Jakov 4

Ponizinen tumen e Devleske

1Kotar avena o akošibe hem o maribe maškar tumende? Na avena li taro tumare želbe, so kejrona andre ki tumende? 2Mangena, ama na dobinena, i adaleske mudarena. Ljubomorinena upro okova so isi javeren, ama našti te dobinen, i adaleske akošena tumen hem marena tumen. Nane tumen, adaleske so na rodena taro Devel. 3A koga rodena, na dobinena adaleske so rodena lošno nameraja, te šaj adava so ka dobinen te trošinen bašo tumaro zadovolstvo.

4Tumen o preljubnikija! Na džanena li deka o amalipe akale svetoja tano dušmani e Devleske? Adaleske, sekoj so mangela te ovel amal e svetoske, ovela dušmani e Devleske. 5Ili mislinena deka o Sveto Lil džabe vakerel deka o Devel ljubomoraja mangela e duho so kergja le te živinel amende? 6Ama ov amenge dela pobari blagodat. Adaleske o Sveto Lil vakerela:

“O Devel protivinela pe okolenge so kerena pe ko baro,

a e ponizimenge dela blagodat.”1

7Adaleske pokorinen tumen e Devleske, a protivinen tumen e Bengeske, i ov ka našel tumendar. 8Aven paše uza ko Devel hem ov ka avel paše uza tumende. Thoven tumare vasta grešnikonalen hem čistinen tumare srcija, tumen so sijen ko duj gogja! 9Tugujnen, kukjinen hem silno roven bašo tumare grevija! Tumaro asajbe neka ovel ko rojbe, a tumari radost ki žalost! 10Ponizinen tumen anglo Gospodari, i ov ka vazdel tumen.

Ma osudinen jekh jekhe

11Phrajlalen, ma čhiven iftire jekh jekheske. Sekoj so vakerela protiv po phral, ili osudinela pe phrale, ov vakerela protiv o Zakoni hem osudinela o Zakoni. A ako osudingjan o Zakoni, togaš tu na ikereja le, nego sijan leskoro sudija. 12A samo o Devel tano adava so dengja o Zakoni hem ov tano o Sudija, so šaj te spasinel hem te uništinel. A tu, koj sijan te sudine te pašutne?

Našti planirinena bizo Devel

13Šunen akana, tumen so vakerena: “Avdive ili tajsa ka dža ko akava ili ko okova gradi. Adathe ka ačhova jekh berš, ka kera buti hem ka zarabotina.” 14Tumen ni na džanena so ka ovel tajsa tumare životoja? Tumen sijen sar i magla so iklola hem odma našavgjola. 15Mesto adava, trebela te vakeren: “Ako e Gospodareskiri vojla, ka živinav hem ka kerav akava ili okova.” 16Ama tumen falinena tumen tumare bare planencar. Sekova asavko faliba tano lošno.

17Adaleske, ako nekoj džanela te kerel šukaripe, a na kerela le, ov kerela grevo.