Jakov 3

Arakh ti čhib

1Phrajlalen, na trebela but tumendar te oven učitejla, soske džanaja deka amen so sijem učitejla ka ova posilno sudime. 2Adaleske so, sarinen amen ko but bukja grešinaja. Ama ako nekoj na grešinela ko lafija, ov tano sovršeno, sposobno te kontrolirinel celo po telo.

3Koga čhivaja e grastenge o uzde1 ko muj te pokorinen pe amenge, upravinaja celo lengere teloja. 4Dikhen o brodija da: doborom bare hem silna bavlala legarena len, a lencar upravinela but tikno volani so legarela le kaj so o kapetani mangela. 5Isto agjar i čhib da tani tikno delo taro telo, ama falinela pe bare bukjencar. Akje, i tikni jag šaj tharela i bari šuma! 6Agjar i čhib da tani jag. I čhib tani lošno sveto maškar amaro telo. Ruminela celo amaro telo hem tharela sa e manušengoro životo jagaja – so avela taro pekol!

7Sekoja vrsta taro životne, taro čirikla, taro okola so lazinena ki phuv hem taro životne ko pani šaj te oven pitomime hem o manuš pitomingja len. 8Ama nijekh manuš našti te pribirinel pi čhib. Oj tani lošnipe so na odmorinela, pherdi meribaskere otroveja.

9Laja blagoslovinaja e Gospodare hem e Dade hem laja daja armanja e manušen soj kerde prema e Devleskoro izgled. 10Taro isto muj iklola hem blagoslovija hem armanja. Phrajlalen, akava na trebela te ovel agjar. 11Šaj li taro isto izvor te iklol gudlo hem londalo pani? 12Šaj li, phrajlalen, i smokva te bijanel maslinke, ili i drakh te bijanel smokve? Agjar ni o londalo izvor našti te del gudlo pani.

I čačutni hem i hovavni mudrost

13Koj tano maškar tumende mudro hem gogjaver? Neka sikavel adava pe šukar životoja, kerindor šukar dejla ki poniznost so avela tari mudrost. 14Ama, ako tani tumenge ko srce i kjerki ljubomora hem i sebičnost, ma falinen tumen adaleja so ka otkažinen tumen taro čačipe. 15Asavki mudrost na avela taro nebo, nego tari phuv tani, telesno hem demonsko. 16Soske, kaj so isi ljubomora hem sebičnost, adathe nane redo hem sa tano lošno.

17Ama i mudrost so avela taro nebo, najanglal tani čisto, palo adava mirno, krotko hem pokorno, pherdi so milost hem šukar plodija, na kerela razlika maškar o manuša hem nane dujmujali. 18A okola so sejnena ko mir, khedena o plodi tari pravednost.