Jakov 2

Ma keren razlika maškar o manuša

1Phrajlalen, tumen so verujnena ko amaro slavno Gospodari o Isus Hristos, ma keren razlika maškar o manuša.

2Na primer, ko tumaro khediba khuvela nesavo manuš zlatno angrustikaja hem ko šuže šeja, a pali leste khuvela čorolo manuš ko pharavde šeja, 3i tumen pošukar poštojnena adale soj ko šuže šeja hem vakerena leske: “Akje beš akate ko šukar than”, a e čoroleske vakerena: “Tu tergjov adathe”, ili “Ava beš uza me prende!” 4Na kerena li agjar razlika maškar tumende hem na ulen li sar o nepravedna sudije?

5Šunen me mangle phrajlalen: na biringja li o Devel okolen soj čorole ko sveto te oven barvale e veraja hem te nasledinen o carstvo so o Devel vetingja okolenge so mangena le? 6A tumen ladžakergjen e čorolen! Nane li o barvale adala so iskoristinena tumen hem vlečinena tumen ko sudija? 7Nane li ola adala so vakerena lošno e Gospodareskere šukar anaveske, kaskere so sijen?

8Ako čače ikerena e careskoro zakoni sar soj pišimo ko Sveto Lil: “Mang te pašutne sar korkori tut” – šukar kerena. 9Ama, te kerena razlika, kerena grevija hem o Zakoni osudinela tumen sar okolen so phagena le. 10Soske, koj ikerela o celo Zakoni, a grešinela samo ko jekh, krivo tano bašo celo Zakoni. 11Adaleske so okova so phengja: “Ma ker preljuba”, vakergja da: “Ma mudar.”1 Adaleske, ako na kereja preljuba, a mudareja, krivo sijan bašo phagiba o Zakoni.

12Keren lafi hem ponašinen tumen sar adala so ka oven sudime spored o zakoni so dela sloboda. 13Soske nane te ovel milostlivo okoleske so na sikavgja milost. A i milost pobedinela e sudo.

I vera bizo dejla tani muli

14Me phrajla, ako nekoj vakerela deka isi le vera, a dejla nane le, so dobinela adalestar? Šaj li asavki vera te spasinel le? 15Ako nesavo phral ili phen nane len so te uraven ili nane len so te han sekova dive, 16a nekoj tumendar vakerela lenge: “Džan ko mir, takjoven hem čajloven!”, a na dengja len adava so trebingja lengere teloske, savi tani i korist adalestar?

17Agjar hem i vera korkori pestar, ako nane la dejla, oj tani muli.

18Ama nekoj ka vakerel: “Tut isi vera, a man isi dejla.” Sikav mange ti vera bizo dejla, a me ka sikavav tuke mi vera me deloncar.

19Tu verujneja li deka isi samo jekh Devel? Šukar kereja! Ama o demojna da verujnena adava hem tresinena!

20Bigogjakereja, mangeja li dokaz deka i vera bizo dejla tani čuči? 21Na sine li amaro parapapo o Avraam opravdimo preku pe dejla, koga dengja pe čhave e Isako žrtva ko žrtveniko. 22Dikheja li deka leskiri vera hem leskere dejla kerena sine zaedno buti, hem deka leskiri vera e deloncar uli pherdi. 23Hem agjar pherdilo adava soj pišimo ko Sveto Lil: “O Avraam verujngja e Devleske hem adava računingja pe leske sar pravednost”, hem sine vikimo e Devleskoro amal. 24Dikhena deka o manuš na ovela pravedno anglo Devel samo preku vera, nego e deloncar da.

25Hem isto agjar, i Raav so sine bludnica, opravdingja pe ple deloncar agjar so ugostingja e Izraeleskere špijonen hem bičhalgja len taro javer drumo. 26Adaleske sar soj o telo bizo duho mulo, agjar hem i vera bizo dejla tani muli.