Dejla 5

O Ananija hem i Sapfira

1Jekh manuš so vikinela pe sine Ananija, zaedno pe romnaja e Sapfiraja bikinge pi niva. 2I dogovoringja pe ple romnaja te mukhen peske jekh delo taro adala pare, a okola so ačhile ange len ko apostojla.

3Togaš o Petar phengja: “Ananija, soske o Beng phergja to srce te hovave e Sveti Duho hem te garave jekh delo taro adala pare so bikingjan i niva? 4Na sine li i niva tli angleder te bikine la? A koga bikingjan la, o pare sine tle i so mangeja sine šaj kereja lencar? Soske ko to srce odlučingjan te kere akava? Tu na hovavgjan samo e manušen, nego e Devle.”

5Koga o Ananija šungja adala lafija, pelo hem mulo ko than. I bari dar uklingja sarinen koga šunge adava. 6Togaš uštile nesave terne čhave, pakjarge leskoro telo, i legarge hem parunge le.

7A koga nakhla paše trin satija ali e Ananijaskiri romni, a oj na džangja so ulo.

8I o Petar pučlja la: “Vaker mange, bašo doborom pare li bikingjen i niva?”

A oj odgovoringja leske: “Oja, bašo doborom pare.”

9Togaš o Petar vakergja: “Soske dogovoringjen tumen te iskušinen e Gospodareskoro Duho? Akje, anglo udar tergjona okola so parunge te rome, a akana ka legaren tu da.”

10Ko adava momenti oj angli leste peli hem muli ko than. Togaš khuge o terne čhave hem arakhle la muli, i legarge la hem parunge la uza ko lakoro rom. 11I bari dar uklingja celo crkva hem sarine so šunge bašo sa akava.

O apostojla sasljarena buten

12Preku o apostojla ovena sine but znakija hem čudija maškar o narodo. Hem sa o vernikija khedena pe sine zaedno ko trem e Solomoneskoro. 13Nikoj javer našti sine te priklučinel pe lenge, ama o narodo but falinge len. 14A sa poviše murša hem džuvla verujnena sine ko Gospodari hem ovena sine delo taro vernikija. 15O manuša ikalena sine pumare nasvalen ko ulice. Čhivena len sine ko nosilke hem ko postele, te šaj barem i senka e Petareskiri te perel upro lende dži kote nakhela sine. 16A but manuša da avena sine taro gradija soj uza ko Erusalim hem anena sine pumare nasvalen hem okolen so sine mučime taro lošna duhija, i sarinen ovena sine sasljarde.

O apostojla anglo Evrejsko Sovet

17Togaš o baro svešteniko hem sa okola so sine leja tari strana e sadukejengiri sine pherde ljubomoraja. 18I astarge e apostolen hem čhige len ko javno zatvor.

19Ama koga rakjilo, o angeli e Gospodareskoro phravgja o udara e zatvoreskere hem ikalgja len taro zatvor hem phengja: 20“Džan ko Hrami, tergjoven hem vakeren e narodoske sa bašo akava nevo životo.”

21I ola šunge le, i rano sabajleja khuge ko Hrami hem počminge te sikaven e manušen.

Koga alo o baro svešteniko hem okola so sine leja, khedinge o Evrejsko Sovet – sa e Izraeleskere starešinen – i naredinge te anen e apostolen taro zatvor.

22Ama, koga resle o čuvajra ko zatvor, na arakhle len andre, i irange pe hem vakerge: 23“O udara e zatvoreskere sine šukar phandle, a o čuvajra tergjona sine anglo udara. Ama koga phravgjem o udara, na arakhlem nikas andre.”

24Koga šunge adava o naredniko e Hrameskere čuvarengoro hem o prvosveštenikija sine bunime hem pučle pe so šaj te ovel akava.

25Togaš alo nekoj hem phengja lenge: “Akje o manuša so čhigjen len ko zatvor tergjona ko Hrami hem sikavena e narodo!”

26Togaš o naredniko pe čuvarencar gelo hem angja e apostolen, ama na ange len silaja, soske darandile te na frden o narodo bara upro lende.

27Koga ange len anglo Evrejsko Sovet, o baro svešteniko pučlja len: 28“Naredingjem tumenge silno te na sikaven e narodo ko adava anav? A tumen phergjen o Erusalim tumare učibaja hem mangena o rat upra amende te perel adale manušeskoro.”

29A o Petar hem o javera apostojla odgovoringe lenge: “E Devle mora te šuna a na e manušen! 30O Devel amare parapapongoro vazdingja e Isuse taro mule, so tumen čhigjen le ko krsto hem mudargjen le. 31O Devel voznesingja le hem čhiga le tari pi desno strana sar Vodači hem Spasiteli, te šaj o Izrael te pokajnel pe hem te ovel oprostime leskere grevija. 32Amen sijem svedokija adalestar, sar hem o Sveti Duh, so o Devel dengja okolenge soj tane leske poslušna.”

33Koga šunge o manuša taro Evrejsko Sovet adava, but holange hem mangle te mudaren len.

34Ama jekh farisejco so leskoro anav sine Gamalil, učiteli e Zakoneskoro, poštojmo taro celo narodo, uštilo hem naredingja te ikalen hari avrik e apostolen. 35I phengja: “Izraelska manušalen, razmislinen šukar so ka keren akale manušencar. 36Adaleske so angleder nesavo vreme iklilo o Tevda so vakergja korkori peske deka tano nešto, i verujnge leste paše štaršel manuša. Ama ov sine mudardo, a sa o manuša so džana sine leja našle, i agjar ništo na ulo. 37Pala leste, ko vreme taro popis e manušengoro, iklilo o Juda o Galilejco hem phengja e narodoske te vazden buna. Hem ov da sine mudardo, i sarine so džana sine pala leste našle. 38Adaleske akana vakerava tumenge te mukhen akale manušen ko mir. Soske ako lengoro plani hem delo avela taro manuša, ka perel. 39Ama, ako lengoro učibe avela taro Devel, togaš našti te ačhaven akale manušen, nego ka oven sar okola so džana protiv o Devel.”

I o manuša taro Evrejsko Sovet šunge le.

40Togaš vikinge e apostolen te aven andre hem naredinge te kamšikujnen len. Palo adava naredinge lenge te na propovedinen ko anav e Isuseskoro, i mukhle len.

41O apostojla iklile taro Evrejsko Sovet radosna, soske sine dostojna te trpinen i ladž bašo anav e Isuseskoro. 42Sekova dive ko Hrami hem ko khera sikavena sine bizo te ačhoven hem propovedinena sine o evangelije deka o Isus tano o Hristos.