Jakov 1

Voved

1Me, o Jakov o sluga e Devleskoro hem e Gospodareskoro e Isuse Hristoskoro, pozdravinava e Izraeleskere dešuduje plemen soj tane rasturime ko celo sveto.

O iskušenia

2Phrajlalen, koga avena upra tumende razna iskušenia, dikhen adava so bari radost, 3adaleske so džanena deka o ispit tumare verakoro bajlarela tumaro trpenie. 4A o trpenie neka kerel buti ki tumende te šaj ovena zrela hem sovršena, bizo ništo te falinel tumenge.

5Ako nekaske tumendar falinela mudrost, neka rodel la e Devlestar, so sarinenge dela phravde srceja hem nikas na ukorinela, hem ka del pe leske. 6Ama koga rodena, mora te verujnen, a na te sumninen tumen, adaleske so okova so sumninela pe tano nestabilno sar o morsko talasi so i bavlal vazdela le hem frdela le tari jekh strana ki javer. 7Asavko manuš ma te mislinel deka ka dobinel nešto e Gospodarestar, 8adaleske so asavko manuš tano ko duj gogja hem nane stabilno ko sa so kerela.

9O čorolo phral neka falinel pe adaleja so o Devel vazdingja le, 10a o barvalo adaleja so ponizingja le, adaleske so ka našavgjovel sar i luludi ko pole. 11Adaleske so koga o kham iklola, ovela baro tatipe hem šukjarela o rastenije, a i luludi lakiri perela hem lakoro šužipe našavgjola. Agjar o barvale da ka našavgjoven dži kote kerena pi buti.

12Blagoslovimo tano adava manuš so trpinela ko iskušenie, soske koga ka nakhel o iskušenie, ka priminel i kruna e životoskiri so o Gospodari vetingja la okolenge so mangena le.

13Koga nekoj tano ko iskušenie, ma te phenel: “O Devel iskušinela man”, adaleske so o Devel našti te ovel iskušimo lošnipaja, a ni ov korkori nikas na iskušinela. 14Nego sekas iskušinela le korkori leskiri želba so vlečinela le hem hovavela le. 15Togaš i želba ovela khamni hem bijanela grevo, a o kerdo grevo bijanela meriba.

16Ma oven hovavde, me mangle phrajlalen! 17Sekova šukar daro hem sekova sovršeno poklon avela taro nebo, e Dadestar so kergja sa so svetinela ko nebo, so nikat na meninela pe sar i senka. 18Ov biringja te bijanel amen preku o lafi e čačipaskoro, te ova prva maškar sa so kergja.

Te šunel pe hem te kerel pe o lafi

19Akava te džanen, me mangle phrajlalen: sekova manuš trebela brzo te ovel ko šuniba, a pohari te kerel lafi hem te na holanel sigate, 20adaleske so e manušeskiri holi na anela pravda anglo Devel. 21Adaleske, frden tumendar sa o melalipe hem sekova lošnipe hem ponizno priminen o lafi soj tano sadimo ki tumende, so šaj te spasinel tumen.

22Ma oven okola so samo šunena o lafi e Devleskoro hem agjar pumen hovavena, nego oven okola so kerena adava so o Devel vakerela. 23Adaleske, sekoj so šunela o lafi e Devleskoro, a na kerela le, ov tano sar manuš so šukar dikhela po muj ki jajna. 24Hem koga ka dikhel pe šukar, džala peske hem odma bistrela savo sine. 25Ama, koj šukar dikhela pe ko sovršeno zakoni so anela sloboda hem ikerela pe ki leste, hem na bistrela adava so šungja, nego kerela adava – ka ovel blagoslovimo ko sa so kerela.

26Ako nekoj dikhela pe sar pobožno, a na kontrolirinela pi čhib, adava korkori pes hovavela; a leskiri pobožnost ništo na vredinela. 27Akaja tani i pobožnost soj čisto hem bizo mana anglo Devel o Dad: te grižine tut bašo čhave bizo dad hem bizi daj hem bašo udovice ko lengere problemija hem te arakhe tut taro akava rumimo sveto.