Dejla 21

O Pavle džala ko Erusalim

1Koga delingjem amen, plovingjem pravo ko Kos. A o tajsutno dive gelem ko Rodos, a adathar ko gradi Patara. 2Adathe arakhlem brodi so džala sine ki Fenikija, i uklingjem ki leste hem plovingjem. 3Koga dikhlem o Kipar, nakhavgjem le tari levo strana e brodeskiri hem gelem ki Sirija. Hulilem ko gradi Tir, kote so trebela sine te hujlarel pe o pharipe taro brodi. 4Adathe arakhlem e učenikon hem ačhilem efta dive lencar. A ola preku o Duho molinge e Pavle te na džal ko Erusalim. 5Koga nakhle adala efta dive, gelem adathar hem prodolžingjem ko amaro drumo, a ola sarine zaedno pe romnencar hem pe čhavencar ispratinge amen dži avrijal taro gradi. I ko kopno pelem ko kočaka hem molingjem amen. 6Koga pozdravingjem amen lencar, uklingjem ko brodi, a ola irange pe khere.

7Prodolžingjem ko amaro drumo taro Tir hem hulilem ko gradi Ptolemaida, kote so pozdravingjem e phralen hem ačhilem jekh dive lencar. 8A o tajsutno dive cidingjem hem reslem ki Cezarija. Adathe ačhilem ko kher e Filipejeskoro – o evangelisti, so sine jekh taro efta, so sine birimo ko Erusalim. 9Le sine le štar biženime čhaja, so prorokujnena sine.

10Adathe ačhilem poviše dive, a tari Judeja alo jekh proroko so vikinela pe sine Agav. 11Ov alo uza amende, lela e Pavleskoro pojas, phandla pe pre hem pe vasta hem vakergja: “Akava vakerela o Sveti Duh: ‘Agjar o Evreja ko Erusalim ka phanden e manuše kaskoro soj akava pojas hem ka predajnen le ko vasta e manušenge so nane Evreja.’ ”

12Koga šungjem adava, amen hem o manuša adathar molingjem e Pavle te na džal ko Erusalim.

13Togaš o Pavle odgovoringja: “Soske rovena hem phagena mo srce? Me sijum spremno na samo te ovav phandlo, nego i te merav ko Erusalim bašo anav amare Gospodareskoro e Isuseskoro.”

14I adaleske so našti sine te ubedina le, mukhlem le vakerindor: “Neka ovel e Gospodareskiri vojla.”

15Palo adala dive spremingjem amen hem gelem ko Erusalim. 16A amencar ale nesave učenikija tari Cezarija, i legarge amen ko kher e Mnasoneskoro, kote so trebela sine te ačhova gosti. Ov sine manuš taro Kipar, jekh taro prva učenikija.

O Pavle resela ko Erusalim

17Koga reslem ko Erusalim, o phrajla šukar priminge amen. 18Tajsutno dive o Pavle gelo amencar ko Jakov, a adathe sine khedime sa o starešine. 19O Pavle pozdravingja len hem sa redoja vakergja lenge so o Devel kergja preku leskiri služba maškar o manuša taro javera nacije.

20Koga šunge adava, počminge te slavinen e Devle, i phenge e Pavleske: “Dikheja phrala, kozom ilade Evreja isi so verujnge hem sarine ola silno ikerena o Zakoni. 21A ola šunge baši tuke so sa e Evrejen, soj tane maškar o manuša taro javera nacije sikaveja te mukhen e Mojseskoro Zakoni, vakerindor lenge te na obrezinen pumare čhaven hem te na živinen spored amare adetija. 22So te kera akana? Sigurno ka šunen so alan. 23Adaleske, ker agjar sar so ka phena tuke. Amencar isi štar murša so denge zavet e Devleske. 24Le len tuja, ker o adeti e čistibaskoro zaedno lencar hem platin baši lenge, te šaj te keren len gerale. Togaš sarine ka džanen deka nane čače adava so šunge tutar, nego deka tu da ikereja o Zakoni hem živineja spored leste. 25A bašo manuša taro javera nacije so verujnge, amen bičhalgjem lenge lil kote so pišinela so odlučingjem: te na han o hajbe soj žrtvimo bašo idojla, te na han o mas e tasavde životnengoro kote so isi rat hem te ciden pe taro bludstvo.”

E Pavle astarena

26O tajsutno dive o Pavle lela peja adale manušen, i zaedno lencar kergja o adeti e čistibaskoro. Palo adava khugja ko Hrami hem vakergja lenge deka o dive lengere čistibastar ka nakhen koga ka del pe žrtva baši sekole jekheske lendar.

27Koga adala efta dive završinena pe sine, nesave Evreja tari Tikni Azija dikhle e Pavle ko Hrami, i pherge sa e manušen protiv leste hem astarge le, 28vikindor: “Izraelsko manušalen, pomožinen amen! Akava manuš segde sikavela sa e manušen protiv amaro narodo, protiv amaro Zakoni hem protiv akava than! A osven adava, angja okolen da so nane Evreja ko amaro Hrami hem mejlargja akava sveto than!” 29(Adaleske so angleder adava, dikhle e Trofime taro Efes e Pavleja ko gradi, i mislinge deka o Pavle angja le peja ko Hrami.)

30Celo gradi uštilo hem o manuša prastandile taro sa o strane, astarge e Pavle hem vlečinge le taro Hrami. I odma phandle o udara e Hrameskere. 31Dži kote ola mangena sine te mudaren le, alo glaso dži ko naredniko e Rimeskere četakoro deka celo gradi Erusalim ko bunt tano. 32Ov odma lela nekozome kapetanen hem vojnikon, i prastandilo ki lende. Koga o Evreja dikhle e naredniko hem leskere vojnikon, čhinage te maren više e Pavle.

33O naredniko alo uza ko Pavle, astargja le hem dengja naredba te phanden le duje lanconcar, i pučlja: “Koj akava manuš hem so kergja?” 34A tari gužva nesave vakerena sine jekh, a javera javer. I o naredniko našti te svatinel sine ništo tari galama hem adaleske naredingja te legaren le ki kasarna. 35A koga o Pavle resla dži ko skale, i gužva doborom sine nasilna so mora sine o vojnikija te legaren le. 36Bari gužva džala sine palo lende vikindor: “Mudaren le!”

O Pavle braninel pe anglo narodo

37Koga trebinge te legaren e Pavle ki kasarna, ov pučlja e naredniko: “Šaj li te vakerav tuke nešto?”

A o naredniko pučlja le: “Tu džaneja Grčki? 38Na sijan li tu o Egipčani, so angleder nesavo vreme vazdingjan bunt hem legargjan štare ilade teroristen ki pustina?”

39A o Pavle odgovoringja leske: “Me sijum Evrejco taro Tars ki Kilikija, manuš e pendžarutne gradeskoro. Molinava tut, mukh man te vakerav nešto e manušenge.”

40Koga o naredniko mukhla le, o Pavle terdilo ko skale hem dengja znako pe vasteja deka mangela te vakerel nešto. I koga sarine kjutinge, ov vakergja ko Evrejski: