1 Jovan 1

O Lafi e životoskoro

1Okova so sine taro početok, so šungjem, so amare jakhencar dikhlem, so dikhaja sine hem so amare vastencar pipingjem, adava propovedinaja bašo Lafi e životoskoro. 2Koga adava životo sikavgja pe, amen dikhlem hem svedočinaja baši leske, hem vakeraja tumenge taro večno životo, so sine e Dadeja ko nebo hem sikavgja pe amenge. 3Vakeraja tumenge bašo adava so dikhlem hem so šungjem, te šaj tumen da te ovel tumen zaedništvo amencar. A amaro zaedništvo tano e Dadeja hem leskere Čhaveja, e Isuse Hristeja. 4Akava pišinaja tumenge te šaj amari radost te ovel celosno.

O Devel tano svetlina

5Akavaj o lafi so šungjem le lestar hem vakeraja le tumenge: O Devel tano svetlina hem ki leste nane nisavi temnina. 6Ako phenaja deka isi amen leja zaedništvo, a phiraja ki temnina, togaš hovavaja hem na živinaja spored o čačipe. 7Ama ako phiraja ki svetlina, sar soj ov ki svetlina, isi amen zaedništvo jekh jekheja, hem o rat leskere Čhaveskoro e Isuseskoro čistinela amen taro sekova grevo.

8Ako phenaja deka nane amen grevo, hovavaja korkori amen hem o čačipe nane ki amende. 9Ako priznajnaja amare grevija e Devleske, ov tano verno hem pravedno te oprostinel amenge o grevija hem ka čistinel amen tari sekoja nepravda. 10Ako phenaja deka na grešingjem, e Devle keraja hovavno hem leskoro lafi nane ki amende.