Dejla 20

O Pavle ki Makedonija hem ki Grčka

1Koga nakhla i buna, o Pavle vikingja e učenikon hem ohrabringja len. I pozdravingja pe lencar hem gelo ki Makedonija. 2Nakhindor maškar adala thana bute lafencar ohrabringja e manušen. Agjar resla dži ki Grčka 3hem adathe ačhilo trin masek. Ama koga trebingja te plovinel ki Sirija, doznangja deka nesave Evreja čhige leske zamka i adaleske odlučingja te iranel pe preku i Makedonija. 4A leja gele: o Sopater, o čhavo e Pireskoro tari Verija, o Aristarh hem o Sekund taro Solun, o Gaj tari Derva hem o Timotej, o Tihik hem o Trofim tari Tikni Azija. 5Ola gele angleder amende hem adžikerge amen ki Troada. 6A amen palo prazniko e Beskvasno Mareskoro plovingjem e čamcoja taro Filipi hem palo pandž dive reslem ki Troada, kote so ačhilem efta dive.

O Pavle vazdela e Eftihe taro mule

7Ko prvo dive taro kurko, khedingjem amen ki Gospodova večer, a o Pavle propovedinela sine lenge. I adaleske so mangla tajsutno dive te džal peske, prodolžingja te propovedinel lenge dži ki ekvaš i rat. 8Ki upruni soba kote so khedingjem amen, sine but momojla. 9A uza ko džami bešela sine nesavo terno manuš so vikinela pe sine Eftih. I adaleske so o Pavle but kerela sine lafi, e manuše astarela sine zoralo sojba. I koga zasukja pelo taro trito sprati, a koga lele te vazden le, ov više sine mulo.

10O Pavle hulilo tele, alo uzi leste, gušingja le hem phengja: “Ma daran, dživdo tano.”

11Palo adava irangja pe upre, delingja i Gospodova večer hem hala maro lencar. Hem panda but vakergja lenge dži sabajle, a palo adava gelo ko drumo. 12A o manuša legarge e terne čhave khere dživdo hem sine but ohrabrime bašo adava.

O Pavle pozdravinela pe e starešinencar taro Efes

13A amen angleder khugjem ko brodi hem plovingjem ko Asos, kotar so trebingja te la e Pavle, soske ov agjar mangla phirindor te avel dži ko Asos. 14Koga arakhlem amen ko Asos, lelem le amencar ko brodi hem gelem ki Mitilina. 15Tajsutno dive plovingjem adathar hem reslem ko Hios, a javer dive reslem ko Samos, a javer dive reslem ko Milit. 16A o Pavle odlučingja te na ačhol ko Efes te šaj te na ačhol but ki Tikni Azija, adaleske so sigjargja te resel ko Erusalim te šaj dži ko prazniko Pentakost.

17A taro Milit o Pavle bičhalgja pe manušen ko Efes te aven o starešine e crkvakere. 18Koga ale ki leste, o Pavle phengja lenge: “Tumen džanena sar me živingjum celo vreme dži kote sijum sine tumencar, taro prvo dive koga alum ki Tikni Azija. 19Služingjum e Gospodareske ki bari poniznost hem asvencar hem ko phare iskušenia so arakhla man taro e Evrejengere zamke. 20Džanena deka nikat na čhinagjum te propovedinav nešto so ka ovel tumenge ko korist, nego sikavava tumen sine javno, taro kher ko kher. 21Opomeninava sine e Evrejen da hem okolen da taro javera nacije deka mora te iranen pe ko Devel hem te pokajnen pe i te verujnen ko amaro Gospodari o Isus.

22I akje akana adaleske so o Duho terinela man džava ko Erusalim, a so ka ovel mancar adathe na džanava. 23Samo džanava deka ko sekova gradi o Sveti Duh opomeninela man sine hem vakerela deka adžikerela man zatvor hem muke. 24Ama mange mo životo na vredinela ništo, samo te završinav mi trka hem i buti so dengja man la o Gospodari o Isus – te svedočinav bašo evangelije tari blagodat e Devleskiri.

25Akana džanava deka nikoj tumendar maškar adala so sijum sine, dži kote gelum hem propovedingjum o carstvo e Devleskoro, nikat više nane te dikhel man. 26Adaleske ko akava dive jasno vakerava tumenge deka na sijum krivo nikaskere meribaske, 27soske na čhinagjum te vakerav tumenge celo vojla e Devleskiri. 28Arakhen tumen hem celo stado e Devleskoro so o Sveti Duh čhigja tumen bašo vodačija. Oven pastijra e Devleskere crkvake, so ov platingja la pe rateja. 29Džanava deka koga ka džav mange ka khuven maškar tumende o opasna ruva, kola nane te žalinen o stado. 30Dži tumendar da korkori ka pojavinen pe manuša, so ka bangjaren o čačipe te šaj pala pumende te ciden učenikija. 31Adaleske oven džangavde! Setinen tumen deka trin berš, dive rat na čhinagjum sa asvencar te opomeninav tumen sekole jekhe tumendar.

32A akana predajnava tumen e Devleske hem leskere lafeske tari leskiri blagodat, so šaj te bajlarel tumen hem te del tumen nasledstvo maškar o sarinen soj tane posvetime. 33Nikat na manglum javereskoro srebro, zlato ili šeja. 34Korkori džanena deka me vastencar kergjum buti bašo adava so trebingja mange, hem bašo adava so trebingja okolenge so sine mancar. 35Ko sa sijum sine tumenge primer sar trebela te trudinen tumen hem te pomožinen adalen soj tane slaba, agjar so ka setinen tumen ko lafija so o Gospodari o Isus korkori vakergja len: ‘Poblagoslovimo tano te del pe, nego te lel pe.’ ”

36Koga o Pavle završingja pe lafencar, pelo ko kočaka sarinencar hem molingja pe. 37Sarinen rovena sine dži kote gušinena sine hem čuminena e Pavle. 38Najviše dukhandilo len adava so phengja lenge deka nikat više nane te dikhen le. Palo adava ispratinge le dži ko brodi.