Dejla 14

O Pavle hem o Varnava ki Ikonija

1Sar ko javera thana agjar hem ki Ikonija o Pavle hem o Varnava khuge ki Evrejsko sinagoga. Adathe doborom silno kerge lafi, so but džene taro Evreja hem Grkija verujnge. 2Ama o Evreja so na verujnge, buninge e manušen taro javera nacije hem pherge len te džan protiv o phrajla. 3Adaleske o Pavle hem o Varnava ačhile but vreme adathe, vakerindor lenge bizo dar bašo o Gospodari, so potvrdinela sine o lafi tari pi blagodat agjar so dengja len te keren znakija hem čudija.

4A o manuša taro adava gradi sine delime, nesave sine tari strana e Evrejengiri, a javera tari strana e apostolengiri. 5A maškar o manuša taro javere nacije hem taro Evreja, zaedno pumare vodačencar, odlučinge te keren lošnipe hem te frden bara upro lende te mudaren len. 6Koga o Pavle hem o Varnava šunge bašo adava, našle ki Likaonija, ko gradija Listra hem Derva hem ko lengere thana, 7kote so prodolžinge te propovedinen o evangelije.

O Pavle hem o Varnava ki Listra hem ki Derva

8Ki Listra bešela sine jekh manuš so sine bango. Ov sine taro bijanibe agjar hem nikat na phirgja.

9Dži kote o Pavle propovedinela sine, ov šunela le sine, i o Pavle dikhla deka isi le vera te ovel sasljardo, 10i sa pe glasoja phengja leske: “Ušti ko pre!”

I o manuš rupingja ko pre hem počmingja te phirel.

11Koga o narodo dikhle so o Pavle kergja, vikinge ki pumari čhib likaonsko: “O devejla hulile ki amende ko manušikano izgled!”

12E Varnava vikinge Zevs, a e Pavle vikinge Hermes, adaleske so ov sine glavno govorniko. 13A o svešteniko e Zevseskoro, kaskoro hrami sine odma uza ko gradi, angja guruva hem vencija angli porta e gradeskiri, i mangla zaedno e narodoja te del žrtva e apostolenge.

14Koga o apostojla o Varnava hem o Pavle šunge adava, pharavge pumare šeja upra pumende hem prastandile maškar o narodo vikindor: 15“Manušalen, soske kerena adava? Amen da sijem manuša sar tumende. Amen propovedinaja tumenge o evangelije, te ciden tumen taro akala bez vredna bukja hem te iranen tumen ko dživdo Devel so kergja o nebo hem i phuv, o more hem sa so isi ki lende. 16O Devel ko purano vreme mukhla sa e nacije te džan pumare drumoja, 17ama na mukhla pe pes bizo svedoštvo. Ov kergja tumenge šukaripe, dela tumen taro nebo bršim hem žetva koga avela o vreme, parvarela tumen hajbaja hem pherela tumare srcija so radost.”

18Ama akale lafencar, edvaj čhinagja len te na den žrtva lenge.

19Togaš ale nesave Evreja tari Antiohija hem Ikonija hem pherge e narodo, i frdinge barencar upro Pavle hem ikalge le avrik taro gradi, mislindor deka tano mulo. 20Ama, koga o učenikija khedinge pe uza leste, ov uštilo hem irangja pe ko gradi, a o tajsutno dive e Varnavaja gele ko Derva.

O iranibe e Pavleskoro hem e Varnavaskoro ki Sirisko Antiohija

21Koga propovedinge o evangelije ko adava gradi hem koga kerge but učenikija, irange pe ki Listra, ki Ikonija hem ki Antiohija. 22Adathe silno kerge e učenikon hem ohrabringe len te ačhoven ki vera vakerindor: “Mora te nakha preku but pharipe te šaj te khuva ko carstvo e Devleskoro.” 23O Pavle hem o Varnava čhige lenge starešine ki sekoja crkva, i molitvaja hem postibaja, predajnge len e Gospodareske, kaste so verujnge.

24Palo adava nakhle maškar i Pisidija hem resle ki Pamfilija. 25A koga propovedinge o lafi e Devleskoro ki Perga, gele ki Atalija.

26Tari Atalija plovinge ki Antiohija, kote so sine angleder predajme baši blagodat e Devleskiri baši i buti so završinge la. 27Koga resle ki Antiohija, khedinge e crkva hem vakerge sa so o Devel kergja preku lende, hem sar e manušenge taro javera nacije phravgja o udar te verujnen. 28Hem adathe ačhile but vreme e učenikoncar.