Dejla 2

O ajbe e Sveti Duhoskoro

1Koga alo o prazniko Pentakost, o pindato dive palo prazniko Pasha, sarinen sine zaedno ko jekh than. 2I taro jekh puti taro nebo šundilo zvuko sar koga phudela i silno bavlal, hem phergja celo kher kote so sine ola. 3I dikhle sar jagale čhibja so delinena pe hem hulena upro sekoj jekh lendar. 4Sarinen pherdile e Sveti Duhoja hem počminge te keren lafi ko javera čhibja, sar so dela len sine o Duho.

5A ko adava vreme ko Erusalim sine pobožna Evreja so ale taro sekova narodo ki phuv. 6Koga šunge adava zvuko, o narodo khedingja pe hem sine bunime, adaleske so sekoj lendar šungja e učenikon sar kerena lafi ki leskiri čhib.

7Sarinen iznenadinge pe hem but čudinge pe, pučindor: “Nane li sa akala so kerena lafi Galilejcija? 8Sar šaj togaš sekoj amendar te šunel len ki pi čhib? 9Maškar amende isi Partijcija, Midijcija hem Elamitija, manuša tari Mesopotamija, Judeja, Kapadokija, Ponta hem Tikni Azija, 10Frigija, Pamfilija, Egipet hem taro thana e Libijakere paše uza ki Kirineja, hem okola so ale taro Rim, 11(zaedno e Evrejencar hem okola so obratinge pe ki vera e Evrejengiri), o Kritjajna hem o Arapija. Sarinen amen šunaja len sar ko amare čhibja kerena lafi bašo e Devleskere bare dejla!”

12I sarinen čudime hem bunime, pučena sine jekh jekhe: “So značinela akava?”

13A nekoj asana sine lenge vakerindor: “But pile gudli mol.”

I propoved e Petareskiri

14Togaš o Petar uštilo e dešujekhe apostolencar anglo lende hem silno vakergja lenge: “Evrejsko manušalen hem sarinen tumen so živinena ko Erusalim! Šunen šukar me lafija hem džanen akava: 15Akala manuša nane mate, sar so tumen mislinena, soske o sati enja tano sabajle. 16Nego, akava tano adava so vakergja o prorok Joil:

17‘Ko posledna dive – phenela o Devel –

ka čhorav mo Duho upro sa o manuša,

tumare čhave hem čhaja ka prorokujnen,

tumare terne čhave ka ovel len vizije,

hem tumare phure ka dikhen sune.

18A dži upro me sluge hem slugjinke,

ko adala dive ka čhorav mo Duho,

hem ola ka prorokujnen.

19Ka sikavav čudija ko nebo

hem znakija tele ki phuv

– rat, jag hem oblakija taro čuro.

20O kham ka ovel ki temnina,

a i mesečina ko rat

angleder te avel o baro hem o slavno dive e Gospodareskoro.

21I sekoj so ka vikinel o anav e Gospodareskoro,

ka ovel spasimo.’1

22Izraelsko manušalen, šunen akala lafija: o Isus taro Nazaret sine manuš so o Devel dokažingja angla tumende preku silna dejla, čudija hem znakija, so ov kergja len preku leste koga sine maškar tumende. Tumen korkori džanena adava. 23Ama o Devel džangja so ka ovel, hem leskoro plani so kergja le angleder, pherdilo koga o Isus sine predajmo tumenge. A tumen zaedno e lošno manušencar, čhigjen le ko krsto hem mudargjen le. 24Ama o Devel vazdingja le taro mule hem oslobodingja le taro muke e meribaskere, soske o meribe našti sine te ikerel le. 25A o car David vakergja baši leske:

‘Sekat dikhlum e Gospodare anglo mande.

Nane te perav adaleske so ov tano mange tari desno strana.

26Adaleske mo srce tano radosno hem mi čhib slavinela e Devle tari radost,

hem mo telo da ka živinel ki nada,

27soske nane te mukhe mi duša ko than e mulengoro,

ni nane te mukhe to pravedniko te dikhel kjirnipa.

28Tu sikavgjan mange o drumija e životoskere,

hem ka phere man so radost ko to prisustvo.’2

29Phrajlalen, sigurno sijum ko akava so phenava tumenge bašo amaro parapapo o David: ov mulo hem sine parumo, a leskoro grobo tano akate maškar amende sa dži avdive. 30Ama ov sine proroko hem džangja deka o Devel vetingja leske agjar so hala leske sovli deka jekhe taro leskoro seme ka čhivel le leske ko than sar caro.

31O David angleder dikhla so trebela te ovel, i vakergja bašo e Hristoskoro uštiba taro mule:

‘Na sine mukhlo ko than e mulengoro,

ni leskoro telo na kjirnilo.’3

32O Devel akale Isuse vazdingja taro mule, a sarinen amen sijem svedokija bašo adava. 33Adaleske ov tano voznesimo ki desno strana e Devleskiri, primingja taro Dad o vetimo Sveti Duh hem dengja akava, so akana tumen dikhena hem šunena.

34Soske o David na voznesisalilo ko nebo, a ov korkori phengja:

‘O Gospodari phengja me Gospodareske:

Beš tari mi desno strana

35sa dži kote na čhivava te dušmanen

telo te pre.’4

36Adaleske sa o Izraelsko narodo neka džanel šukar deka akale Isuse, so tumen čhigjen le ko krsto, o Devel kergja le Gospodari hem Hristos.”

37Koga šunge akava o manuša, astargja len o srce hem pučle e Petare hem e javere apostolen: “Phrajlalen, so trebela te kera?”

38A o Petar odgovoringja lenge: “Pokajnen tumen hem sekoj tumendar neka krstinel pe ko anav e Isuse Hristoskoro bašo oprostiba tumare grevija hem ka priminen daro e Sveti Duho. 39Adaleske so, adavaj tano vetuvanje tumenge hem tumare čhavenge hem sarinen so živinena dur akatar, so ka vikinel len amaro Gospodari o Devel ki peste.”

40Hem panda bute lafencar propovedingja lenge hem opomeningja len: “Spasinen tumen tari kazna so avela upri akaja rumimi generacija!”

41Togaš krstinge pe okola so prifatinge leskere lafija. Agjar adava dive paše trin ilade manuša gele e učenikoncar.

O životo e prvo vernikongoro

42Ola posvetinge pe ko učibe e apostolengoro, ko zaedništvo, ko phagiba o maro hem ki molitva. 43A i dar lela sarinen adaleske so but znakija hem čudija sine kerde preku o apostojla. 44A sa o vernikija sine zaedno hem sa sine lenge zaedničko. 45Bikinena sine sa po barvalipe hem dena sine okolenge kaske so trebela. 46Sekova dive khedena pe sine zaedno ko Hrami. Ko pumare khera phagena sine o maro hem hana sine zaedno radosna hem iskreno srcencar. 47Slavinena sine e Devle hem sa o manuša poštojnena le sine. A o Gospodari sekova dive bajlarela sine o broj e spasimengoro.