Dejla 15

O apostojla khedena pe ko Erusalim

1Nesave manuša ale tari Judeja, ki Antiohija, i počminge te sikaven e vernikon: “Ako na sijen obrezime spored e Mojsijaskoro adeti, našti te oven spasime.”

2Akava angja e Pavle hem e Varnava ko baro akošibe hem ki debata lencar. Adaleske sine birime o Pavle hem o Varnava zaedno javere vernikoncar baši akava akošibe te džan ko Erusalim ko apostojla hem ko starešine. 3Agjar i crkva bičhalgja len ko drumo hem dži kote nakhena sine tari Fenikija hem Samarija, vakerena sine redoja sar obratinge pe okola so nane Evreja hem adava angja bari radost sa e vernikonge.

4Koga resle ko Erusalim, i crkva, o apostojla hem o starešine adžikerge len, a o Pavle hem o Varnava vakerge lenge bašo sa so kergja o Devel preku lende.

5Togaš uštile nesave taro vernikija e farisejengere hem phenge lenge: “Okola so nane Evreja mora te obrezinen pe hem te naredinel pe lenge te ikeren o Zakoni e Mojseskoro.”

6A o apostojla hem o starešine khedinge pe te keren lafi adalestar. 7Pali bari diskusija, o Petar uštilo hem vakergja lenge: “Phrajlalen, tumen džanena deka o Devel man angleder biringja man maškar tumende te šaj me mostar te šunen o manuša taro javera nacije bašo evangelije hem te verujnen. 8Hem o Devel so pendžarela o srcija, sikavgja deka prifatingja len agjar so dengja len e Sveti Duho sar amen. 9Ov na kergja nisavi razlika maškar amende hem lende, soske čistingja lengere srcija preku i vera. 10Soske akana iskušinena e Devle agjar so čhivena pharipe e učenikonge so našti te phirava le ni amen ni amare parapapija? 11Ama amen verujnaja deka preku i blagodat amare Gospodareskiri e Isuseskiri sijem spasime, sar soj tane ola da.”

12Togaš sarinen kjutinge hem počminge te šunena e Varnava hem e Pavle so vakerena sine bašo znakija hem o čudija so o Devel kergja le preku lende maškar o javera nacije.

13Koga završinge, o Jakov phengja: “Phrajlalen, šunen man. 14O Simon Petar phengja sar o Devel prvo dikhla maškar o javera nacije te birinel peske narodo. 15Hem adaleja složinena pe o lafija e prorokongere, sar soj pišimo:

16‘Palo adava ka iranav man

hem palem ka vazdav o peravdo šatori e Davideskoro;

tari ruševina ka vazdav le hem ka obnovinav le,

17te šaj hem okola da manuša te roden e Gospodare,

hem sa o nacije so vikingjum te oven mle,

vakerela o Gospodari so kerela akava.1

18A adava džanela pe sine panda angleder.’

19Adaleske, spored mande, na trebela te kera pharipe upro okola so nane Evreja soj tane obratime ko Devel, 20nego trebno te pišina lenge te na han o hajbe soj žrtvimo bašo idojla, soske tano melalo, te ciden pe taro bludstvo, te na han o mas e tasavde životnengoro ko so isi rat hem te na pijen o rat e životnengoro. 21Adaleske so e Mojseskoro Zakoni panda taro početok sine propovedimo ko sekova gradi hem ki sekoja sabota ki sinagoga čitinela pe.”

E apostolengoro lil dži ko vernikija taro javer nacije

22Togaš o apostojla hem o starešine celo crkvaja odlučinge te birinen nesave manušen maškar pumende so ka bičhaven len e Pavleja hem e Varnavaja ki Antiohija. Agjar biringe e Juda soj vikimo Varnava hem e Sila, so sine vodačija maškar o vernikija. 23Palo lende bičhalge akava lil:

Amen o apostojla hem o starešine, tumare phrajla, pozdravinaja sa e phralen taro javera nacije, ki Antiohija, ki Sirija hem ki Kilikija.

24Šungjem deka nesave manuša amendar ale bizo amari dozvola hem buninge tumen pumare lafencar hem voznemiringe tumen. 25Adaleske sarine amen zaedno odlučingjem te birina nesave manušen hem te bičhavava len ki tumende zaedno amare mangle phralencar, e Varnavaja hem e Pavleja. 26Adala tane manuša so pumaro životo rizikujnge bašo amaro Gospodari o Isus Hristos. 27Adaleske bičhavaja e Juda hem e Sila, te vakeren tumenge isto akava soj pišimo. 28Adaleske so, zaedno e Sveti Duhoja, odlučingjem te na čhiva tumenge pharipe, osven akalestar so trebela: 29te na han o hajbe soj žrtvimo bašo idojla, te na pijen o rat e životnengoro hem te na han o mas e tasavde životnengoro ko so isi rat, hem te ciden tumen taro bludstvo. Šukar ka keren ako cidingjen tumen podur taro akala bukja.

Oven pozdravime.

30Agjar bičhalge len ko drumo hem gele ki Antiohija, kote so khedinge e vernikon hem denge len o lil. 31Koga ola čitinge o lil, radujnge pe bašo ohrabribe. 32A o Juda hem o Sila, so ola korkori sine prorokija, bute lafencar ohrabringe hem vazdinge e vernikon ki vera. 33Palo nesavo vreme so sine adathe, o vernikija ko mir bičhalge te iranen pe palal ko okola so bičhalge len. 34[Ama o Sila odlučingja te ačhol adathe.] 35A o Pavle hem o Varnava zaedno bute javerencar ačhile ki Antiohija kote so sikavena sine e narodo hem propovedinena sine o lafi e Gospodareskoro.

O Pavle hem o Varnava delinena pe

36Palo nesavo vreme o Pavle vakergja e Varnavaske: “Ajde te irana amen hem te dikha e phralen ko sa o gradija so propovedingjem o lafi e Gospodareskoro, te dikha sar tane.”

37O Varnava mangla te lel pumencar e Jovane soj vikimo Marko, 38ama o Pavle mislingja deka nane šukar te len le peja, adaleske so ov mukhla len sine ki Pamfilija hem na prodolžingja i buti lencar. 39I doborom silno na složinge pe so cidinge pe jekh jekhestar. O Varnava lela peja e Jovane soj vikimo Marko hem plovinge ko Kipar. 40A o Pavle biringja e Sila. I koga o vernikija predajnge le ki blagodat e Gospodareskiri, gelo. 41O Pavle nakhla maškar i Sirija hem i Kilikija hem ohrabringja e crkven.