Dejla 6

O efta gjakojna

1Ko adala dive dži kote o broj e učenikongoro bajrola sine, o Evreja so kerena sine lafi Grčki, počminge te žalinen pe taro Evreja so kerena sine lafi Evrejski, adaleske so lengere udovice na dikhena len sine šukar koga sekova dive delinena sine o hajbe.

2Togaš o dešuduj apostojla vikinge ki peste sa e učenikon hem vakerge: “Nane šukar amen te bistra o propovediba bašo lafi e Devleskoro hem te delina o hajbe. 3Adaleske phrajlalen, birinen maškar tumende efta muršen, so šukar pendžarena len hem soj tane pherde e Sveti Duhoja hem so mudrost. Len ka čhiva te keren akaja buti, 4a amen ka posvetina amen ki molitva hem ko propovediba o evangelije.”

5Adava so vakerge svidžingja pe sarinenge so sine adathe. I ola biringe e Stefane, e manuše so sine pherdo veraja hem e Sveti Duhoja, e Filipe, e Prohore, e Nikanore, e Timone, e Parmene hem e Nikola taro gradi Antiohija, so angleder obratingja pe ki vera e Evrejengiri. 6Ange adale efta manušen anglo apostojla, so molinge pe hem čhige pe vasta upro lende.

7I agjar e Devleskoro lafi širinela pe sine. O broj e učenikongoro ko Erusalim but sigate bajrola sine, a maškar lende sine but sveštenikija e Evrejengere so prifatinge i vera.

O sveštenikija e Evrejengere astarena e Stefane

8A o Stefan, o manuš soj pherdo so blagodat hem sila, kerela sine bare čudija hem znakija maškar o narodo. 9Ama uštile nesave tari Sinagoga e oslobodimengiri (agjar sine vikime) – o Evreja tari Kirina, tari Aleksandrija, i nesave tari Kilikija hem tari Tikni Azija, hem počminge te akošen pe e Stefaneja. 10Dži kote kerela sine lafi o Stefan ola našti sine te protivinen pe baši leskiri mudrost so dengja le o Duho.

11Togaš pherge nesave manušen te vakeren: “Šungjem e Stefane sar vakerela lošna lafija bašo Mojsej hem bašo Devel.”

12I agjar kerge buna maškar o narodo, maškar o starešine hem maškar o učitejla e Zakoneskere, i ola ale hem astarge e Stefane hem ange le anglo Evrejsko Sovet. 13I adathe ange hovavne svedokija so phenge: “Akava manuš bizo te čhinavel vakerela protiv o Sveto Hrami hem protiv o Zakoni. 14Šungjem le sar vakerela deka o Isus taro Nazaret ka rušinel akava Hrami hem ka meninel o adetija so dengja amen o Mojsej.”

15A sarinen so bešena sine ko Sovet dikhle šukar e Stefane hem primetinge deka leskoro muj tano sar o muj e angeleskoro.