. 2O barvalipe tumaro kjirnola, a o šeja tumare hale len o insektija. 3O zlato hem o srebro tumaro kjirnilo, i lengiri rgja ka svedočinel protiv tumende hem ka hal tumare tejla sar i jag. Khedingjen tumenge barvalipe, a posledna tane o dive. 4Dikhen! O rabotnikija kerge buti tumende ko nive, ama tumen na platingjen len. O Gospodari e Neboskere Vojskengoro šungja o rojba okolengoro so khedena sine tumenge ko nive. 5Živingjen ki phuv luksuzno hem uživingjen; phergjen tumare srcija sar i stoka so pherela pe angleder o čhiniba. 6Osudingjen hem mudargjen e pravedniko, a ov na protivingja pe tumenge.

Trpenie ko muke

7Adaleske phrajlalen, oven trpeliva dži kote o Gospodari na avela. Akje o manuš so kerela buti ki phuv adžikerela i phuv te del vredno plodi hem trpelivo adžikerela o esenska hem o proletna bršima. 8Hem tumen da oven trpeliva hem oven zorale, adaleske so paše tano o ajbe e Gospodareskoro. 9Phrajlalen, ma brborinen jekh protiv javer te šaj te na oven osudime. Akje o sudija tergjola anglo udar!

10Phrajlalen, neka o prorokija, so propovedinena sine ko anav e Gospodareskoro, ovena tumenge primer. Ola but cidinge, ama sine trpeliva. 11Akje, okolenge so izdržinge vakereja deka tane blagoslovime. Šungjen bašo e Joveskoro trpenie hem dikhlen ko krajo so o Gospodari kergja. O Gospodari tano pherdo so žal hem milost. 12A angleder o sa, me phrajlalen, ma han sovli – ni ko nebo, ni ki phuv, ni ko ništo javer. Koga phenena: “Oja”, neka ovel čače “oja”, koga phenena: “Na”, neka ovela čače “na”, te šaj te na oven osudime.

I molitva veraja

13Ako nekoj tumendar tano ko problemi, neka molinel pe. Ako nekoj tumendar tano radosno, neka slavinel e Devle gilencar. 14Dali nekoj tumendar tano nasvalo? Neka vikinel ki peste e starešinen tari crkva hem neka molinen pe leske makhindor le mirizlivo ujle ko anav e Gospodareskoro. 15I molitva vakerdi veraja ka sasljarel e nasvale. O Gospodari ka vazdel le hem te kergja grevija, ka ovel leske oprostimo. 16Adaleske, priznajnen tumare grevija jekh jekheske hem molinen tumen jekh jekheske te oven sasljarde. I molitva e pravednikoskiri tani silno hem šaj te kerel but.

17O proroko Ilija sine manuš sar amende. Sa srceja molingja pe te na del bršim, hem na dengja bršim ki adaja phuv, trin tekvaš berš. 18Palo adava palem molingja pe, hem o nebo dengja bršim, hem i phuv dengja po plodi.

Te iranel pe e našavde taro lošno drumo

19Phrajlalen, ako nekoj tumendar cidingja pe taro čačipe, a nekoj irangja le, 20te džanen deka adava so irangja e grešniko taro lošno drumo ka spasinel leskoro životo taro meriba hem ka učharel but grevija.